У ААТ «Карэлічы-Лён» гатоўнасць тэхнікі да пасяўной складае 100%

09.03.2024 2004 Админ

Сезону сельскагаспадарчых работ традыцыйна папярэднічае актыўная падрыхтоўка тэхнікі да палявых работ. І ад таго, наколькі эфектыўнай яна будзе, залежыць не толькі якасць сельгасработ, але і бяспека на дарогах.

Механізатары ААТ «Карэлічы-Лён» Аляксандр Анацкі, Аляксандр Рачынскі і Аляксандр Кныш

Менавіта да пачатку вясновай пасяўной кампаніі прымеркавана правядзенне дзяржаўнага тэхнічнага агляду машынна-трактарнага парку ў сельгаспрадпрыемствах Карэліччыны. Зацверджаны графік, у адпаведнасці з якім усе прадпрыемствы павінны прайсці гэтую працэдуру.

Кожная гаспадарка абавязана падрыхтавацца да прызначанай даты і выставіць трактары і іншую сельскагаспадарчую тэхніку на лінейку гатоўнасці.

На мехдвары ААТ “Карэлічы-Лён” трактары выстраіліся ў адзін шэраг. На першай лініі — энерганасычаныя “Беларусы-3022”. Каля кожнай сельгасмашыны стаяць загадзя падрыхтаваныя медыцынская аптэчка і вогнетушыцель. Механізатары падбадзёрваюць адзін аднаго, але кожны ўпэўнены, што з яго трактарам усё добра, і тэхагляд пройдзе без заўваг.

Камісія правярае знешні стан тэхнікі, спраўнасць рулявой і тармазной сістэм, светлавой і гукавой сігналізацыі, работу маячкоў, наяўнасць вогнетушыцеля і знака аварыйнага прыпынку. Паколькі сельскагаспадарчая тэхніка рухаецца па дарогах агульнага карыстання і з-за сваіх габарытаў стварае перашкоды іншым удзельнікам дарожнага руху, камісія звяртае ўвагу на наяўнасць святловяртальных элементаў.

Праведзеная ААТ “Карэлічы-Лён” работа па падрыхтоўцы тэхнікі атрымала высокую ацэнку спецыялістаў, якія ацэньваюць стан і спраўнасць трактароў.

Уся тэхніка, прадстаўленая да агляду, была спраўнай і камплектнай, не выклікаў нараканняў яе знешні выгляд, усе машыны ўкамплектаваны вогнетушыцелямі, аптэчкамі, пры неабходнасці супрацьадкатнымі ўпорамі.

Па дадзеных упраўлення сельскай гаспадаркі і харчавання Карэліцкага райвыканкама на 6 сакавіка, тэхагляд у сельскагаспадарчых арганізацыях Карэліччыны прайшло 325 трактароў (72,5% ад наяўных, 97% ад агледжаных), з якіх 53 энерганасычаных, 55 пагрузчыкаў, 190 прычэпаў. Не прайшлі тэхагляд 14 адзінак тэхнікі. Асноўныя прычыны, няспраўнасці рулявога ўпраўлення, светлавой і гукавой сігналізацыі, тармазной сістэмы і пашкоджанне лабавога і бакавога шкла.