Дэпутат Цырынскага сельскага Савета Святлана Русак: «Народны абраннік павінен быць чалавекам, да якога жыхары могуць звярнуцца абсалютна з любым пытаннем»

– Народны абраннік павінен быць чалавекам, да якога жыхары могуць звярнуцца абсалютна з любым пытаннем. Дэпутату часам даводзіцца шукаць выключэнні з правілаў, кіравацца не толькі заканадаўчай базай, але і чалавечымі прынцыпамі, – так лічыць дэпутат Цырынскага сельскага Савета дэпутатаў 28-га склікання  Святлана Русак. Жыхары сельвыканкама неаднаразова аказвалі ёй давер, і менавіта гэта натхняе яе на новыя справы.

– Не заўсёды мы можам самастойна вырашыць праблему, таму наша задача – дастукацца да тых людзей, якія абавязкова дапамогуць. Хай не з першага разу, але тым, хто стукае, заўсёды адчыняюць. Таму лічу, што невырашальных пытанняў не бывае, – гаворыць Святлана Канстанцінаўна.У Цырынскай  выбарчай акрузе  нумар шэсць  78 выбаршчыкаў, якія ўсклалі на яе адказнасць за выкананне іх просьбаў і патрэб.  У большасці гэта пенсіянеры, для якіх зносіны з дэпутатам  сельскага Савета з’яўляюцца інфармацыйным акенцам у свет.

– Пытанні, якія яны падымаюць, стараемся вырашыць на мясцовым узроўні. Гэта, да прыкладу,  добраўпарадкаванне вуліц, вулічнае асвятленне, электразабеспячэнне. Так, апошнім часам па дэпутацкай ініцыятыве  вырашылася  праблема цеплазабеспячэння дома №3 па вул. Завадская ў аграгарадку. Калі пачаўся ацяпляльны сезон, не ва ўсе  кватэры  дома даходзіла  цяпло. Мы звярнуліся  ў Карэліцкае РУП ЖКГ.  Камунальнікі сумесна  са спецыялістамі мясцовай гаспадаркі вырашылі праблему, за што ім вельмі ўдзячныя  жыхары дома, – расказвае  жанчына.

Працуе Святлана Канстанцінаўна загадчыкам Цырынскага Дома культуры, які, без перабольшвання, можна лічыць цэнтрам жыцця сельсавета. Тут жанчына знаходзіцца ў пастаяннай камунікацыі з  жыхарамі. Часта яе дэпутацкая дзейнасць праяўляецца падчас  выязных канцэртаў у аддаленыя ад сельскага Савета вёскі.   Пасля іх заканчэння  жыхары могуць звярнуцца да яе як да дэпутата з набалелымі пытаннямі.  А яны бываюць рознымі. Адны – вырашаюцца на месцы, другія – патрабуюць больш дэталёвага падыходу і абмяркоўваюцца са спецыялістамі сельгаспрадпрыемства “Лукі-Агра”, устаноў, арганізацый мясцовых і раённых, участковым інспектарам. Дэпутату важна пастаянна трымаць руку на пульсе.

— У рабоце дэпутата памочнікамі з’яўляюцца старасты вёсак, якія трымаюць у курсе ўсіх праблем праз мабільную сувязь, а я іх даводжу да ведама старшыні сельскага Савета Аксаны Гомза. Кожны зварот трымаецца на кантролі. Нявырашаныя пытанні падымаюцца на сесіі сельскага Савета.

Я, як абраннік народа, лічу, што галоўнай рухаючай сілай развіцця вёсак з’яўляецца само насельніцтва. Без іх дзейснага ўдзелу навесці ў вёсках парадак, прывесці ў належны выгляд вуліцы, могілкі практычна немагчыма. Таму мы, дэпутаты сельскага Савета, працуем у гэтым напрамку з насельніцтвам. Праводзім сходы грамадзян сумесна са старшынёй сельскага Савета, пераконваем, угаворваем, — давяла суразмоўца.

Праца дэпутата ў акрузе не застаецца незаўважанай. Любыя пачынанні падтрымліваюць выбаршчыкі. Вясной  бягучага года Святлана Русак з’явілася ініцыятарам  устаноўкі ў аграгарадку Цырын каля шматкватэрнага жылога дома № 3 па вуліцы Завадской пясочніцы для дзяцей малодшага дашкольнага ўзросту.

— Летам, калі прыязджаюць унукі,  гэты астравок становіцца месцам прыцягнення і адпачынку. Дзеткі занятыя, ды і  бацькам, і бабулям ёсць месца,  дзе сабрацца разам, — сказала жанчына.

