18 верасня адбылася сустрэча кіраўніцтва Карэліцкага раёна з маладымі спецыялістамі, якія прыехалі на першае месца працы пасля заканчэння вышэйшых і сярэдне-спецыяльных навучальных устаноў нашай краіны. Яна дала магчымасць правесці адкрытую і шчырую размову, абмяняцца думкамі і пажаданнямі як з боку прадстаўнікоў мясцовай улады і спецыялістаў, так юнакоў і дзяўчат, якія ўступаюць у самастойнае жыццё.
Адкрыў і вёў сустрэчу начальнік аддзела ідэалагічнай работы і па справах моладзі Карэліцкага райвыканкама Пётр Буляк.
У гэтым годзе ў Карэліцкі раён прыехала 77 маладых спецыялістаў, у мінулым — 57. Працэнт замацавання сёлета склаў 66 працэнтаў, летась — 54. У 2026 годзе найбольшая колькасць прыйшла ў галіну сельскай гаспадаркі, аховы здароўя, культуры, адукацыі. Для моладзі створаны добрыя ўмовы быту. Жыллём забяспечаны 47 маладых спецыялістаў, 10 атрымалі кампенсацыю расходаў па найме жылля, некаторыя жывуць з бацькамі і спадарожнікамі жыцця і ў прадастаўленні жылля не маюць патрэбы.
У сваёй прамове старшыня Карэліцкага раённага выканаўчага камітэта Аляксандр Курыла падрабязна расказаў юнакам і дзяўчатам пра наш раён, засяродзіў увагу на гарпасёлках Карэлічы і Мір, жамчужыне Сярэднявечча — Мірскім замку, які ўключаны ў Спіс сусветнай спадчыны ЮНЕСКА. Паведаміў пра сельгаспадарчыя прадпрыемствы і сацыяльную сферу.
— Наш гарадскі пасёлак мяняе сваё аблічча. 26 верасня тут будзе праводзіцца абласное свята «Дажынкі», і мы будзем сустракаць гасцей з усёй вобласці, — сказаў кіраўнік раёна і нагадаў пра тое, што ў 2027 годзе будзе адзначацца 500-годзе Мірскага замка. Жыллё будуецца ў райцэнтры, будзе прадаўжаць узводзіцца у Міры і аграгарадках.
Аляксандр Васільевіч заклікаў маладых спецыялістаў палюбіць карэліцкую зямлю. Ён сцвярджаў, што тут будзе развівацца інфраструктура, каб у гарадскіх пасёлках было жыць не горш, чым у вялікіх гарадах.
На працягу ўсёй сустрэчы Аляксандр Курыла выказваў меркаванні: «Патрэбны жаданне, цярпенне і праца ў жыцці», «Цуды хутка не адбываюцца, але мы стараемся іх тварыць», «У арганізацыях і на прадпрыемствах раёна вам падставяць плячо», «Будзем імкнуцца выцягваць вас з гаджатаў, каб прымалі ўдзел у мерапрыемствах раёна», «Перад вамі адкрыты ўсе дзверы. Самае галоўнае — верыць у сябе, а мы вам дапаможам».
Старшыня Карэліцкага раённага Савета дэпутатаў Аляксей Гаўрош паведаў аб тым, што народныя выбраннікі працуюць у цеснай суполцы з раённай уладай, і дэпутатам неабыякавыя тыя пытанні, якія цікавяць людзей. Іх стараюцца пачуць і дапамагчы вырашыць. Раённы Савет дэпутатаў працуе з моладдзю, створаны Маладзёжны савет, на рахунку якога шмат карысных спраў. Удзельнічаюць у конкурсах і атрымліваюць прызавыя месцы.»Самае галоўнае — мэта ў жыцці. Трэба быць мэтанакіраваным і рухацца наперад, бо, як сцвяржаецца, смеласць гарады бярэ», — адзначаў Аляксей Іванавіч.
Намеснік старшыні Карэліцкага раённага выканаўчага камітэта Яўген Чычкан заклікаў юнакоў і дзяўчат наведваць пасяджэнні клуба «Малады спецыяліст», экскурсіі, займацца спортам, жыць актыўным творчым жыццём і не мінаць маладзёжны цэнтр, дзе можна паглядзець кінафільмы. «Калі знойдзеце захапленне па душы — мы падтрымаем вашы таленты», — гаварыў прамоўца.
Пра маладзёжныя акцыі і ініцыятывы, дзейнасць студэнцкіх атрадаў вяла гаворку першы сакратар РК ГА «БРСМ» Вольга Аляшкевіч. «Вельмі рада бачыць вас у радах валанцёраў. Тэлефануйце і пішыце, вашы ідэі мы будзем прымаць», — заклікала юнакоў і дзяўчат маладзёжны лідар раёна.
Старшыня Карэліцкай раённай арганізацыі Беларускага прафсаюза работнікаў АПК Ірына Пянькоўская назвала асноўную мэту прафсаюзаў — абарона правоў і законных інтарэсаў працаўнікоў. Яна параіла маладым спецыялістам звярнуць увагу на вывучэнне калектыўных дагавораў, дзе ёсць раздзел «Сацыяльная абарона моладзі», а таксама закранула пытанні заключэння кантракту, кампенсацыі за пераезд, падатковага выліку, і заклікала ўсе праблемы вырашаць агульнымі намаганнямі і быць ініцыятыўнымі.
Аб прадастаўленні маладым спецыялістам ільготных крэдытаў вяла размову начальнік цэнтра банкаўскіх паслуг № 411 ААТ «АСБ Беларусбанк» Вольга Марцута. Ён выдаецца на нехарчовыя тавары айчыннай вытворчасці тэрмінам на пяць гадоў. Для гэтага трэба адпрацаваць тры месяцы і звярнуцца да наймальніка.
На сустрэчы былі абмеркаваны пытанні жылля для маладых спецыялістаў і медыцынскага абслугоўвання ў раёне.
Дарэчы, у 2026 годзе рэдакцыя газеты «Полымя» таксама не стала выключэннем — на працу прыехалі два маладыя спецыялісты: Яраслава Манкевіч, якая прынята на пасаду адказнага сакратара, і Арцём Сафонаў. Вось што паведаміў Арём, які працуе тэхнічным рэдактарам і адміністратарам сайта выдання:
— 28 ліпеня пасля заканчэння Гродзенскага гуманітарнага дзяржаўнага каледжа пры ГрДУ імя Янкі Купалы прыехаў на працу на Карэліччыну. У рэдакцыі мяне прынялі цёпла, радушна, прыгожа. Мне ва ўсім дапамагаюць. Дзякуючы ўвазе і падтрымцы, паступова авалодваю навыкамі. З родным домам мяне раздзяляе больш за 150 кіламетраў, але ў Карэліцкім краі адчуваю сябе камфортна. Мяне забяспечылі жыллём і добрымі ўмовамі для працы. Я пакуль не ведаю, як складзецца мой далейшы шлях, але буду ўдзячны вопыту працы ў Карэліцкай раённай газеце «Полымя» і знаёмству з гэтым цудоўным краем.
Галіна СМАЛЯНКА
Фота Кацярыны ЖАМОЙДЫ
