На планерке у председателя. Профилактика пожаров и контроль за питанием детей
На аператыўнай нарадзе ў старшыні Карэліцкага райвыканкама Андрэя Гардзея абмеркавалі прафілактыку пажараў у Карэліцкім раёне. З дакладам выступіў першы намеснік начальніка Карэліцкага РАНС Сяргей Бунчук, які паведаміў, што з пачатку года на Карэліччыне адбылося 15 вогненных здарэнняў, у якіх загінулі тры чалавекі. Аналіз пажараў паказаў, што большасць з іх адбылася па прычынах неасцярожнага абыходжання з агнём і парушэння правіл эксплуатацыі печаў.
Таксама выратавальнік паведаміў, што падчас шырокамаштабнай акцыі па прафілактыцы пажараў і гібелі людзей на працягу тыдня было наведана 418 домаўладанняў. Сярод распаўсюджаных парушэнняў можна выдзеліць неадпаведнасць правілам эксплуатацыі пячнога абсталявання і аўтаномнага пажарнага апавяшчальніка.
Кіраўнік раёна заклікаў усе суб’екты прафілактыкі працаваць комплексна:
— Мы павінны прадугледзець і папярэдзіць усе магчымыя наступствы. Важна працаваць не толькі з самім чалавекам, але і з яго суседзямі, бачыць, чым ён жыве.
Таксама на пасяджэнні было разгледжана пытанне аб арганізацыі харчавання ва ўстановах адукацыі раёна. Намеснік старшыні Карэліцкага райвыканкама Яўген Чычкан паведаміў, што на Карэліччыне вядзецца мэтанакіраваная работа па паляпшэнні якасці харчавання. З 1 верасня 2023 года шэсць устаноў адукацыі раёна перайшлі на новы прынцып арганізацыі харчавання. З 1 верасня 2024 года плануецца паступовы пераход да новага меню астатніх устаноў адукацыі. Ва ўсіх установах агульнай сярэдняй адукацыі раёна распрацавана комплексная сістэма мер, накіраваная на прапаганду здаровага харчавання і фарміраванне правільных харчовых паводзін вучняў.
— У рамках работы пастаянна дзеючай камісіі па кантролі за арганізацыяй харчавання навучэнцаў створана «гарачая лінія» для насельніцтва, куды можа звярнуцца кожны жадаючы і расказаць аб умовах харчавання дзяцей у той ці іншай установе адукацыі, — адзначыў Яўген Мікалаевіч.
Для эфектыўнай работы па арганізацыі харчавання і недапушчэння парушэнняў у красавіку 2024 года была праведзена вытворчая вучоба павароў і кладаўшчыкоў устаноў адукацыі па пытаннях арганізацыі гарачага харчавання.
Сяргей СТОЛЯР