Старшыня сельвыканкама Аксана Гомза адзначыла, што дзякуючы ініцыятыве дэпутацкага корпуса сельвыканкама   сумеснымі намаганнямі жыхароў населеных  пунктаў заўсёды праводзіцца  добраўпарадкаванне прыдамавых тэрыторый,  высаджаны дэкаратыўныя кусты і пладовыя дрэвы,  разбіты кветнікі і клумбы ў аграгарадку Цырын. Але ёсць нявырашаныя пытанні па навядзенні парадку на пустуючых зямельных участках, на прысядзібных участках безгаспадарных дамоў  у аддаленых населеных пунктах. І ў гэтым кірунку праводзіцца работа як сельскім Саветам, так і дэпутатамі: удакладняюцца ўласнікі домаўладанняў, добраўпарадкоўваюцца зямельныя ўчасткі, зносяцца старыя будынкі.Святлана Канстанцінаўна з’яўляецца таксама членам Савета грамадскага пункта аховы правапарадку і прымае самы актыўны ўдзел у яго пасяджэннях.

Адным з прыярытэтных напрамкаў у сваёй дзейнасці дэпутат лічыць працу з моладдзю. З’яўляючыся дырэктарам сельскага Дома культуры, Святлана Канстанцінаўна,  як ніхто іншы, ведае пра патрэбы і магчымасці сучаснай моладзі. Таму тут імкнуцца ўсяляк падтрымліваць любыя творчыя пачынанні рабят, бо старэйшаму пакаленню трэба ўмела наладжваць сувязь з маладымі людзьмі, не настойваць, а дамаўляцца, быць партнёрамі, аказваць уплыў праз сяброўскія ўзаемаадносіны.

— Падчас актыўнага і канструктыўнага дыялогу з маладымі людзьмі неабходна  звяртаць  увагу на тое, што сёння інфармацыя адыгрывае вялікую ролю ў жыцці нашага грамадства. Таму сучасны чалавек павінен умець арыентавацца ў навінавым патоку і адрозніваць фэйкі ад дакладнай інфармацыі, якая паступае з надзейных крыніц. І ў першую чаргу гэта адносіцца да інфармацыі, якая тычыцца найважнейшых грамадска-палітычных падзей, — лічыць яна.

Таксама Святлана Канстанцінаўна ўпэўнена, што пры арганізацыі мітынгаў,  падчас правядзення мерапрыемстваў патрыятычнага накірунку неабходна максімальна задзейнічаць моладзь, бо ў наш час вельмі важная пераемнасць пакаленняў.  Для чалавека з актыўнай грамадзянскай пазіцыяй, на думку  Святланы Русак, няма неістотных момантаў. Важна ўсё, што адбываецца вакол. Знаходзячыся ў пастаянных зносінах з жыхарамі сельсавета, Святлана Канстанцінаўна адзначае, што дэпутацкая праца ёй вельмі падабаецца, таму што служыць людзям — вельмі ганарова і важна. Сёння кожны павінен засвоіць: мала проста марыць і гаварыць аб шчаслівай будучыні. Яе трэба тварыць самім. Закасаўшы рукавы. І мы, дэпутаты, абавязаны данесці да кожнага выбаршчыка: наша сіла ў тым, што мы адзіныя. Разам мы — Беларусь, і разам мы дасягнем большага. Зробім наш агульны дом — родную Беларусь — прыгожым, утульным і багатым, каб у ім было камфортна жыць нам, нашым дзецям і ўнукам.

— Святлана стала для жыхароў аграгарадка сапраўдным  памочнікам, — кажа сяльчанка Ларыса Міхайлаўна Хваль.  — Яна добра ведае, хто з мясцовых жыхароў у чым мае патрэбу, часта  вырашае няпростыя пытанні, звязаныя з некаторымі бытавымі праблемамі, просьбамі аднавяскоўцаў. Неацэнная яе роля і ў інфармаванні жыхароў аб рабоце сельвыканкама і давядзенні да ведама грамадзян рашэнняў, якія прымаюцца органамі мясцовай улады. Па родзе сваёй асноўнай дзейнасці  сама не сумуе і іншым не дае.  Любіць месца, дзе жыве,  гарыць жаданнем зрабіць яго яшчэ прыгажэйшым. Дзякуючы гэтаму вядуцца  работы па добраўпарадкаванні,  ствараюцца зоны адпачынку, прыбаўляецца і дамоў узорнага парадку.

СКАЗАНА
Прэзідэнт Беларусі Аляксандр ЛУКАШЭНКА:
— Мы шчыра і сумленна сказалі, што мы будзем усяляк удзельнічаць у парламенцкіх выбарах. Я маю на ўвазе вертыкаль улады. Гэта вельмі важная кампанія ў Беларусі. Важней палітычнай кампаніі ў будучым годзе няма. Следам жа фарміраванне Усебеларускага народнага сходу, абранне дэлегатаў на гэты сход.
Падчас абмеркавання даклада старшыні Савета Рэспублікі Нацыянальнага сходу Наталлі Качанавай, 9 лістапада 2023 года.

Кацярына КУКАНАВА

Фота аўтара