Яго Вялікасць Слова. Колькі мы чуем слоў з дня ў дзень! Простыя і шчырыя ўзвышаюць, а дрэнныя і абразлівыя псуюць настрой. Як заўважыў паэт: "Слова лечыць і калечыць", а хочацца, каб яно было бальзамам для душы.

"Маўчанне — золата" — неаднойчы даводзілася чуць і чытаць  вядомы выраз. На гэты конт Серафім Сароўскі таксама сцвярджаў: "Больш маўчы, чым гавары — і ў тваёй душы паселіцца цішыня, а дух будзе мірным і спакойным".
Аб сэнсе слова ў нашым жыцці паведамляецца і ў народных прымаўках: "Слухай шмат, а гавары мала", "Тады слова серабро, калі справы — золата", "Добрае слова не забываецца", "Не частуй мяне ні піўцом, ні вінцом, а прывітай мяне шчырым слаўцом" і іншыя.
Як паказвае жыццё, добрых слоў бацькі чакаюць і ад дзяцей. Найчасцей яны патрэбны ў састарэлым узросце, калі бавяць свой час у адзіноце. Раней чакалі пісем і паштовак, цяпер іх замянілі тэлефонныя званкі. Вось бы зразумець усім маладым: іх увага і клопат вельмі патрэбны бацькам. Такія  сустрэчы змогуць стварыць сапраўдныя цуды. Ад іх ідуць цяпло, пяшчота, радасць, яны дораць шмат шчырых успамінаў і добрых слоў.
Вялікую сілу мае малітва маці, і гэта ўжо неаднойчы  праверана жыццём. Яна дапамагае дзецям справіцца ў складанай сітуацыі і засцерагае ад бяды. "Вялікую моц мае малітва", — сцвярджаюць святары і раяць чытаць: "Госпадзі, Іісусе Хрысце, Сыне Божы, памілуй мя, грэшнага".
Моцна сагравае душу і роднае слова. Гэта зразумела: яно ад бацькоўскага парога і блакітнага неба, жытнёвых палёў і льняных палеткаў — усяго таго, што нас акружае. Чытаеш вершы пра родную Беларусь, якія ідуць ад сэрца да сэрца, і на душы становіцца лагодна і хораша.
На вялікі жаль, хтосьці яшчэ прадаўжае ўжываць непрыгожыя словы. Слухаеш іх — прыкра і балюча за такіх суразмоўцаў.  Яны тлумачаць тым, што вымаўляюць іх для звязкі слоў. Наша мова багатая і мілагучная, дык навошта ўжываць нецэнзурныя словы, калі нават за суразмоўцу сорамна? Вось бы яму гэта ўсвядоміць самому, пазбавіцца ад нядобрай звычкі, і зрабіць гэта як мага хутчэй.

Галіна СМАЛЯНКА