Свята-Успенскі Жыровіцкі манастыр з’яўляецца мужчынскім мітрапалічым манастыром Беларускай Праваслаўнай Царквы і знаходзіцца ў аграгарадку Жыровічы Слонімскага раёна. Святыня — адзін з галоўных цэнтраў Беларускага праваслаўя, якая прыцягвае вернікаў з розных куткоў краіны. 18 сакавіка тут адбыліся Чытанні памяці архіепіскапа Міхаіла (Галубовіча).
Архіепіскап Міхаіл быў першым настаяцелем адноўленага Жыровіцкага манастыра, епіскапам Брэсцкім, вікарыем Літоўскай епархіі, затым архіепіскапам Мінскім і Бабруйскім. Пражыў у Жыровічах больш за трыццаць гадоў. 18 сакавіка 1881 года памёр, быў пахаваны ў Жыровіцкім манастыры.
Чытанні сабралі ўдзельнікаў у актавай зале Жыровіцкага манастыра. Іх адкрыццё пачалося з малітвы «Царю Небесный». Затым было зачытана Прывітальнае слова Архіепіскапа Навагрудскага і Слонімскага Гурыя, намесніка Свята-Успенскага Жыровіцкага манастыра.
Увазе прысутных быў прадстаўлены шэраг дакладаў: «Жыццё і працы архіепіскапа Міхаіла (Галубовіча): да 145-годдзя са дня смерці» (магістр багаслоўя, магістр гістарычных навук Мікалай Генадзьевіч Малееў); «Успенскі Жыровіцкі манастыр у перыяд настаяцельства епіскапа Брэсцкага Міхаіла (Галубовіча) (1844-1848)» (іерадыякан, магістр багаслаўя Агафон (Грышкавец)); «Памяць аб падзвіжніках царкоўнага адзінства ў некропалі Жыровіцкай абіцелі» (ігумення, бакалаўр багаслоўя Софія (Дземчык)); «Музей Жыровіцкага манастыра як месца памяці аб падзвіжніках царкоўнага адзінства» (протадыякан, кандыдат багаслаўя Георгій Пшэнко)).
Магістр гістарычных навук Мікалай Генадзьевіч Малееў правёў прэзентацыю кнігі «Архиепископ Михаил (Голубович): штрихи к портрету».
Затым адбылася памінальная літыя на месцы пахавання архіепіскапа Міхаіла (Галубовіча) — Яўленскі храм Жыровіцкага манастыра.
Для ўдзельнікаў Чытанняў была арганізавана экскурсія па музеі манастыра.
Слова — удзельнікам чытанняў:
Наталля КАЗАРЭЗ, метадыст сектара маркетынгу ДУК «Карэліцкая раённая бібліятэка»:
— Перш чым прыняць удзел у Чытаннях памяці архіепіскапа Міхаіла, мне вельмі захацелася даведацца пра яго. Жыццёвы шлях быў вызначаны з самага нараджэння: ён нарадзіўся ў сям’і ўніяцкага святара ў Гродзенскай губерні і ў 13 гадоў паступіў вучыцца ў Слуцкую гімназію на Гродзеншчыне. Доўгія 7 гадоў вучыўся ў гімназіі, а затым прадоўжыў вучобу ў Галоўнай духоўнай семінарыі пры Віленскім універсітэце.
Архіепіскап Міхаіл быў адукаваным чалавекам, цудоўна разбіраўся ў царкоўным ладзе і шмат зрабіў для ўмацавання праваслаўя ў Мінскай епархіі. Дзякуючы яго намаганням было пабудавана 20 каменных і 60 драўляных храмаў. Уладыка з асаблівай увагай адносіўся да развіцця асветы і ўладкавання духоўных вучылішчаў. Яго стараннямі былі адкрыты царкоўныя вучылішчы ў кожным прыходзе.
Асабліва ўшанаваны яго ўклад у вяртанне ўніятаў у праваслаўную царкву. Яго імя занесена ў «Энцыклапедыю гісторыі Беларусі».
Алена ГІМПЕЛЬ, настаўнік беларускай мовы і літаратуры ДУА «Сярэдняя школа № 1 г.п. Карэлічы»:
— У адзінаццаць гадзін нас ветліва сустрэў Жыровіцкі манастыр, які, здаецца, не стаіць на зямлі, а плыве над ёю, нібы карабель, які помніць малітвы пяці стагоддзяў.
Самае моцнае ўражанне пакінулі Чытанні. Гэта былі не проста даклады, а жывыя разважанні.
Асобым і вельмі кранальным акордам стала наведванне дома-музея Жыровіцкага манастыра.
Вядома, сам Жыровіцкі манастыр — асаблівае месца. Пасля Чытанняў і музея выходзіш на тэрыторыю спрадвечнай прыгажосці, чаго так не хапае ў нашы дні.
Дзякуй арганізатарам за прадастаўленую магчымасць пабываць на Чытаннях і ў гэтым святым месцы.
Галіна СМАЛЯНКА
Фота Юрыя ЮРЧЫКА
