Тэма тыдня: Прэзідэнт падпісаў указ аб аплаце жыллёва-камунальных паслуг

Прэзідэнт Беларусі зацвердзіў гранічна дапушчальныя тарыфы ў 2016 годзе на 14 відаў ЖКППрэзідэнт Беларусі зацвердзіў гранічна дапушчальныя цэны (тарыфы) у 2016 годзе на 14 відаў жыллёва-камунальных паслуг. Адпаведны ўказ нумар 107 «Аб аплаце жыллёва-камунальных паслуг, што аказваюцца насельніцтву» Аляксандр Лукашэнка падпісаў 23 сакавіка.
Указ прадугледжвае змяненне шасці тарыфаў на ЖКП.
У мэтах зніжэння фінансавай нагрузкі для насельніцтва ўказам змяншаюцца тарыфы на паслугі водазабеспячэння ў 1,7 раза (з Br4765,9 да Br2790 за 1 куб.м), водаадвядзення — больш як у 2,2 раза (з Br4148,8 да Br1863 за 1 куб.м).
Акрамя таго, устанаўліваецца гранічны тарыф на паслугу па тэхнічным абслугоўванні запорна-перагаворных устройстваў (кодавыя дзверы, дамафоны і іншыя) жылога дома ў памеры Br9100 на адну кватэру (раней ён не быў устаноўлены).
Палажэннямі дакумента змяняюцца падыходы да налічэння платы за тэхнічнае абслугоўванне ліфта, санітарнае ўтрыманне (прыбіранне) дапаможных памяшканняў жылога дома, электраэнергію на асвятленне месц агульнага карыстання, работу дапаможнага абсталявання ў залежнасці ад колькасці грамадзян, якія пражываюць у кватэры.
У мэтах больш аб’ектыўнага вызначэння платы за паслугі, кошт якіх разлічваецца зыходзячы з колькасці грамадзян, якія пражываюць у кватэры, ва ўказе ўстаноўлена норма, што прадугледжвае спагнанне платы за карыстанне ліфтам і прыбіранне дапаможных памяшканняў з жыльцоў, якія маюць жылыя памяшканні камерцыйнага выкарыстання і прыватнага жыллёвага фонду па дагаворы найму.
Указ уступае ў сілу з дня падпісання і распаўсюджвае сваё дзеянне на адносіны, што ўзніклі з 1 студзеня 2016 года.
У Беларусі да 25 сакавіка зробяць пераразлік жыровак за студзень
У Беларусі да 25 сакавіка будзе праведзены пераразлік плацяжоў за аказаныя спажыўцам у студзені жыллёва-камунальныя паслугі, за выключэннем паслуг водазабеспячэння і водаадвядзення (каналізацыі). Такая норма змешчана ва ўказе нумар 107 «Аб аплаце жыллёва-камунальных паслуг, што аказваюцца насельніцтву».
Пераразлік даручана забяспечыць аблвыканкамам і Мінскаму гарвыканкаму пад персанальную адказнасць старшынь аблвыканкамаў і Мінгарвыканкама.
Акрамя таго, да 25 сакавіка будзе праведзены пераразлік плацяжоў у лік кампенсавання расходаў арганізацый, якія ажыццяўляюць эксплуатацыю жыллёвага фонду і (або) прадастаўляюць жыллёва-камунальныя паслугі, а таксама на электраэнергію, што спажываецца на асвятленне дапаможных памяшканняў і работу абсталявання ў шматкватэрных жылых дамах.
Налічэнне гэтых плацяжоў за люты будзе праводзіцца з улікам гранічна дапушчальных тарыфаў (цэн) на жыллёва-камунальныя паслугі і памераў кампенсавання расходаў, якія змешчаны ў дадатках да дакумента.
