25 сакавіка ў Карэліцкім маладзёжным цэнтры культуры адбылося агульнае пасяджэнне ініцыятыўных камітэтаў для сумеснага разгляду мерапрыемстваў па рэалізацыі эстафеты "У здаровае будучае" ў рамках праекта "Здаровыя гарады і пасёлкі". Яго ўдзельнікі — кіраўнікі і ідэолагі ўстаноў, арганізацый, прадпрыемстваў гарпасёлкаў Карэлічы і Мір.

Слова трымаў галоўны ўрач Карэліцкага райЦГЭ Аляксандр Германюк:
— У мінулым годзе праведзены марафон "100 дзён здароўя" — і ён людзям спадабаўся. Гэта была добрая ідэя, і водгукі ад яго правядзення таксама добрыя. Сёлета мяркуецца правесці эстафету "У здаровае будучае". Яна будзе праходзіць з 31 сакавіка па 21 лістапада. У ходзе яе правядзення прадугледжваецца не менш трох мерапрыемстваў культурнага, спартыўнага, інтэлектуальнага накірункаў. Падыходзьце да іх выканання з крэатывам.
Інструктар-валеёлаг райЦГЭ Людміла Валасевіч прапанавала правесці сярод працоўных калектываў раёна жараб'ёўку, каб вызначыць, хто першым пачне эстафету. Некалькі хвілін — і першапраходзец названы: эстафету "У здаровае будучае" ў рамках праекта "Здаровыя гарады і пасёлкі" пачынае Карэліцкі раён электрычных сетак.

Галіна СМАЛЯНКА
Фота Сяргея СТОЛЯРА