Кореличчина одевается в новый асфальт
358 тысяч рублёў было выдаткавана ў бягучым годзе на суцэльнае асфальтаванне. Дзякуючы прыцягненню сродкаў абласнога (200 тыс.) і раённага (158 тыс.) бюджэтаў на Карэліччыне па суцэльным асфальтаванні дваравых тэрыторый адрамантавана амаль 290 пагонных метраў дарог. Такую інфармацыю журналісту газеты “Полымя” паведаміў намеснік начальніка ўпраўлення жыллёва-камунальнай гаспадаркі, архітэктуры і будаўніцтва Карэліцкага райвыканкама Васілій Александроў.
Добраўпарадкаванню дарог на Карэліччыне сёлета надалі асаблівую ўвагу і накіравалі на яго важкую частку раённага бюджэту. Акрамя сезоннага ямачнага рамонту, які не бяром у разлік, у райцэнтры абнавілі дарожнае пакрыццё на шэрагу вуліц і дваровых тэрыторый. Калі раней рамонт участкаў вуліц праводзіўся па большай частцы ямачны, то зараз прыярытэт аддаецца суцэльнаму асфальтаванню. Кладка асфальтабетоннага пакрыцця па ўсёй шырыні хоць і больш затратная, але ў доўгатэрміновым перыядзе эканамічна мэтазгодней.
Укладка асфальта ў вёсцы Застадолле
Якія ж вуліцы і іх участкі былі адрамантаваны ў бягучым годзе? На вуліцы Чырвонаармейская, што ў райцэнтры, знаходзяцца важныя аб’екты: Карэліцкае РУП ЖКГ, Карэліцкі філіял КУП па забеспячэнні палівам Гроднааблпаліва.
Адрамантаваная вуліца Савецкая ў г.п. Карэлічы
Да таго ж яна перакрыжоўваецца з вуліцай Савецкай, на якой знаходзіцца сярэдняя школа № 2 райцэнтра. Таму пешаходаў і вадзіцеляў на ўчастках гэтых дарог заўсёды шмат. А вось якаснай дарогі з тратуарам, відавочна, не хапала. Гэтым летам адказныя арганізацыі прыступілі да доўгачаканага добраўпарадкавання вуліц. Асфальтаванне ўчасткаў вуліц ужо завяршылі.
Нанясенне папераджальных знакаў “Школа”, “Асцярожна: дзеці” на вуліцы Савецкая ў г.п. Карэлічы
Каля школы нанеслі папераджальныя знакі “Школа”, “Асцярожна: дзеці”, замянілі тратуарную плітку пешаходнай дарожкі па вуліцы Савецкай. На вуліцы Чырвонаармейская прыступілі да ўстаноўкі бардзюрнага камня. Таксама ў Карэлічах пасля рамонту змянілася дарожнае пакрыццё вуліцы Раманаўка.
Абнаўленне перакрыжавання вуліцы Раманаўка ў г.п. Карэлічы
Акрамя таго, у бягучым годзе былі адрамантаваны дваравыя тэрыторыі па вуліцах Гагарына, Прытыцкага, якая мяжуе з вул. Савецкай. Тыя, хто жыве ў гэтых дварах, сапраўды радуюцца і працягваюць наводзіць прыгажосць каля дамоў. Паглядзіш направа — там адна клумба радуе вока прыгажосцю, зірнеш налева, а там яшчэ больш кветак расце.
Жыхарка дома № 25 па вул. Савецкай Святлана Шымко падзялілася:
— Мы чакалі гэтай падзеі, а цяпер такую прыгажосць і камфорт нам тут зрабілі. Закаталі асфальтам усё па перыметры: праезды, паркоўкі. Роўнае пакрыццё асфальту падымае настрой вадзіцелям, па-свойму радуюцца “абноўцы” дзеці і маладыя мамы, якім стала камфортна і зручна гуляць з малымі дзецьмі.
Дваровая тэрыторыя па вуліцы Прытыцкага ў г.п. Карэлічы
Жыхарка дома 4а па вул. Гагарына Наталля Лось дала сваю ацэнку:
— Са з’яўленнем новага асфальтаванага пакрыцця каля нашага дома ўсе яго жыхары адчулі паляпшэнне камфортнасці пражывання. Цяпер уладальнікі аўтамабіляў могуць упэўнена заязджаць у двор па новай дарозе. А ідучы па новай дарозе мы будзем успамінаць добрым словам усіх, хто меў дачыненне да гэтай падзеі. Няхай іх справы на карысць людзей будуць праходзіць з такой жа высокай ацэнкай і прыносіць толькі станоўчыя вынікі.
Дваровая тэрыторыя па вуліцы Гагарына ў г.п. Карэлічы
Ездзіць па абноўленых вуліцах і дварах стала нашмат камфортней, і кіроўцы гэта, безумоўна, адчулі. Аб’ём работ па суцэльным асфальтаванні дваравых тэрыторый склаў 1,649 тысячы кв.м. Ён выкананы на 100% ад плана. У гэтым годзе добраўпарадкаванне тратуара будзе праведзена на вуліцы Фаменкі.
Кацярына КУКАНАВА
Фота аўтара
