Шматдзетная сям’я Сіроціных з аграгарадка Райца: “Уласны дом, любімая праца і вялікая сям’я – залог шчаслівага жыцця”
Маладая сям’я Дзмітрыя і Галіны Сіроціных жыве ў Карэліцкім раёне ўжо 18 гадоў. Галіна і Дзмітрый родам з Навагрудскага раёна, вучыліся разам у Валеўскай сярэдняй школе. Пасля яе заканчэння паехалі на вучобу ў Карэліцкі дзяржаўны будаўнічы ліцэй, юнака даволі хутка прызвалі на службу ў армію, а па вяртанні пара ўбачыла адзін аднаго ўжо па-новаму. У 2004 годзе яны ажаніліся, а праз 5 гадоў пераехалі ў Райцу. Цяпер Дзмітрый працуе ў СВК «Свіцязянка-2003» трактарыстам-машыністам, а Галіна знаходзіцца ў дэкрэтным водпуску, раней працавала таксама ў гаспадарцы памочнікам брыгадзіра. У маладой пары трое дзяцей, усе прыгажуні-дачушкі.
Старэйшая Паліна сапраўдны прыклад для пераймання. Дзяўчына вучыцца ў 11 класе, вельмі ўпэўненая ў сабе, мэтанакіраваная, вучыцца добра, марыць паступіць ва ўніверсітэт і ў будучым стаць трэнерам або настаўнікам фізічнай культуры. Сярэдняя Арына вельмі адрозніваецца ад сястры па характары, яна вучыцца ў 6 класе, дзяўчынка вельмі сціплая, але захопленая творчасцю, кожную вольную хвіліну яна аддае маляванню і рукадзеллю, марыць стаць мастаком. Малодшай Уладзіславе толькі споўнілася паўгода, але бацькоў яна пакарае сваёй прыгажосцю і развіццём.
– Такая вялікая і дружная сям’я – гэта вялікае шчасце, – падзялілася Галіна. – Увесь год мы праводзім разам, нам хапае ў вёсцы ўсяго, аб чым толькі можна марыць. Кожны дзень у нас ёсць падставы для радасці. Вясной на вуліцы такая прыгажосць, Вялікдзень, пачынаюцца працы па гаспадарцы, улетку цёпла, радасць, усё вакол квітнее і радуе вока, восенню вакол непаўторныя пейзажы, ураджай, а зіма — і зусім суцэльнае свята: ва ўсёй сям’і, акрамя малодшай дачушкі, дні нараджэння, а яшчэ Каляды, Новы год — не засумуеш. Мы любім удзельнічаць з нашымі дзяўчынкамі ў школьных спаборніцтвах «Мама, тата, я – спартыўная сям’я» і заўсёды ва ўсім іх падтрымліваем. У нас ёсць абавязковая сямейная традыцыя – вячэраем мы заўсёды разам. Велізарны плюс у тым, што кожны член сям’і адзін аднаму гатовы прыйсці на дапамогу, падтрымаць, зрабіць хатнія справы. Наш тата вучыць дзяўчынак браць прыклад з мамы, сам паказвае ўзор сапраўднага мужчыны. Кожнае свята ўсе жанчыны ў доме атрымліваюць букеты кветак і чуюць шмат кампліментаў. Для нас жыццё ў вёсцы – усвядомлены выбар, сваю гаспадарку і дом мы не прамяняем ні на што.
Наталля САКАЛЯНСКАЯ
Фота аўтара
