Оператор заправочной станции Борис Лейко награжден Почетной грамотой Кореличского райисполкома
За шматгадовую добрасумленную працу і якаснае выкананне службовых абавязкаў Ганаровай граматай Карэліцкага райвыканкама ўзнагароджаны аператар заправачных станцый 4 разраду АЗС № 52 участка АЗС № 3 «Слонім» аддзела эксплуатацыі АЗС і рэалізацыі паліва рэспубліканскага даччынага ўнітарнага прадпрыемства па забеспячэнні нафтапрадуктамі «Беларуснафта-Гроднааблнафтапрадукт» Барыс Георгіевіч ЛЕЙКА.
— Барыс Георгіевіч, узнагароджванне Ганаровай граматай райвыканкама — прызнанне Вашай штодзённай працы. А як Вы самі аднесліся да гэтага?
— У галіне з 2008 года — з адкрыцця шматфункцыянальнай заправачнай станцыі. На станцыі запраўляем аўтамабілі бензінам, дызельным палівам, газам. Ёсць магазін, у якім прадаюцца спадарожныя тавары. Што датычыць прызнання працы — значыць наша прафесія запатрабаваная. Заправачная станцыя працуе кругласутачна: у любы час да нас можна наведацца, і мы акажам патрэбныя паслугі.
— Аператар заправачных станцый — прафесія, якая патрабуе пэўных ведаў і навыкаў. Дзе Вы гэтаму вучыліся?
— Прайшоў курсы па абраным накірунку, стажыроўку ў работнікаў з вопытам працы ў гэтай галіне на АЗС № 11 г.п. Карэлічы, здаў экзамены. Патрэбна было навучыцца працаваць на камп’ютары, паступова асвоіў пэўныя аперацыі, і праца набыла стабільнае рэчышча.
— Што з’яўляецца ў Вашай рабоце галоўным?
— Самае галоўнае — зносіны з людзьмі. Як вядома, яны з рознымі характарамі, і да кожнага трэба знайсці падыход: павітацца і прапанаваць дапамогу. Сустракаюцца людзі, якія не ўмеюць карыстацца палівараздатачным кранам. У любой сітуацыі трэба быць чалавечным, проста дапамагаць людзям, не думаючы аб узнагародзе. Час няпросты, і многія маюць патрэбу ва ўвазе і падтрымцы.
— Вы самі аўтааматар, і гэта нейкім чынам уплывае на працу?
— Сапраўды, у мяне ёсць аўтамабіль, і я моцна люблю тэхніку. Імкнуся дапамагчы парадай жанчыне-вадзіцелю, якая мае ў гэтым патрэбу. Падтрымліваю тых мужчын, у чыіх аўтамабілях узнікаюць непаладкі. Пра ўдзячнасць не думаю, часцей пра тое, што, можа, хтосьці і мне ў дарозе дапаможа. Дабро дабром у жыцці вяртаецца.
— Скажыце, Ваш калектыў можна назваць адной працоўнай сям’ёй? У ёй жывуць агульнымі імкненнямі, усе адзін за аднаго і адзін за ўсіх?
— У калектыве — 10 чалавек пад кіраўніцтвам майстра Міхаіла Васільевіча Русака. Вопытны і адказны, кіраўнік патрабуе ад нас сумленных адносін да даручанай справы.
Аператары працуюць у адной звязцы: у нас калектыўная матэрыяльная адказнасць. Прытрымліваемся жыццёвага правіла: «Рабі сваю работу як належыць і нічога не бойся».
— У Вас ёсць пажаданні?
— Здароўя і ўдачы ўсім людзям. Будзе гэта — будзе жаданне жыць і працаваць.
Галіна СМАЛЯНКА
Фота Наталлі САКАЛЯНСКАЙ
