Таццяна ДЗЯДУЛЬ, брыгадзір вытворчай брыгады МТФ «Востухава» СВК «Маяк-Заполле»:
— Я ганаруся, што я беларуска. Нарадзілася ў вёсцы Жукі Красненскага сельсавета. Тут жыву і працую. Амаль пяць гадоў як кіраўнік калектыву, які больш жаночы і старанны.
З’яўляюся старастай вёсак Жукі і Востухава. Людзі звяртаюцца да мяне з рознымі просьбамі, найчасцей просяць заказаць паліва на зіму і падвезці на аўтамабілі па іх справах.
А яшчэ я дэпутат Красненскага сельскага Савета дэпутатаў па Востухаўскай выбарчай акрузе № 5. Запыты вяскоўцаў ведаю добра і імкнуся іх выконваць. Нездарма існуе меркаванне: «Дзе нарадзіўся, там і спатрэбіўся».
Год беларускай жанчыны — добрая навіна. Вельмі прыемна, што ва Урадзе думаюць пра нас, жанчын, давяраюць нам і ўскладаюць на нас надзеі. Сапраўды, жанчына можа многае, яна не баіцца цяжкасцей, годна пераносіць усе іспыты жыцця — у яе ўсё атрымліваецца.
Святлана АБЛАМЕЙКА, загадчык філіяла «Жухавіцкі Дом культуры» Карэліцкага раённага Цэнтра культуры і народнай творчасці, занесена на раённую Дошку пашаны:
— Вельмі радуе, што ў нашай краіне надаецца ўвага беларускай жанчыне. І гэта справядліва: яна працуе нароўні з мужчынамі. Да прыкладу, у нашым калектыве — дзевяць чалавек, з іх — сем жанчын. Розныя па ўзросце, творчыя, энергічныя, ініцыятыўныя, кожная любіць сваю справу па-свойму, але разам мы — адна каманда. Таму ёсць і вынік у агульнай справе: Жухавіцкі Дом культуры ў 2025 годзе занесены на раённую Дошку пашаны.
Я працую ў галіне культуры больш за сорак гадоў, у Жухавічах — з 2007 года. З’яўляюся старастай вёскі Кожава і дэпутатам па Кожаўскай выбарчай акрузе № 2. Вяскоўцы вельмі актыўныя і падтрымліваюць ініцыятывы, шмат што ўжо зроблена.
У Беларусі ёсць магчымасць раскрыцца жанчыне як асобе. Нас падтрымліваюць на працы, калі ўносіш прапанову, і можна рэалізавацца ў жыцці. Хочацца, каб і надалей так ставіліся да жанчыны — маці, працаўніцы, актывісткі. Дарэчы, для жанчын праводзіцца шмат цікавых мерапрыемстваў, толькі іх трэба не мінуць і ісці ў нагу з часам.
Юлія ШАХРАЙ, загадчык сектара нестацыянарнага абслугоўвання ДУ «Карэліцкі раённы Цэнтр культуры і народнай творчасці», старшыня Карэліцкай раённай арганізацыі Беларускага прафсаюза работнікаў культуры, інфармацыі, спорту і турызму, маці траіх дзяцей:
— Указам № 1 Прэзідэнта Рэспублікі Беларусь Аляксандра Лукашэнкі 2026-ы аб’яўлены Годам беларускай жанчыны і акцэнт зроблены на жанчыну, яе развіццё, дасягненні, значнасць як жанчыны-маці, жанчыны-працаўніцы, у прафесійнай дзейнасці і грамадскім жыцці. Беларуская жанчына можа поўнасцю сябе рэалізаваць і не забываць пра мацярынскія абавязкі. Я ў гэтым пераканалася на сваім асабістым вопыце. Працую ў галіне культуры і ўзначальваю прафсаюзную арганізацыю, а яшчэ з’яўляюся маці траіх дзяцей. У прафесійным плане ёсць пэўныя поспехі. Фальклорна-танцавальны калектыў «Спадчына» на Славянскім базары ў Віцебску быў узнагароджаны двума Дыпломамі.
У прафсаюзнай арганізацыі налічваецца 190 членаў, і ў выпадку неабходнасці кожнаму трэба дапамагчы.
Як маці траіх дзяцей пастаянна адчуваю падтрымку дзяржавы. Да прыкладу, дзякуючы сямейнаму капіталу набыла двухпакаёвую кватэру ў райцэнтры. Усё гэта магчыма менавіта ў нашай краіне. Хочацца выказаць словы ўдзячнасці Кіраўніку дзяржавы за магчымасць рэалізавацца як асоба, і гэта вельмі шмат значыць для мяне.
Галіна СМАЛЯНКА
