Прадстаўнікі музея «Замкавы комплекс «Мір» і Карэліцкай раённай бібліятэкі дзеляцца ўражаннямі ад плённай паездкі на XXVII Мінскую міжнародную кніжную выставу-кірмаш

Лілія Арцюх разам з прадстаўнікамі Беларускай бібліятэчнай асацыяцыі

? Лілія АРЦЮХ,
дырэктар Карэліцкай раённай бібліятэкі:

– Практычна кожны год супрацоўнікі Карэліцкай раённай бібліятэкі наведваюць Мінскую міжнародную кніжную выставу-кірмаш, каб пазнаёміцца з навінкамі літаратуры беларускіх і замежных выдавецтваў, іх прадстаўнікамі, а таксама з літаратарамі. Сёлета адзін з самых буйных кніжных форумаў на постсавецкай прасторы прайшоў ужо ў 27 раз з 5 па 9 лютага і запомніўся шэрагам падзей.

Нам давялося трапіць у сапраўдны паэтычны аўтобус, які курсіраваў у раёне станцыі метро Няміга і праспекта Пераможцаў. Ён быў тэматычна ўпрыгожаны плакатамі з выявамі класікаў беларускай літаратуры. Тут ужывую можна было спаткаць сучасных паэтаў і пісьменнікаў, пачуць бардаўскія песні ды і самім прадэкламаваць што-небудзь з айчынных твораў.

Сама выстава-кірмаш яшчэ больш уразіла нас. Мы здолелі наведаць шматлікія пляцоўкі і пазначылі, якімі выданнямі хацелі бы папоўніць фонды бібліятэк раёна. Парадавалі і прэзентацыі, у асаблівасці дзіцячага аўтара Кацярыны Хадасевіч-Лісавой, паэта і празаіка Святланы Быкавай.

Цікава было пазнаёміцца з кнігамі і праектамі, якія прадстаўлялі выдавецтвы Расіі і ЗША. У прыватнасці, нашы ўсходнія суседзі прывезлі з сабой акцыю, падчас якой можна было напісаць салдацкае пісьмо, дзе паўдзельнічала наш бібліятэкар Ларыса Уладзіміраўна Кузьміч.

Бібліятэкар Ларыса Кузьміч

Шыкоўна прайшла прэзентацыя факсімільнага выдання Берасцейскай Бібліі, арганізаваная Нацыянальнай бібліятэкай Беларусі. Затрымаліся мы і каля стэнду калег з Барысаўскай раённай бібліятэкі, дзе падзівіліся на праект “Аўтограф на памяць”. А надзённыя пытанні нашай сферы абмеркавалі з прадстаўнікамі Беларускай бібліятэчнай асацыяцыі.

Плённай выдалася для нас выстава-кірмаш і на наладжванне кантактаў, бо сёлета ў нас наперадзе ІІ Міжрэгіянальны фестываль “PROдвижение КНИГИ. Библиотечные ступени” ў г.п. Карэлічы, і хочацца парадаваць яго гасцей яркімі сустрэчамі з выдаўцамі і літаратарамі.

Беларускі гісторык Вольга Папко і незалежны даследчык Анатолій Сініла

? Ігар ЛОЖАЧНІК,
вучоны сакратар установы “Музей “Замкавы комплекс Мір”:

– Сёлета ўдзел у адным з найбуйнейшых форумаў Беларусі прынялі трыццаць краін, якія прадставілі больш за чатырыста экспанентаў. Вядома, не застаўся ў баку і наш комплекс, які з’яўляецца пастаянным удзельнікам кніжнай выставы, пачынаючы з 2016 года.

У гэтым годзе мы прапанавалі на суд народнага журы адразу дзве навінкі, якія выдадзены менавіта нашым музеем. Гаворка ідзе аб зборніку матэрыялаў міжнароднай навукова-практычнай канферэнцыі “Рэстаўрацыя гісторыка-культурных каштоўнасцей: сучасны стан і перспектывы развіцця” і “Зборы мінскіх музеяў у картатэцы ўласнасці мастацкіх аб’ектаў (1945-1952) Мюнхенскага цэнтральнага зборнага пункта” Анатолія Сінілы.

Дарэчы, на нашым стэндзе, які размяшчаўся акурат каля галоўнага ўваходу, была арганізавана аўтограф-сесія з аўтарам, дзе кожны жадаючы мог задаць пытанні і атрымаць адказ з першых вуснаў.

Увогуле, я лічу, што Мінская міжнародная кніжная выстава-кірмаш – гэта цудоўная магчымасць прадэманстраваць свае выдавецкія дасягненні і наладзіць кантакты з прадстаўнікамі друку сусветнага рынку.

Падрыхтавалі Марына КАЗЛОВІЧ і Вікторыя КАСЦЮК
Фота прадастаўлена ўдзельнікамі апытання