На тэрыторыі кожнага сельсавета ёсць аграгарадкі, вёскі, зусім дробненькія вёсачкі, у якіх пражывае ўсяго некалькі чалавек. Добраўпарадкаваць кожны населены пункт, зрабіць жыццё камфортным для вяскоўцаў, вырашыць пытанні жыццезабеспячэння, аказаць неабходную дапамогу чалавеку незалежна ад месца яго пражывання – такі асноўны лейтматыў працы старшынь сельскіх выканаўчых камітэтаў.
Карэспандэнт раённай газеты “Полымя” накіравалася ў Турэцкі сельсавет, у склад якога ўваходзяць 15 населеных пунктаў.
– Добраўпарадкаванне і ўтрыманне ў належным стане тэрыторый населеных пунктаў сельсавета – гэта комплекс работ, якія выконваюцца ўвесь час, – рассказвае старшыня сельсавета Мікалай Шуляк. – Штогод мы распрацоўваем план мерапрыемстваў па добраўпарадкаванні і навядзенні парадку на зямлі. Збіраемся на сельскіх сходах, выслухоўваем прапановы і абмяркоўваем іх. Лічу, нават калі кожны з нас акультурыць тэрыторыю каля дома, ужо будзем жыць у больш прыгожым месцы, вырашэнне многіх пытанняў нямала залежыць і ад саміх людзей.
У Турэцкім сельсавеце жывуць неабыякавыя жыхары, якія актыўна прапануюць ініцыятывы і дружна іх рэалізоўваюць.
— У нас склалася выдатная каманда з дэпутатаў, прадстаўнікоў кіравання базавай гаспадаркай і арганізацый, якія знаходзяцца на тэрыторыі сельсавета, старастаў вёсак. Яны ведаюць сітуацыю ў аграгарадку і ў кожным населеным пункце, імкнуцца адгукацца на просьбы жыхароў у самых розных пытаннях. Свой пасільны ўклад робяць навучэнцы мясцовай установы адукацыі, яны прымаюць актыўны удзел у навядзенні парадаку каля памятных месцаў, — зазначае старшыня сельвыканкама.
Год добраўпарадкавання — час дзейнічаць!
З пачатку года сумесна з жыхарамі в. Беразавец і работнікамі Карэліцкага РУП ЖКГ наведзены парадак на тэрыторыі мясцовых могілак, часткова выдалена драўняна-хмызняковая расліннасць на могілках агр. Турэц, адрамантавана 30 метраў плоту па вул. Ярэміцкай. У малых вёсках па меры неабходнасці выконваецца выдаленне пустазельнай расліннасці і аварыйных дрэў, зносяцца пустуючыя дамы.
Што тычыцца работ па азеляненні тэрыторыі сельсавета, то вясною ў в. Вялікая Слабада падчас працоўных акцый і суботнікаў было высаджана 285 маладых дрэўцаў.
– Увогуле, за апошнія гады жыхары сельсавета ўнеслі вялікі ўклад у паляпшэнне якасці жыцця. Людзі тут жывуць адкрытыя, прыязныя і працавітыя. Яны любяць сваю малую радзіму і кожны імкнецца зрабіць нешта добрае. Сёлета, напрыклад, дзякуючы грамадзянскай ініцыятыве “Мы – за здаровы лад жыцця”, у парку аграгарадка пачалі ўладкоўваць спартыўную пляцоўку, дзе далучыцца да спорту і проста з карысцю правесці вольны час змогуць жыхары ад малога да вялікага. Адкрыццё пляцоўкі плануецца да дзяржаўнага свята 17 Верасня.
У Год добраўпарадкавання ўсё нацэлена на тое, каб мы зрабілі тэрыторыю нашай краіны прыгажэйшай і лепшай. Я ўпэўнены, што актыўнае ўцягванне насельніцтва ў гэты працэс садзейнічае фарміраванню ў людзей пачуцця адказнасці за парадак на роднай зямлі, – сказаў суразмоўца.
Намеснік дырэктара па ідэалагічнай рабоце ДП “Чарняхоўскі-Агра” Алена Макар з вялікай ахвотай расказала пра своеасаблівы “музей пад адкрытым небам” – мурал, які нядаўна з’явіўся на сцяне мехмайстэрні.
– Ідэя стварэння гістарычнай эпапеі ад сахі да высокамагутных трактароў належыць дырэктару сельгаспрадпрыемства Наталлі Дубковай. Лічу, што ўсё атрымалася вельмі прыгожа і дарэчы, – адзначыла Алена Макар.
