Ва ўстанове адукацыі «Карэліцкі дзяржаўны будаўнічы прафесійны ліцэй» праведзены семінар-вучоба ідэалагічнага актыву раёна пад кіраўніцтвам начальніка аддзела ідэалагічнай работы, культуры і па справах моладзі райвыканкама Іны Міхайлаўны Санчук.
Напачатку правядзення семінара яго ўдзельнікам была прапанавана экскурсія па будаўнічым ліцэі. Ідэолагі наведалі кабінет па вывучэнні правілаў дарожнага руху, майстэрні для лабараторна-практычных заняткаў, для будучых электрагазазваршчыкаў, аддзелачнікаў, а таксама інтэрнат, кухню, сталовую. Ва ўстанове створаны неабходныя ўмовы для навучання, пражывання, харчавання навучэнцаў.
Вучоба ідэалагічнага актыву раёна прадоўжылася ў актавай зале ўстановы адукацыі. Яе дырэктар Генадзій Мікалаевіч Арцюх выступіў па асноўнай тэме адзінага дня інфармавання: «Адукацыя — прыярытэтны накірунак сацыяльнай палітыкі беларускай дзяржавы. Арганізацыя шостага школьнага дня. Аб уступнай кампаніі 2017 года.» Як адзначыў прамоўца, у будаўнічым ліцэі актыўна займаюцца прафарыентацыйнай работай. У шосты школьны дзень сюды наведваюцца вучні школ раёна. Яны не толькі знаёмяцца з работай будаўнічага ліцэя, але і пазнаюць азы прафесіі. Праводзяцца спартыўныя і культурныя мерапрыемствы.
Генадзій Мікалаевіч засяродзіў увагу на важнасці будаўнічых спецыяльнасцяў. Пачынаючы працоўны шлях з рабочай прафесіі, маладыя людзі змогуць пераканацца ў правільнасці свайго выбару, а жадаючыя — прадоўжыць адукацыю на завочнай форме навучання. Безумоўна, навыкі будаўнічай прафесіі могуць спатрэбіцца ў жыцці.
Дырэктар будаўнічага ліцэя звярнуўся да ідэолагаў з прапановай: інфармаваць бацькоў пра магчымасць навучання дзяцей у дадзенай установе, а таксама ўзняў пытанне аказання канкрэтнай дапамогі пры працаўладкаванні навучэнцаў падчас праходжання практыкі ў арганізацыях раёна.
Прадаўжаючы размову па асноўнай тэме адзінага дня інфармавання, намеснік старшыні райвыканкама Руслан Юр’евіч Абрамчык назваў задачай прафадукацыі фарміраванне спецыяльнасцяў, якія маглі б зацікавіць маладых людзей. Пытанні сістэмы адукацыі назваў сур’ёзнымі, прааналізаваўшы становішча спраў у гэтым накірунку ў Карэліцкім раёне.
Затым прамоўца спыніўся на дадатковай тэме: «Пра актуальныя пытанні рэалізацыі Дэкрэта №3 «Пра папярэджанне сацыяльнага ўтрыманства».
З цікавасцю слухалі ідэолагі раёна і выступленне начальніка аддзела назначэння пенсій і дапамог упраўлення па працы, занятасці і сацыяльнай абароне Карэліцкага райвыканкама Валянціны Яўгеньеўны Мазур, якая трымала слова па другой дадатковай тэме: «Сацыяльная абарона насельніцтва і механізм яе рэалізацыі ў Карэліцкім раёне». У раёне жыве 6385 атрымальнікаў пенсій па ўзросту, 823 — па інваліднасці, 212 — з выпадку страты кармільца, 10 — за асабістыя заслугі перад рэспублікай.
Забяспечана поўная і своечасовая выплата пенсій. Яна ажыццяўляецца ў адпаведнасці з графікам, зацверджаным Міністэрствам працы і сацыяльнай абароны Рэспублікі Беларусь. Асноўная доля пенсій (61,8%) выплачваецца арганізацыямі паштовай сувязі. Больш за 38% выплат ажыццяўляецца арганізацыямі банкаў, з іх больш паловы (57%) пералічваецца на карт-рахункі.
«Нетрадыцыйная рэлігійнасць у Беларусі» — тэма выступлення іерэя Сергія Ярмаловіча, афіцыйнага прадстаўніка Сінадальнага цэнтра сектазнаўства імя прападобнага Іосіфа Валоцкага. Ён расказаў пра секты і культы, кліентурныя культы, аўдыторныя культы, культавае асяроддзе грамадства, унутрыцаркоўнае сектанцтва, сектападобныя групы. Благачынны цэркваў Карэліцкай акругі, протаіерэй Мікалай Орса падзякаваў прамоўцы за змястоўную гутарку.
Галіна СМАЛЯНКА.
Фота Іны ЛЕЙКА.
