Прафесія прадаўца — адна з запатрабаваных. Дзе ні даводзіцца працаваць: у дзяржаўным ці прыватным гандлі альбо займацца сваёй справай, трэба адказна адносіцца да сваіх абавязкаў. І абслужыць пакупнікоў на належным узроўні, каб пайшлі з магазіна з неабходным таварам і ў добрым настроі — задача, якая па плячы работнікам спажывецкай кааперацыі.
Святлана нарадзілася ў вёсцы Шчорсы Навагрудскага раёна. Маляўнічы куточак назаўжды застаўся ў памяці. Навакольныя краявіды па-ранейшаму заварожваюць да глыбіні душы, празрыстыя воды Нёмана вабяць да сябе, і здаецца, што прыгажэйшых мясцін няма ў свеце.
Пасля заканчэння васьмі класаў Шчорсаўскай сярэдняй школы дзяўчына паступіла ў Навагрудскі гандлёва-эканамічны тэхнікум па спецыяльнасці бухгалтар прамысловай дзейнасці. Сваю працоўную біяграфію пачала ў Карэліцкім раённым унітарным прадпрыемстве жыллёва-камунальнай гаспадаркі. Працавала бухгалтарам, але хацелася паспрабаваць сябе ў іншым рэчышчы.
Жанчына спыніла свой выбар на Карэліцкім філіяле Гродзенскага аблспажыўтаварыства. Уладкавалася прадаўцом у магазіны вёсак Горная Рута і Востухава.
— Я з дзяцінства марыла быць прадаўцом, — адзначае Святлана Валер’еўна Гейс. — Сельскія пакупнікі больш адкрытыя і добразычлівыя, і іх абслугоўваць было ў радасць — яны з задавальненнем куплялі тавар у магазіне і дзякавалі за пакупку. Мне хацелася задаволіць іх попыт і выканаць заяўкі.
Як моцна ні падабалася жанчыне прафесія прадаўца, яна вырашыла часова змяніць месца працы і ўладкавалася на філіял «Біямакс-Карэлічы» ЗАТ «Біямакс». Пяць гадоў адпрацавала на прыватным прадпрыемстве аператарам, але гандаль па-ранейшаму прывабліваў. Вярнулася на ранейшую працу — прыйшла прадаўцом у магазін «Прадукты» г.п. Карэлічы, што па вуліцы Гагарына, 2. Незадоўга была прызначана тут загадчыцай. Сем гадоў кожную раніцу спяшаецца на любімую працу і зусім не шкадуе аб сваім рашэнні.
— Калектыў дружны, — гаворыць загадчыца магазіна і з удзячнасцю называе сваіх калег — прадаўцоў Таццяну Лапату, Наталлю Хаўста, Злату Страхоцкую, Ганну Бондар. Яны ўсёй душой гараць за агульную справу і стараюцца выконваць даведзеныя заданні. Асартымент тавараў у магазіне «Прадукты» райцэнтра шырокі: малочныя, каўбасныя, мясныя вырабы, садавіна, агародніна, дзіцячае харчаванне і іншыя прадукты. На пакупнікоў таксама шанцуе — ад жыхароў раёна да гасцей гарпасёлка. Магазін размешчаны каля цэнтральнай шашы, па якой рухаецца шмат транспарту, і іх уладальнікі час ад часу завітваюць у магазін. Для іх у прадаўцоў магазіна абавязкова знойдзецца свая візітная картка — ветлівая ўсмешка і добрае слова — і пакупнікі набудуць жаданы тавар.
Святлана Валер’еўна Гейс знайшла сябе не толькі ў любімай справе. У яе — добрая сям’я, ёсць дом і агарод. Муж Аляксандр працуе аператарам кацельні ў Карэліцкім сырцэху ААТ «Навагрудскія дары» філіяла ААТ «Лідскі малочна-кансервавы камбінат». Дачка Ірына выбрала прафесію бухгалтара і працуе ў сталіцы. А што яшчэ трэба больш жанчыне для шчасця, калі ёсць справа, дом, сям’я? Гэта тое, што напаўняе жыццё сэнсам.
Галіна СМАЛЯНКА
Фота Кацярыны ЖАМОЙДЫ
