В Кореличской центральной районной больнице введена в эксплуатацию резервная кислородная станция

Новая рэзервовая кіслародная станцыя абсталявана і ўведзена ў эксплуатацыю ў Карэліцкай цэнтральнай раённай бальніцы, якая забяспечыць бесперапынную падачу кіслароду ў аддзяленні ў выпадку паломкі асноўнай.

— Нагрузка на асноўнае абсталяванне ў перыяд пандэміі значна ўзрасла, бо на лячэнні час ад часу знаходзіцца шмат кіслародазалежных пацыентаў. І праца яго павінна быць бесперабойнай. На выпадак любых непаладак або правядзення бягучага тэхабслугоўвання ў нас зараз ёсць рэзервовая кіслародная станцыя, — расказвае галоўны ўрач Карэліцкай ЦРБ Данута Скварада. — Кошт рэзервовай кіслароднай станцыі — 25 тысяч беларускіх рублёў. Набыта яна за кошт спонсарскай дапамогі, аказанай бальніцы музеем «Замкавы комплекс «Мір», Беларускім прафсаюзам работнікаў аховы здароўя, ААТ «Малочная кампанія Навагрудскія Дары», СВК «Свіцязянка-2003», СВК «Жухавічы» і ДП «Малюшычы», за што ім шчырая ўдзячнасць.

Аб’ёмы спажывання медыцынскага кіслароду ва ўстанове сведчаць аб агрэсіўнасці каранавіруса і маштабах захворвання. Калі ў першую хвалю расход складаў 20 балонаў у суткі (800 л кіслароду), то ў цяперашні пікавы перыяд — 40 (1600 л кіслароду).

— Безумоўна, працаваць з новай станцыяй стала значна зручней, — гаворыць інжынер райбальніцы Уладзімір Тарас. — На старой станцыі падчас усплескаў захворвання COVID-19 аператару Сяргею Зайцу даводзілася двойчы за ноч замяняць балоны, а магутнасцяў новай хопіць, каб бесперабойна працаваць на працягу 4 сутак.

— Увесь свет аб’яднаўся ў барацьбе з пандэміяй, і наш раён не выключэнне. Райвыканкам, арганізацыі і прадпрыемствы, медработнікі і проста нераўнадушныя людзі робяць усё, каб паставіць заслон небяспечнаму вірусу, — адзначае Данута Скварада.

Іна ЛЕЙКА

Фота аўтара