У Карэліцкім раёне прайшла раённая спартландыя “Тата, мама, я – спартыўная сям’я” (+відэа)
На базе ДУА “Турэцкая сярэдняя школа” ў чарговы раз прайшла раённая спартландыя “Тата, мама, я – спартыўная сям’я” сярод сем’яў Карэліччыны, арганізаваная фізкультурна-спартыўным клубам раёна.
“У здаровым целе – здаровы дух”, “Рух – гэта жыццё”, напэўна, мы не знойдзем чалавека, які б ні пагадзіўся з гэтымі выказваннямі. Спорт умацоўвае здароўе чалавека, фарміруе характар, развівае сілу волі, імкненне да перамогі, уменне пераадольваць перашкоды, ставіць мэты і дасягаць іх. Акрамя таго, гэта выдатны адпачынак. У апошні час спорт стаў важнай часткай жыцця грамадства.
А што такое сапраўдная моцная і дружная сям’я, у якой усе дапамагаюць адзін аднаму, радуюцца сумесным поспехам і аказваюць падтрымку ў цяжкую хвіліну, з лёгкасцю прадэманстравалі ўдзельнікі спатрыўнага свята “Мама, тата, я – спартыўная сям’я”. У рамках спартакіяды былі праведзены спаборніцтвы па дарсце, падцягванне на высокай перакладзіне, згінанне і разгінанне рук са становішча лежачы, чаўночны бег, вядзенне тэніснага і баскетбольнага мяча, скачкі ў мяшку, у даўжыню з месца і лёгкаатлетычная эстафета.
Памерацца спартыўнай падрыхтоўкай, зарадзіцца добрым настроем і проста правесці час з карысцю сабраліся 35 сем’яў. Таты, мамы і дзеці з азартам прымалі ўдзел у спартыўных конкурсах, дзе патрабаваліся спартыўны спрыт, згуртаванасць і воля да перамогі. Поспех каманды залежаў ад скорасці і лоўкасці як дзяцей, так і дарослых. Таму балелі і перажывалі адзін за аднаго ўсё. Барацьба была сапраўднай, суддзі — справядлівымі, а гледачы і балельшчыкі — шчырымі.
Гэтае спартыўнае свята паказала, што мамы, таты і дзеці ўмеюць спаборнічаць як адна каманда: з запалам, весялосцю і падтрымкай адзін аднаго.
Лепшыя спартыўныя сем’і вызначыліся па найбольшай суме занятых месцаў ва ўсіх відах праграмы.
Усе ўдзельнікі атрымалі мноства эмоцый, а пераможцы адзначаны граматамі і падарункамі.
Кацярына КУКАНАВА
Фота аўтара
