В Кореличах на Дне подписчика журналист газеты «Полымя» встретилась с читателями
Стала ўжо добрай традыцыяй кожную пятніцу работнікамі рэдакцыі Карэліцкай раённай газеты “Полымя” праводзіць ў аддзяленні паштовай сувязі г.п. Карэлічы дзень падпісчыка.
18 кастрычніка не стала выключэннем. У аддзяленні раённага вузла сувязі было шматлюдна. Карэспандэнты з радасцю размаўлялі з сябрамі раёнкі, дзяліліся планамі і ідэямі па стварэнні новых праектаў, рубрык. Падпісчыкі са стажам расказвалі, за што на працягу многіх гадоў застаюцца адданымі любімаму выданню, новыя падпісчыкі – пра тое, чаго чакаюць ад супрацоўніцтва з газетай.
Карэліччанкі Наталія Варанко і Ірына Кулевіч адзначылі, што ўжо не адно дзесяцігоддзе неразлучныя з раённай газетай і дадалі:
– Хочам адзначыць, што у апошнія гады газета стала больш насычанай і цікавай. З’явіліся новыя рубрыкі. Гэта значыць, што наша “Полымя“ сталее, мудрэе, умацоўвае свае пазіцыі сярод чытачоў, становіцца добрым дарадчыкам і сапраўдным сябрам. Праз газету даведваемся пра навіны раёна, герояў працы. Падабаецца, калі пра людзей расказваюць не толькі як пра добрых спецыялістаў, але і раскрываюць іх маральныя якасці. Заўсёды цікава даведацца пра невядомыя факты з жыцця знакамітых землякоў. Тым больш, што ў нашым раёне сапраўды ёсць шмат людзей годных таго, каб пра іх пісала газета. Даўгалецця і далейшых поспехаў табе, раёнка!
Жыхарка райцэнтра Ганна Шадрына:
– Раённую газету выпісваю заўсёды. Гэта ўжо традыцыя. Мне падабаецца яе чытаць, бо на яе старонках магу знайсці карысную і цікавую інфармацыю для сябе. Акрамя таго, газета аказвае добрую паслугу – віншаванне. Уявіце, як прыемна прачытаць цёплыя словы і пажаданні ад сваякоў або сяброў, аднакласнікаў.
Хочацца, каб “Полымя» і далей развівалася, цешыла чытачоў цікавымі артыкуламі. Жадаю калектыву рэдакцыі творчых поспехаў!
Кацярына КУКАНАВА
Фота аўтара
