На Кореличчине выбрали лучших зоотехников-селекционеров, ветврачей-гинекологов и техников-осеменаторов (фото+видео)
Шчырыя, працавітыя, простыя ў словах і вартыя ў справах, удзельнікі раённага конкурсу прафесійнага майстэрства сярод спецыялістаў сельскагаспадарчых арганізацый па ўзнаўленні статка буйной рагатай жывёлы сустрэліся 17 кастрычніка на базе адміністрацыйнага будынка механічных майстэрняў КСУП “Царука” абмяняцца вопытам і ў сумленным спаборніцтве вырашыць, хто сёлета стане лепшым з лепшых у прафесіі.
Такая знакавая падзея для прадстаўнікоў жывёлагодаўчай галіны Карэліччыны – добрая традыцыя яшчэ з савецкай пары. У наш час раённае спаборніцтва праходзіць у адпаведнасці з патрабаваннямі Пастанаўлення Міністэрства сельскай гаспадаркі і харчавання Беларусі “Аб парадку правядзення конкурсу майстэрства сярод работнікаў па штучным асемяненні жывёл” і спрыяе павышэнню прафесійных якасцяў удзельнікаў, удасканаленню тэхналогій, метадаў і прыёмаў у штодзённай працы спецыялістаў, а таксама абагульненню вопыта і абмену ведамі як паміж журы і канкурсантамі, так і між прадстаўнікамі малодшага і старэйшага пакаленняў.
Галоўным арганізатарам конкурсу з’яўляецца Карэліцкі цэнтр селекцыі і генетыкі пры непасрэдным удзеле і актыўнай падтрымцы мясцовых улад, сельгаспрадпрыемстваў і райкама прафсаюза работнікаў АПК.
Сёлета прайсці выпрабаванне прафесіяй вырашылі 30 удзельнікаў, па 10 чалавек у трох асноўных катэгорыях: заатэхнікі-селекцыянеры, ветэрынарныя ўрачы-гінеколагі, тэхнікі-асемянатары. Калі для першых дзвюх груп конкурс уяўляў сабою вусны іспыт з адказам на 3 пытанні білета, то для асемянатараў ён быў абсалютна практычным: сваё майстэрства яны даказвалі словам і справай на імправізаваным працоўным месцы з усімі неабходнымі прыладамі і абсталяваннем.
Пытанні і каментарыі падчас конкурсу гучалі сур’ёзныя, рацыянальныя і надзённыя, а журы прадстаўлялі выключныя прафесіяналы: першы намеснік начальніка ўпраўлення сельскай гаспадаркі і харчавання Карэліцкага райвыканкама Аляксандр Мікалаевіч Манько і галоўны заатэхнік-селекцыянер РУСП “Гродзенскае племпрадпрыемства” Ларыса Віктараўна Бекіш (секцыя тэхнікі-асемянатары); намеснік начальніка аддзела арганізацыі вытворчасці і механізацыі ўпраўлення сельскай гаспадаркі і харчавання Карэліцкага райвыканкама Валянціна Паўлаўна Манько і галоўны заатэхнік-селекцыянер РУСП “Гродзенскае племпрадпрыемства” Лілія Венядзіктаўна Жук (секцыя заатэхнікі-селекцыянеры); вядучы ветэрынарны ўрач-гінеколаг Карэліцкай райветстанцыі Віктар Віктаравіч Калбаска і вядучы заатэхнік-селекцыянер Карэліцкага цэнтра селекцыі і генетыкі Георгій Анатольевіч Курак (секцыя ветэрынарныя ўрачы-гінеколагі).
Першы намеснік старшыні Карэліцкага райвыканкама, начальнік упраўлення сельскай гаспадаркі і харчавання Анатоль Мікалаевіч Коршун прыняў удзел у працы ўсіх трох секцый, выступіўшы як у ролі прадстаўніка журы, так і дарадчыка для канкурсантаў. У сваёй прывітальнай прамове ён адзначыў: “Сёння Гродзенская вобласць займае лідзіруючыя пазіцыі ў жывёлагадоўчай галіне краіны. І прыемна, што Карэліцкі раён дэманструе добрыя паказчыкі працы ў рэгіёне. Часта зусім не ў цяплічных умовах нашы спецыялісты дасягаюць высокіх вынікаў. Нам ёсць чым ганарыцца і куды імкнуцца. Таму падчас нашага конкурсу я жадаю ўсім, так як тут сабраліся лепшыя, зрабіць самыя каштоўныя інвестыцыі ў будучыню – абмяняцца вопытам і набыць нешта новае для сябе ў плане ведаў”.
Таксама пажадалі эфектыўнага дыялога ў межах раённага спаборніцтва, прафесійных набыткаў і плённай працы ўдзельнікам і журы дырэктар Карэліцкага цэнтра селекцыі і генетыкі Галіна Георгіеўна Карп і старшыня КСУП “Царука” Аляксандр Мікалаевіч Лейка.
? Так усё і сталася: конкурс атрымаўся маштабным, матывіруючым і прадуктыўным. А прызавыя месцы размеркаваліся наступным чынам. Сярод заатэхнікаў-селекцыянераў перамогу святкаваў Мікалай Канстанцінавіч Шастак (СВК “Свіцязянка-2003”), на другім месцы – Анастасія Антонаўна Філатава (СВК “Маяк-Заполле”), на трэцім – Наталля Аляксандраўна Зайцава (ДП “Царука”). Лепшым з ветэрынарных урачоў-гінеколагаў быў прызнаны Уладзімір Барысавіч Борыс (СВК “Свіцязянка-2003”), другое месца заняў Сяргей Леанідавіч Кузьміч (СВК “Жухавічы”), трэцяе – Валерый Васільевіч Чубрык (СВК “Маяк-Заполле”). Прафесіянал нумар адзін сярод тэхнікаў-асемянатараў сёлета – Марына Аляксандраўна Трусевіч (СВК “Маяк-Заполле”), другое месца – у Сяргея Віктаравіча Ложачніка (СВК “Жухавічы”), трэцяе – у Вікторыі Валер’еўны Юшкевіч (КСУП “Птушкафабрыка “Чырвонаармейская”).
Але не толькі пераможцы былі адзначаны дыпломамі і каштоўнымі падарункамі. Усе ўдзельнікі атрымалі граматы і прызы. А цудоўнымі дапаўненнямі да ўрачыстай заключнай часткі раённага конкурсу стаў з любоўю прыгатаваны паварамі ДП “Царука” смачны абед і канцэрт артыстаў аддзела культуры і дасуга “Ярэміцкі ДК”, арганізаваны райкамам прафсаюза работнікаў АПК і душэўна праведзены яго старшынёй Ірынай Леанідаўнай Пянькоўскай.
Марына КАЗЛОВІЧ
Фота і відэа аўтара
??? ФОТАГАЛЕРЭЯ ???
