Урожай ожидают хороший. Как идет уборочная в ГП «Черняховский-Агро» и «Царюка»

— Жніво — літаральна гарачая пара. Падрыхтоўка да ўборачнай кампаніі пачалася яшчэ задоўга да пачатку страды. Да гэтага перыяду мы прапрацавалі вялікую колькасць пытанняў,  як арганізацыйных, так і практычных. Так, сумесна з нашымі сацыяльнымі партнёрамі — мясцовай выканаўчай уладай і наймальнікамі – гаспадаркі цалкам укамплектаваны аптэчкамі і спецвопраткай. Падрыхтаваны санітарна-бытавыя памяшканні. Рэгулярна наведваемся ў сельгасарганізацыі, бо перад прафсаюзамі стаіць сур’ёзная задача – папярэдзіць любыя праблемныя пытанні, якія ўзнікаюць у перыяд уборачнай кампаніі. Гэта і  падвоз харчавання на палі, і арганізацыя пітнога рэжыму ў спякоту, і разлік налічэнняў заработнай платы, — пракаментавала Ірына Леанідаўна.

Адначасовае паспяванне культур патрабуе ад механізатараў

адказнай і зладжанай працы

Першы прыпынак зрабілі на зернесушыльным комплексе “Вялетава” ДП ”Чарняхоўскі-Агра”. Тут нас сустрэла дырэктар гаспадаркі Наталля Дубкова.  Ход уборачных работ на ўсіх участках  знаходзіцца пад пільным  яе наглядам.

— Уборачная кампанія ў сельгаспрадпрыемстве пачалася з уборкі азімага ячменю, які  сёлета парадаваў сваёй ураджайнасцю, — пачала аповед дырэктар. —  Яго клін    складаў  200 гектараў.  Пры  вырошчванні  прытрымліваліся  тэхналогіі: тэрміны, апрацоўка, падкормка — усё рабілася своечасова ў аптымальным аб’ёме. І як вынік — атрыманая ўраджайнасць — 62,5 ц/га,  гэта +12,5 ц/га да мінулага года.  Каб не ўпусціць каштоўны час,   на жніве былі задзейнічаны сем камбайнавых экіпажаў.  Зараз усе намаганні кінуты на ўборку азімага рапсу. Клін алейнай культуры – 500 га. Зжата на 24 ліпеня 394 га, ураджайнасць склала 39 ц/га.  На палях з гэтай культурай задзейнічаны тры камбайны. Механізатары працуюць з максімальнай нагрузкай, паскараючы ход жніва. Прыборы паказваюць 13-працэнтную вільготнасць, што гаворыць аб яго поўным паспяванні. Яшчэ трохі – і рапс можа абсыпацца.  Аналагічная сітуацыя з яравым ячменем. Усе камбайны гаспадаркі зараз у палях, паколькі культуры паспелі адначасова і трэба своечасова іх убраць.

Паралельна з уборкай вядзецца і нарыхтоўка кармоў. Сёлета наша гаспадарка ў гэтым накірунку адна з лепшых. Усяго ўжо нарыхтавана 4101 тон кармоў,  у тым ліку на ўмоўную галаву  буйной рагатай жывёлы 19,93 цэнтнера кармавых адзінак.

– У гэтым годзе ў гаспадарцы рапс што трэба, – адзначаюць   члены аднаго з камбайнавых экіпажаў   Мікалай Скіба і Валерый Шнок. –  Стаіць высокай сцяной. За дзень атрымліваецца намалаціць парадку 5-6 бункераў, кожны з іх у раёне шасці тон. Жняяркі ў камбайнах абсталяваны адмысловымі прыстаўкамі. Нажы  зразаюць рапс знізу і па абодва бакі расліны. Так ураджай не абсыпаецца на зямлю. Такая праца нам па душы, – заўважаюць механізатары. – Ёсць разуменне таго, што робіш важную справу не толькі для раёна, але і краіны ў цэлым, для нашых людзей.

На полі з яравой пшаніцай шчыруе  на КЗС-1218  камбайнавы экіпаж Вадзіма Ракача і Андрэя Людкевіча.

– Працуем як мае быць, трэба ж  убраць у сціслыя тэрміны, без страт. КЗС 1218 – добрая машына, працаваць камфортна нават у гарачае надвор’е, –  гавораць аграрыі. – У поле прыязджаем, як толькі сыходзіць раса. З ёй жа вечарам і глушым камбайн. Наперадзе шмат працы. Разлік на добры ўраджай.

Адзначым, што ў гаспадарцы выкананы ўсе меры супрацьпажарнай прафілактыкі: на полі падчас уборачных работ дзяжурыць прыстасаваная для мэт пажаратушэння тэхніка.

– Рабіць прагнозы ўраджайнасці  не буду, але ўпэўнена магу сказаць, што намалот сёлета павінен быць большы за леташні. Аднак  адным з галоўных фактараў, які паўплывае на канчатковы вынік, будуць умовы надвор’я, – напрыканцы сустрэчы сказала Наталля Дубкова.

Калі дзень год корміць

А мы тым часам трымаем шлях у ДП “Царука”. Надвор’е 16 ліпеня паспрыяла мясцовым аграрыям і да канца рабочага дня  яны завершаць уборку азімага рапсу.  Як адзначыў галоўны аграном гаспадаркі Сяргей Гушчэня, рапсавы клін сёлета склаў 250 га,   ураджайнасць  –  амаль 40 ц/га. На палях з гэтай культурай  былі задзейнічаны чатыры камбайны. Пакуль праца кіпіць на рапсавым полі, аграном не спяшаецца даваць ацэнку ходу жніва. Кажа,  трэба дачакацца, калі ўсё зерне на таках будзе.

– Напружаная пара наперадзе, а надвор’е прымушае сур’ёзна насцярожыцца. Мы бачым высокія паказчыкі дзённай тэмпературы, якая  знаходзіцца на адзнацы 30 градусаў. Як бы гэта не наклікала бяды… Стыхійныя  з’явы надвор’я: навальніцы, ураганны вецер, град часцяком узнікаюць на фоне такіх анамалій. Пасля ўборкі алейнай культуры адразу пачнём убіраць яравы ячмень.  Мы разлічваем у аптымальныя срокі завяршыць жніво, а як складуцца абставіны, вядома толькі нябеснай канцылярыі.

На плячах механізатараў зараз самая адказная задача.  Сямейны экіпаж Дзяніса і  Віктара Буяў гэта добра ведае.  Ужо пятнаццаць гадоў працуюць у гаспадарцы на камбайне   на поўную выкладку: пачынаюць рапсам, а заканчваюць кукурузай. Камбайнеры  кажуць, што трэба быць максімальна засяроджаным: сачыць за ўсім, як працуе тэхніка, яе трэба чуць. Каб камень не злавіць і тым самым пазбегнуць паломкі.  І так без перапынку да самага абеду, які, дарэчы, таксама праходзіць у полі. На першае суп з макаронамі, на другое пюрэ і катлеты. Ну і кампот.

– Харчовая бяспека краіны заключаецца ў нашай ўборцы, у нашай працы. Усё гэта мы ўсведамляем. І стараемся, працуем,  – зазначаюць механізатары.

Кацярына КУКАНАВА

Фота аўтара