Доўгачаканае лета дазваляе дзяўчынкам і хлопчыкам з задавальненнем атрымліваць асалоду ад адпачынку на канікулах. І калі малодшыя школьнікі з галавой акунуліся ў бесклапотны свет гульняў і прыгод, то навучэнцы старэйшых класаў задумаліся аб тым, што летнія канікулы – гэта час, калі можна сумясціць прыемнае з карысным: і адпачыць, і набыць новыя працоўныя навыкі. Такую магчымасць старшакласнікам даюць лагеры працы і адпачынку, арганізаваныя на базе чатырох школ раёна.
Каб даведацца, як праходзяць у рабят летнія працоўныя будні, мы адправіліся ў лагер працы і адпачынку “Юнацтва”, які дзейнічае на базе сярэдняй школы № 1 г.п. Карэлічы.
— У нашай установе адукацыі лагер працы і адпачынку арганізоўваецца ўжо на працягу некалькіх гадоў запар, — расказала яго кіраўнік Ала Громава. – Адпачынак у нашым лагеры карыстаецца папулярнасцю, рабяты з задавальненнем наведваюць яго. Сёлета ён аб’яднаў 10 рабят, якія дасягнулі 14 гадоў. Дзеці па дагаворы працуюць у ДП “Племзавод Карэлічы”. Навучэнцы прыняты на працу паляводамі на відавую праполку сельскагаспадарчых культур. Акрамя працы ў полі, рабяты наводзяць парадак на складзе сельгаспрадпрыемства. Пасля абеду яны ўдзельнічаюць у забаўляльных, творчых і спартыўных мерапрыемствах, валанцёрскіх акцыях, конкурсах, гуляюць у настольныя гульні.
Рабяты прыйшлі ў працоўны лагер у першую чаргу для таго, каб зарабіць, таму прымушаць нікога не трэба, яны ведаюць, што трэба адпрацаваць належны час. Ну а потым у іх яшчэ будзе магчымасць адпачыць і пагутарыць з сябрамі.
— Тут мы адчуваем сябе патрэбнымі і карыснымі, вучымся нечаму новаму і весела праводзім час, — сказала васьмікласніца Сафія Карвіга.
Такім чынам, летнія канікулы становяцца часам не толькі вясёлых забаў, але і карыснага вопыту, набыцця важных жыццёвых навыкаў.
Кацярына КУКАНАВА
Фота аўтара і з архіва ўстановы адукацыі
