На стадионе в Кореличах повредили тренажер и трибуны. Что грозит вандалам?
Летась на стадыёне «Юнацтва» адкрылі спартыўную антывандальную пляцоўку. Мяркуючы па водгуках жыхароў райцэнтра і таму, што кожны дзень на пляцоўцы можна сустрэць аматараў спорту, пляцоўка прыйшлася карэліччанам даспадобы. Прайшло крыху больш за год, а хтосьці, мабыць, прыняў слова «антывандальная» ў назве пляцоўкі за выклік і вельмі моцна нашкодзіў: з велатрэнажора зніклі педаль і сядло. На трыбунах шчыліны — хтосьці выламаў крэслы.
— За ўсімі, хто адпачывае на стадыёне, вядзецца відэаназіранне, — кажа ўчастковы інспектар інспекцыі па справах непаўналетніх Карэліцкага РАУС Аляксандр Валенцюкевіч. — Калі хтосьці наўмысна пашкодзіў дзяржаўную маёмасць, гэта расцэньваецца як хуліганства і праследуецца паводле арт. 339 Крымінальнага кодэкса Рэспублікі Беларусь. Караецца грамадскімі работамі, штрафам або арыштам да шасці месяцаў, або пазбаўленнем волі на тэрмін да трох гадоў.
У залежнасці ад абставін здзяйснення хуліганства адносіцца да катэгорый менш цяжкага або цяжкага злачынства. Крымінальная адказнасць за хуліганства, таксама як і адміністрацыйная адказнасць за дробнае хуліганства, наступае з 14 гадоў, бо яны ўяўляюць павышаную грамадскую небяспеку ў параўнанні з іншымі правапарушэннямі.
— У Карэліцкім раёне ёсць выпадкі, калі дзеці і іх бацькі прыцягваліся да адміністрацыйнай адказнасці па дадзеным артыкуле і заплацілі штраф, — кажа Аляксандр Уладзіміравіч. — Непаўналетнія парушальнікі былі пастаўлены на ўлік у інспекцыю па справах непаўналетніх.
Сяргей СТОЛЯР
Фота Дар’і ВАРАПАЕВАЙ