Мясцовая жыхарка Надзея Макарчык падкрэсліла:
– Важна, каб чалавек не проста сядзеў склаўшы рукі і чакаў, калі яму нехта створыць адпаведныя ўмовы, але і імкнуўся ўнесці сваю лепту, каб свет вакол станавіўся лепшым, прыгажэйшым і больш камфортным. Тое, што робіш сам, апрыёры шануеш і беражэш значна больш. Пасадзіў дрэва або ўладкаваў клумбу, усталяваў лаўку ў двары дома, навёў парадак у парку, выйшаў на суботнік – усё гэта ўклад у якасць нашага жыцця: для сябе, сваіх дзяцей і ўнукаў.
Вяртаючыся ў райцэнтр, зазірнулі ў вёску Вялікая Слабада, якую падчас сустрэчы неаднойчы ўзгадваў старшыня сельсавета. З пачатку гэтага года тут выкананы вялікі аб’ём работ па добраўпарадкаванні: знесены даўно невыкарыстоўваемыя будынкі былой школы, сельскага клуба, лазні. На вуліцы Садовай сустрэліся з мясцовай жыхаркай Аленай Бусько. Нельга было не звярнуць увагу на парадак і цікавы дызайнерскі падыход у афармленні ўчастка. Тут знайшлося месца і для дзіцячай пляцоўкі, і для адпачынку дарослых, а перад вокнамі – мноства розных кветак, яны ўпрыгожваюць двор аж да самых маразоў. У гутарцы жанчына адзначыла, што ў вёсцы шмат хто можа пахваліцца сваім прыгожым і дагледжаным дваром. Хутка ў думках яна прабеглася па ўсіх вуліцах і нагадала прозвішчы і імёны жанчын: аднафамільцы Таццяна і Тамара Крэнь, Галіна Ралла, Таццяна Кныш – яны таксама адмысловыя гаспадыні.
Алена Мікалаеўна нарадзілася і вырасла ў Вялікай Слабадзе, тут стварыла сям’ю. Калі пабудавалася гэтая вуліца, праўленне гаспадаркі выдзеліла маладой сям’і дом, які з цягам часу сужэнцы выкупілі. Алена Мікалаеўна доўгі час працавала прадаўцом у магазінах райспажыўкааперацыі, а апошнія дзесяць гадоў прысвяціла працы на Карэліцкім ільнозаводзе. Зараз яна на заслужаным адпачынку.
– Калі толькі засяліліся, я ўжо добра ведала, куды пасадзіць бульбу, дзе будзе расці цыбуля, а дзе закладзём кветкавы дыван. З году ў год кветак станавілася ўсё больш і больш. А калі нарадзіліся ўнукі, то ўладкавалі месца для гульняў, і гэта ўсё вельмі арганічна ўпісалася ў інтэр’ер нашага двара. За парадкам на прысядзібным участку сочым усе: і муж Валерый, і сыны Дзяніс і Андрэй, – падзялілася жанчына.
– А адкуль з’явілася ў Вас любоў да кветак?
– Гэта любоў перадавалася з пакалення ў пакаленне: у бабулі Наташы было шмат кветак, потым у доме бацькоў, спадзяюся, што ў мяне атрымаецца перадаць гэта захапленне і маленькай унучачцы Алінцы.
Лічыцца, каб адчуць сябе шчаслівым чалавеку трэба трохі: сонца, неба і кветка. Калі кожны пасадзіць і выгадуе хоць бы адну кветку, зямля ператворыцца ў выдатны сад. Кветкі – гэта жыццё, прыгажосць. Вядома, свой кветнік гэтая мілая жанчына з зіхатлівымі вачыма рабіла для сябе і сваёй сям’і, але стараннямі менавіта такіх людзей ствараецца агульная прыгажосць.
Аб’яўленне 2025 года Годам добраўпарадкавання стала сігналам да актывізацыі работы ва ўсіх сферах, звязаных з паляпшэннем якасці жыцця насельніцтва. Мясцовыя органы ўлады, прадпрыемствы і арганізацыі, грамадскія аб’яднанні і кожны жыхар павінны аб’яднаць намаганні для дасягнення пастаўленых мэтаў.
Што можа зрабіць кожны з нас? Варыянтаў мноства! Удзельнічаць у суботніках і акцыях па добраўпарадкаванні — гэта выдатная магчымасць унесці свой асабісты ўклад у стварэнне чысціні і парадку ў сваім двары, на вуліцы, у парку. Падтрымліваць чысціню і парадак у грамадскіх месцах — не смеціць, не ламаць лаўкі і скрыні, беражліва ставіцца да зялёных насаджэнняў. Удзельнічаць у азеляненні свайго двара ці вуліцы — пасадзіць кветкі або дрэвы. Утрымліваць у парадку свае прысядзібныя ўчасткі і прыдамавыя тэрыторыі. Так і праяўляецца наша любоў да малой радзімы.
Кацярына КУКАНАВА
Фота аўтара
