Геннадий Шатуев: «В работе с твердыми коммунальными отходами нужен системный подход»

Для таго, каб у раёне мінімізаваць колькасць стыхійных звалак, неабходна прыцягнуць дадатковы транспарт РУП ЖКГ. Такое даручэнне даў падчас штотыднёвай рабочай нарады старшыня Карэліцкага райвыканкама Генадзій Шатуеў.

З надыходам восені аб’ём адходаў як правіла павялічваецца, і ў асноўным за кошт раслінных рэшткаў з агародаў і палісаднікаў. Паколькі гэтае смецце не адносіцца да катэгорыі цвёрдых бытавых адходаў, якія па дагаворы вывозіць ЖКГ, то яно становіцца прычынай нелегальных звалак. Нядаўна адну такую выявілі і ліквідавалі ў межах райцэнтра.

— Заказаць аднаму чалавеку транспарт у ЖКГ для вывазу такіх адходаў — гэта нятанна, — сказаў кіраўнік раёна. — Трэба прапанаваць людзям іншы варыянт. Скласці графік руху буйнагабарытнай тэхнікі, якая зможа забіраць раслінныя і іншыя адходы. За гэта, вядома, прыйдзецца заплаціць, але значна танней, чым па індывідуальнай заяўцы. Нядобрасумленных грамадзян, якія будуць вазіць адходы ў несанкцыянаваныя месцы, неабходна заклікаць да адказнасці. З такімі аматарамі смяціць на прыродзе паспяхова змагаюцца фотапасткі, і колькасць відэакамер у раёне будзе павялічвацца.

Старшыня раённага Савета дэпутатаў Аляксандр Шкадаў паведаміў, што старшыні сельскіх Саветаў таксама праводзяць у гэтых адносінах работу. Так, за адзін тыдзень у Красненскім сельсавеце складзена 26 прадпісанняў аб навядзенні парадку. Вяскоўцам устаноўлены тэрміны для ўборкі смецця і скошвання пустазелля. Калі патрабаванні не будуць выкананы, рашэннем суда можа быць накладзены штраф.

Таксама кіраўнік раённага дэпутацкага корпуса расказаў пра наступствы цыклона з моцным ветрам, які прайшоў на выхадных. Ад жыхароў раёна ў прадстаўніцтва Белдзяржстраху паступіла 53 звароты. Большасць з іх тычылася пашкоджання дахаў на жылых дамах і гаспадарчых пабудовах. Зафіксаваны падзенні дрэў на могілках, аднак надмагільныя помнікі не пашкоджаны. Сельскімі саветамі працягваецца работа па выяўленні аварыйных дрэў.

Генадзій Шатуеў пацікавіўся, як праведзена работа па абследаванні домаўладанняў катэгарыраваных грамадзян напярэдадні халадоў. Па словах намесніка старшыні райвыканкама Яўгена Чычкана, за 9 месяцаў наведана 5026 домаўладанняў, што на 150 больш, чым у мінулым годзе. Спецыялісты пабывалі ў дамах 223 адзінокіх грамадзян, дзе выкарыстоўваецца пячное ацяпленне. Знойдзеныя парушэнні будуць аператыўна ліквідаваны. Асаблівая ўвага была ўдзелена сацыяльна небяспечным сем’ям з непаўналетнімі дзецьмі і  грамадзянам, якія злоўжываюць спіртным.

У раёне набірае тэмпы кампанія па вакцынацыі ад грыпу. Ахоўную прышчэпку ўжо атрымала 627 чалавек. Гэта медыцынскія работнікі, персанал і пастаяльцы Жухавіцкага дома-інтэрната, дзеці. Неўзабаве адбудуцца выезды брыгад для вакцынацыі на прадпрыемствы і ў арганізацыі раёна.

9 кастрычніка ў аб’ектах сацыяльнай сферы ўключылі ацяпленне. Цяпло прыйшло ў дзіцячыя сады, школы, лячэбна-прафілактычныя ўстановы. Функцыянуюць 13 кацельняў. Пасля аб’ектаў сацыяльнай сферы наступныя на чарзе — кватэры і дамы. Для ўключэння ацяплення ў жылфондзе павінны ўсталявацца і пратрымацца пяць дзён сярэднясутачныя 8 градусаў цяпла і ніжэй. Пасля жылога фонду — чарга адміністрацыйных, прамысловых і іншых вытворчых будынкаў.

Іна ЛЕЙКА