Адзіную форму паведамлення аб памеры платы за ЖКП павінны зацвердзіць у Беларусі да 1 мая
Савету Міністраў даручана да 1 мая зацвердзіць адзіную форму паведамлення аб памеры платы за жыллёва-камунальныя паслугі і платы за карыстанне жылымі памяшканнямі. Яна павінна ўключаць інфармацыю аб узроўні пакрыцця насельніцтвам затрат арганізацый, якія ажыццяўляюць эксплуатацыю жыллёвага фонду і (або) прадастаўленне жыллёва-камунальных паслуг.
Акрамя таго, урад да 1 мая павінен зацвердзіць парадак разліку ўзроўню пакрыцця насельніцтвам затрат арганізацый, якія ажыццяўляюць эксплуатацыю жыллёвага фонду і (або) прадастаўленне жыллёва-камунальных паслуг, а таксама пераліку дадатковых жыллёва-камунальных паслуг.
Савету Міністраў прадастаўлена права растлумачваць пытанні прымянення ўказа. Кантроль за выкананнем дакумента ўскладзены на Камітэт дзяржаўнага кантролю.
Прэзідэнт даручыў да 1 кастрычніка аснасціць дамы прыборамі ўліку злектраэнергіі ў дапаможных памяшканнях
Прэзідэнт Беларусі даручыў да 1 кастрычніка аснасціць шматкватэрныя жылыя дамы прыборамі ўліку злектраэнергіі, што спажываецца на асвятленне дапаможных памяшканняў і работу абсталявання.
Забяспечыць выкананне гэтага патрабавання даручана аблвыканкамам і Мінскаму гарвыканкаму пад персанальную адказнасць старшынь аблвыканкамаў і Мінскага гарвыканкама.
Лукашэнка: тарыфы на ЖКП павінны быць празрыстымі, аб’ектыўнымі і рэальнымі
Прэзідэнт Беларусі Аляксандр Лукашэнка 14 сакавіка на нарадзе па пытаннях аплаты ЖКП, што аказваюцца насельніцтву, запатрабаваў выпрацоўкі празрыстых, аб’ектыўных і рэальных тарыфаў на жыллёва-камунальныя паслугі.
«Тады чалавек, адкрыўшы сваю жыроўку, паглядзіць: водазабеспячэнне аднаго кубаметра каштуе столькі, ён паглядзіць на лічыльніку — вось столькі кубоў. Паглядзеў на лічыльнік, памножыў на цану — атрымаў вынік, — адзначыў Прэзідэнт. — А не так што чалавеку прыносяць гэту жыроўку, як у народзе яе называюць, ён паглядзеў — якая там цана?! Ды і гэта жыроўка — чорт ногі зломіць, не кожны эканаміст разбярэцца!»
«Гэта значыць трэба зрабіць так, каб людзі бачылі цану паслугі, аб’ём у іх ёсць. Калі хочуць дакладна — значыць, павінны стаяць лічыльнікі на ваду, на газ, на цяпло. Няма лічыльнікаў — іншая методыка. Але цана гэтай паслугі, тарыф павінны быць рэальнымі», — лічыць кіраўнік дзяржавы.
Лукашэнка: увядзенне 100-працэнтнай аплаты ЖКП будзе залежаць ад дабрабыту людзей
«Мы гаворым, што калісьці насельніцтва будзе плаціць 100 працэнтаў за гэтыя паслугі. Толькі не трэба людзям гаварыць, што гэта будзе ў 2018 годзе. Я такога не гаварыў. Гэта можа быць і ў 2020-м, і ў 2025-м. Гэта будзе залежаць ад таго, як людзі будуць жыць», — сказаў кіраўнік дзяржавы на нарадзе па пытаннях аплаты ЖКП, што аказваюцца насельніцтву.
«У людзей павінны быць грошы, каб заплаціць за такія паслугі па цэнах, якія мы ўстановім. Таму будзе гэта ў 2018-м, у 2020-м або 2025-м — гэта яшчэ пытанне, давайце дажывём да гэтага», — адзначыў Прэзідэнт.
