“Аптэка трымаецца на чатырох “кітах”, —
лічыць Ніна Мікалаеўна КРАСКОЎСКАЯ
Ва ўсе часы ахоўваць здароўе чалавека закліканы ўрач і фармацэўт. Вытворца выпускае медыкаменты, урач назначае і выпісвае рэцэпт, а аптэкары забяспечваюць наяўнасць лекавых прэпаратаў у патрэбным месцы, па нізкім кошце і выдатнай якасці.
Якімі паказчыкамі ў працы сустракаюць прафесійнае свята аптэчныя работнікі раёна, журналіст гутарыць з загадчыкам ЦРА № 65 Карэліцкага раёна Гродзенскага гандлёва-вытворчага рэспубліканскага ўнітарнага прадпрыемства “Фармацыя” Нінай Мікалаеўнай КРАСКОЎСКАЙ.
— Ніна Мікалаеўна, што ўяўляе сабой аптэчная сетка раёна, і ці задавальняе матэрыяльна-тэхнічная база?
— У раёне функцыянуюць восем аптэк дзяржаўнай формы ўласнасці. У 2016 годзе плануецца адкрыць новую аптэку ў раённым цэнтры.
Матэрыяльна-тэхнічная база аптэчных арганізацый раёна з года ў год абнаўляецца. У 2015 годзе было выканана рамонтных работ на суму 400 мільёнаў рублёў. Ад гэтага выйгралі як наведвальнікі, так і аптэкары: першым прыемна заходзіць у сучасныя залы, другім працаваць у добрых умовах.
Практычна ва ўсіх аптэках устаноўлены камп’ютары з праграмай “Белорусская аптека”. Маецца тэрмінальнае абсталяванне. Укараненне гэтай праграмы значна палепшыла нашу работу па ўліку і водпуску лекавых сродкаў, пры правядзенні інвентарызацыі і пераацэнцы лякарстваў.
— Скажыце, ці існуюць ільготы для наведвальнікаў аптэчнай сеткі?
— Так, запраграміраваны скідкі. Па-першае, пастаянная 5-працэнтная — для сацыяльных слаёў насельніцтва на айчынныя прэпараты. Яны адпускаюцца пры прад’яўляенні дакумента, які пацвярджае асобу. Па-другое, наведвальнікі аптэкі атрымліваюць скідку ў памеры 5 працэнтаў таксама тады, калі набудуць тавары беларускай вытворчасці на суму больш 250 тысяч рублёў. Па-трэцяе, да святочных дат дзейнічалі сезонныя скідкі: у сакавіку-красавіку на біялагічна актыўныя дабаўкі і вырабы медназначэння. Скідкі прадастаўляюцца ўтрымальнікам банкаўскіх картак “Моцная картка”. Акрамя таго, можна разлічвацца банкаўскай карткай “Халва”.
— На якія накірункі паўсядзённай дзейнасці звяртаеце найбольшую ўвагу?
— Хочацца адзначыць, што ўсе накірункі важныя. Прэзідэнтам краіны даведзены паказчык па рэалізацыі лекавых сродкаў айчыннай вытворчасці больш 50 працэнтаў, і яго мы выконваем. Нагадаю адну з сацыяльных функцый: лекавае забеспячэнне ў сельскіх населенных пунктах. Пры ўсіх амбулаторыях урача агульнай практыкі раёна функцыянуюць аптэкі 4-ай і 5-ай катэгорый.
— Ваша праца няпростая і адказная. Што дапамагае апраўдваць высокае званне аптэкара?
— Існуе меркаванне, што добрая аптэка трымаецца на чатырох “кітах”: уважлівым персанале, якасным абслугоўванні, шырокім асартыменце і ўмераных цэнах. Я поўнасцю раздзяляю гэты пункт погляду, і ў будучым будзем старацца працаваць у гэтым накірунку.
Разам з тым хочацца ўспомніць лозунг: “Кадры вырашаюць усё”. І гэта сапраўды так. Дзякуючы зладжанай рабоце калектыву дасягаем добрых фінансава-эканамічных паказчыкаў і стараемся ветліва абслугоўваць кліентаў.
Штогод на працу ў аптэчную сетку раёна прыходзяць маладыя спецыялісты. Стараннымі адносінамі да справы вызначаецца Ксенія Юр’еўна Грэсь — загадчыца аптэкі 3-яй катэгорыі № 58 г. п. Мір, а Валерыя Юр’еўна Грабавікова і Наталля Андрэеўна Каладзінская паспяхова асвойваюць прафесію фармацэўта-рэцэптара ў ЦРА № 65 г. п. Карэлічы.
— Дзе рыхтуюць фармацэўтычныя кадры?
— Атрымаць вышэйшую адукацыю можна ў Віцебскім дзяржаўным ордэна Дружбы народаў медыцынскім універсітэце і Беларускім дзяржаўным медыцынскім універсітэце, а сярэднюю спецыяльную — у Магілёўскім дзяржаўным медыцынскім каледжы і Беларускім дзяржаўным медыцынскім каледжы.
Гродзенскае РУП “Фармацыя” запрашае выпускнікоў сярэдніх школ вобласці для ўдзелу ў мэтавым конкурсе на фармацэўтычным факультэце ўстаноў адукацыі па спецыяльнасці “фармацыя” і заключэнні дагавора на мэтавую падрыхтоўку спецыяліста.
— Ніна Мікалаеўна, з нагоды прафесійнага свята вашы пажаданні калегам па працы.
— Хочацца выказаць словы ўдзячнасці ўсім аптэчным работнікам за працу, прафесіяналізм, высокае пачуццё адказнасці, добрыя адносіны да кліентаў. Сваё прафесійнае свята хочацца раздзяліць таксама з ветэранамі працы, якія шмат гадоў самааддана служылі справе і былі прыкладам для маладога пакалення. Жадаю ўсім моцнага здароўя, удачы, шчасця, заставацца моцнымі духам, любіць і быць любімымі. Няхай збудуцца ўсе запаветныя мары!
Гутарыла
Галіна СМАЛЯНКА.
Фота Караліны КУЧУК.
