Карэліцкая каманда па міні-футболе годна завяршыла сезон 2024-2025, выступіўшы ў фінале чатырох і заняўшы чацвёртае месца ў вобласці. Аб выніках сезона, новых футбалістах і падтрымцы балельшчыкаў гутарым з капітанам каманды Аляксандрам Кужалевічам.
— У пачатку сезона Вы ставілі перад сабой мэту завяршыць сезон не горш за мінулы, калі занялі чацвёртае месца. Выходзіць, з задачай справіліся.
— Сапраўды, сыгралі не горш, чым у 2023-2024 гадах, нават лепш. Нягледзячы на тое, што пачалі сезон з пройгрышу камандзе з Воранава, астатнія матчы ў групавым турніры згулялі добра, перамаглі амаль у кожнай гульні. У гульні з навагрудскай камандай была нічыя. Зразумела, хацелася б заняць больш высокае месца, выйсці ў фінал, пазмагацца за медалі. Цяпер гэта першасная задача на наступны сезон.
— Ваша каманда ўзмацнілася новымі футбалістамі. Ці дапамаглі яны на полі?
— Безумоўна. Каманда стала больш моцнай і ўпэўнена адчувае сябе на матчах. Калі мы прайгралі Скідзелю ў фінале, менавіта яны дапамаглі адыграцца ў дамашняй гульні.
— Як увогуле прайшоў сезон?
— Мы гулялі ўжо чацвёрты год, і ў нас усё наладжана, як добры механізм. Калі раней былі складанасці са зборам каманды на выязныя гульні, то цяпер такіх праблем няма, наладжаны таксама і трэніровачны працэс. Сёлета мы ігралі трыма чацвёркамі — адна складалася з мінскіх хлопцаў, якія выступаюць за нас, другая — з нашых больш вопытных футбалістаў, трэцяя — маладзёжная. Тое, што групавы этап прайшоў амаль з аднымі перамогамі і мы занялі ў ім першае месца, гаворыць аб тым, што каманда вырасла.
— Якая гульня ў сезоне была найбольш складанай і цікавай, а якую можна назваць самай простай?
— Лёгкіх матчаў не бывае. Заўжды няпроста гуляць з камандай з Навагрудка. Цікавай стала хатняя гульня са скідзельскай камандай, калі нам неабходна было за 6 хвілін да канца адыграць тры мячы, мы рэалізавалі гэту магчымасць, а за 30 секунд да фінальнага свістка забілі чацвёрты гол, што дазволіла нам выйсці ў фінал чатырох.
Апошнім матчам стаў міжрэгіянальны турнір па міні-футболе, прысвечаны 80-годдзю Вялікай Перамогі, які прайшоў 9 мая на стадыёне “Юнацтва” ў Карэлічах. Аляксандр кажа, што турнір вельмі спадабаўся як гледачам, так і футбалістам:
— Мы былі прыемна здзіўлены, калі ўбачылі, як шмат народу прыйшло на трыбуны. Правялі турнір на высокім узроўні, і гэта адзначылі нашы госці, якія выказалі пажаданне, каб такія матчы праводзіліся часцей.
Аляксандр адзначае, што сёлета на навагрудскіх трыбунах было значна больш балельшчыкаў, чыя дапамога і падтрымка стала важным фактарам для баявога настрою каманды:
— Вельмі прыемна, што за нас балелі і навагрудскія балельшчыкі, і карэліччане. Хацелася, каб на гульні прыязджалі і вучні карэліцкіх школ, каб бачылі сапраўдную гульню і, магчыма, хтосьці з іх у будучым таксама папоўніць нашу каманду.
У гэтым сезоне МФК “Карэлічы” пачаў праводзіць прамыя трансляцыі сваіх матчаў на Ютуб канале, а анонсы і вынікі гульняў публікуюцца ў сацыяльных сетках каманды.
У плане інфармацыйнай падтрымкі наша каманда лепшая ў вобласці, за што вялікі дзякуй хочацца сказаць Яне Варанко, якая займаецца вядзеннем сацыяльных сетак і Ютуб канала.
У завяршэнні гутаркі Аляксандр выказаў падзяку ўсім балельшчыкам МФК “Карэлічы”, якія падтрымлівалі каманду на працягу ўсіх чатырох сезонаў. Асабістыя словы падзякі ён выказаў кіраўніцтву раёна: старшыні Карэліцкага райвыканкама Андрэю Гардзею, намесніку старшыні Яўгену Чычкану і загадчыку сектара спорту і турызму Карэліцкага райвыканкама Аляксандру Галушку за падтрымку каманды.
Сяргей СТОЛЯР
Фота прадастаўлена Аляксандрам КУЖАЛЕВІЧАМ
