Работа ўстаноў адукацыі з матываванымі навучэнцамі стала адной з тэм нарады, у якой прынялі ўдзел старшыня Карэліцкага райвыканкама Андрэй Гардзей, начальнік аддзела адукацыі райвыканкама Ірына Асташэвіч, дырэктары і кіраўнікі алімпіядных груп устаноў адукацыі раёна.
Праца з таленавітымі і здольнымі дзецьмі, іх пошук, выяўленне і развіццё – найважнейшы аспект дзейнасці ўстаноў адукацыі. Як працуе адукацыйная сфера Карэліччыны з высокаматываванымі дзецьмі, расказала Ірына Асташэвіч:
– У раёне створана пэўная сістэма працы з высокаматываванымі дзецьмі, якая праводзіцца на працягу навучальнага года. Асноўныя яе накірункі – уключэнне навучэнцаў у даследчую дзейнасць, арганізацыя алімпіяднага руху. Падрыхтоўка алімпіяднікаў ажыццяўляецца праз работу алімпіядных груп, індывідуальную работу, арганізацыю факультатыўных і стымулюючых заняткаў у пазаўрочны час. У цяперашні час ва ўстановах адукацыі функцыянуе 89 алімпіядных груп з ахопам 335 навучэнцаў III-XI класаў. У падрыхтоўцы да алімпіяд задзейнічана 72 педагогі.
Важным напрамкам дзейнасці з'яўляецца арганізацыя і правядзенне школьнага і раённага этапаў прадметных алімпіяд. Так, 15-16, 22-23 лістапада 2025 года 125 юных карэліччан з дзевяці ўстаноў агульнай сярэдняй адукацыі прынялі ўдзел у другім (раённым) этапе рэспубліканскай алімпіяды па 12 вучэбных прадметах з 18 магчымых.
Пераможцамі сталі 35 навучэнцаў (у 2024 г. – 32) з пяці ўстаноў агульнай сярэдняй адукацыі. 18 навучэнцаў узнагароджаны дыпломамі I ступені, 11 – дыпломамі II ступені, 10 – дыпломамі III ступені. Лідзіруючыя пазіцыі займаюць ДУА “Сярэдняя школа № 1 г.п. Карэлічы”, ДУА “Сярэдняя школа № 2 г.п. Карэлічы” і ДУА “Сярэдняя школа г. п. Мір імя Г.І. Сташэўскай”.
Старшыня райвыканкама Андрэй Гардзей адзначыў станоўчыя моманты дзейнасці і звярнуў увагу на пытанні, якія патрабуюць рашэння.
Прыйшлі да высновы, што ўраёне створаны належныя ўмовы для выяўлення і развіцця высокаматываваных вучняў. А праца па развіцці адоранай асобы становіцца паспяховай тады, калі яна мае сістэмны характар, аб'ядноўваючы намаганні ўсіх зацікаўленых: адміністрацыі ўстаноў адукацыі, педагогаў, навучэнцаў і іх законных прадстаўнікоў.
