Кореличская РО ОСВОД напоминает, как избежать трагедии на воде

На двары стаіць анамальная спякота, таму людзі імкнуцца адпачыць каля вады. Рэкі і азёры — блакітная скарбонка Беларусі — маняць нас сваёй свежасцю і прахалодай. Бавячы час каля вадаёмаў, неабходна памятаць правілы бяспекі, каб адпачынак не абярнуўся трагедыяй.

— З 15 па 21 ліпеня 2024 года на вадаёмах Беларусі выратавана 17 чалавек, з якіх 5 непаўналетніх, — прыводзіць лічбы старшыня Карэліцкай РА АСВОД Аляксандр Кандрусік. — За гэты перыяд патанулі 25 чалавек. На жаль, найбольшая колькасць загінулых у Гродзенскай і Брэсцкай абласцях, дзе патанулі па пяць чалавек.

Па інфармацыі АСВОД, з пачатку бягучага года выратавана 162 чалавекі, 48 з якіх — непаўналетнія. За гэты перыяд вада забрала жыцці 231 чалавека, у тым ліку 17 непаўналетніх.

— Большасць з іх, 108 чалавек, загінула пры падзенні ў ваду, — каменціруе Аляксандр Кандрусік. — 69 чалавек патанулі падчас купання. Таму АСВОД нагадвае асноўныя правілы паводзін на вадаёмах: купацца ў вадзе доўгі час нельга — можна лёгка прастудзіцца. Калі вы адчуваеце дрыжыкі, неадкладна выходзьце з вады і зрабіце кароткую, але энергічную прабежку па беразе.

Працягласць купання залежыць ад тэмпературы паветра і вады, ад вільготнасці паветра і сілы ветру. Найбольш спрыяльныя ўмовы купання — яснае зацішнае надвор’е, тэмпература паветра +25 °C і больш. Пачынаць купанне варта пры тэмпературы вады не ніжэй +18 °С.

Рэкамендуецца купацца не раней чым праз 1,5 гадзіны пасля ежы.

Памятайце:

• купацца можна толькі ў дазволеных месцах;
• нельга ныраць у незнаёмых месцах — на дне могуць апынуцца бярвёны, камяні, карчы;
• не варта купацца ў забалочаных месцах і там, дзе ёсць ціна;
• ні ў якім разе нельга плаваць на надзіманых матрацах і цацках, аўтамабільных камерах — падручны сродак можа апынуцца няспраўным, парвацца, чалавек раптам апынецца ў вадзе, а гэта вельмі небяспечна нават для таго, хто ўмее добра плаваць;
• нельга чапляцца за лодкі, вылазіць на знакі навігацыйнага абсталявання (бакены, буйкі і т. д.);
• нельга заплываць за буйкі, якія абмяжоўваюць зону заплыву, і выплываць на фарватэр;
• калі вы апынуліся ў вадзе на моцнай плыні, не спрабуйце плыць ёй насустрач, бо сіл не хопіць; у гэтым выпадку трэба плыць па плыні, але так, каб паступова набліжацца да берага;
• не саромейцеся паклікаць на дапамогу таварышаў;
• нельга падаваць крыкі лжывай трывогі.

— Самае галоўнае, што неабходна памятаць, — непаўналетнія павінны знаходзіцца каля вады толькі пад пільным наглядам бацькоў, — акцэнтуе ўвагу Аляксандр Кандрусік.

Сяргей СТОЛЯР