Прэзідэнт адзначыў, што ў будучым будзе таксама разгледжана фарміраванне цэн на паслугі па электраэнергіі. «Занадта ўжо шыкоўна энергетыкі сябе паводзяць, жывуць, а ўсё гэта ідзе ў затраты, а потым кладзецца на прамысловасць і на людзей», — сказаў кіраўнік дзяржавы.
Узровень кампенсавання затрат на ЖКП будзе павялічвацца не за кошт тарыфаў, а шляхам зніжэння выдаткаў камунальшчыкаў
Такое даручэнне даў Прэзідэнт Аляксандр Лукашэнка. Кіраўнік дзяржавы акцэнтаваў увагу, што калі браць у разлік зацверджаныя ім сёння тарыфы на ЖКП, то ўзровень кампенсавання затрат насельніцтвам складае не больш за 40,4 працэнта ад рэальнага кошту паслуг. Узровень кампенсавання затрат да канца 2016 года павінен скласці не менш за 50 працэнтаў.
Пры гэтым Прэзідэнт паставіў перад арганізацыямі сістэмы Мінжылкамгаса і Мінэнерга задачу забяспечыць рост узроўню кампенсавання не за кошт павышэння тарыфаў, а шляхам зніжэння выдаткаў непрадукцыйных затрат саміх арганізацый.
Як растлумачыў журналістам міністр жыллёва-камунальнай гаспадаркі Аляксандр Церахаў, зацверджаныя сёння кіраўніком дзяржавы тарыфы з’яўляюцца нязменнымі да канца года. «Узровень кампенсавання затрат даручана павышаць толькі за кошт зніжэння ўласных выдаткаў і зніжэння затрат эксплуатуючых арганізацый», — адзначыў ён.
Паралельна ўрад створыць для малазабяспечаных грамадзян сістэму безнаяўных субсідый па аплаце ЖКП.
Неабходны нарматыўны прававы акт распрацоўваецца. Плануецца, што дзяржава падставіць плячо домагаспадаркам, калі затраты на ЖКП перавысяць 15 і 20 працэнтаў даходу — у сельскай мясцовасці і горадзе адпаведна. «Дапамога дзяржавы ў аплаце гэтых паслуг будзе аказана, але не па фактычных затратах, а пры нарматыўным спажыванні», — удакладніў міністр.
Любіцеляў «падкруціць» лічыльнікі ў Беларусі будуць караць больш строга
Міністр жыллёва-камунальнай гаспадаркі Аляксандр Церахаў адзначыў, што ў час даклада па пытаннях аплаты ЖКП, якія аказваюцца насельніцтву, закраналася і праблема з нядобрасумленнымі плацельшчыкамі, які маніпулююць паказаннямі прыбораў уліку.
Аляксандр Церахаў праінфармаваў, што ў сувязі з гэтым кіраўнік дзяржавы даручыў «узмацніць адказнасць грамадзян, якія будуць абвінавачаны ў тым, што яны скрываюць рэальныя паказанні прыбораў уліку».
Неабходны для гэтага механізм сумесна распрацуюць Мінжылкамгас і Камітэт дзяржаўнага кантролю.
Лютаўскія жыроўкі беларусы змогуць аплаціць да 5 красавіка без пені
«Рахунак-паведамленні грамадзянам будуць прадастаўлены да 25 сакавіка. Пры гэтым грамадзяне будуць мець права аплаціць іх да 5 красавіка без штрафаў і пеняў за пратэрміноўку плацяжу. Гэта не па віне чалавека, а па аб’ектыўных прычынах», — заявіў міністр жыллёва-камунальнай гаспадаркі Аляксандр Церахаў.
Кіраўнік профільнага ведамства адзначыў, што за люты налічэнні будуць па новых тарыфах, за студзень будзе зроблены пераразлік па тых сумах, якія «былі налічаны няправільна».