У Цэнтры сацыяльнага абслугоўвання насельніцтва Карэліцкага раёна праведзена дыялогавая пляцоўка на тэму: «Чарнобыль: трагедыя, боль, папярэджанне».
Адкрыла мерапрыемства загадчык аддзялення падтрымкі актыўнага даўгалецця ва ўмовах дзённага знаходжання Вольга Жук. «40 гадоў таму на Чарнобыльскай атамнай электрастанцыі адбылася буйнейшая ў гісторыі атамнай энергетыкі аварыя. Катастрофа пацягнула за сабой маштабныя эканамічныя і сацыяльна-псіхалагічныя наступствы. Нашу сустрэчу мы прысвячаем тым даўнім падзеям, якія сталі ўжо гісторыяй, але пра іх мы павінны памятаць», — сказала вядучая.
Загадчык аддзела абслугоўвання і інфармацыі Карэліцкай раённай бібліятэкі Марына Пісарык зрабіла экскурс у тыя гады, калі крыло Чарнобыля кранула лёсы многіх людзей. Паведала пра дабравольцаў, якія адгукнуліся на бяду і праявілі свой гераізм. Аповед выклікаў хваляванне ў прысутных і прымусіў задумацца аб сэнсе жыцця.
За чатыры дзесяцігоддзі дзяржава прайшла складаны шлях, і яна заўжды клапацілася пра людзей. Вялікая ўвага ўдзялялася здароўю пацярпелых, і ў першую чаргу дзяцей, кантролю за якасцю прадуктаў. Аб усім гэтым і рэалізацыі дзяржаўных праграм расказала інспектар сектара прапаганды і ўзаемадзеяння з грамадскасцю Карэліцкага раённага аддзела МНС Кацярына Зуза.
Ліквідатар аварыі на Чарнобыльскай АЭС, жыхар райцэнтра Валерый Ярашук да драбніц памятае лістапад 1986 года, калі праходзіў службу ў раёне адсялення ў вёсцы Савічы Брагінскага раёна. Яе жыхарам давялося пакінуць сваё жыллё і ўсё нажытае. Ліквідатарам прыходзілася вартаваць яго ад злодзеяў.
Аб ільготах для ўдзельнікаў Чарнобыльскай АЭС расказала начальнік упраўлення па працы, занятасці і сацыяльнай абароне Карэліцкага раённага выканаўчага камітэта Іна Богуш. Сярод іх: пенсійныя льготы, пратэзіраванне зубоў, пры паступленні ў вну і ссну, скарачэнне рабочага часу, ільготы пры водпусках, першачарговае ўступленне ў гаражныя кааператывы і аўтастаянкі, бясплатнае санаторна-курортнае лячэнне, ільготнае крэдытаванне на тавары беларускай вытворчасці і іншыя. Падчас сустрэчы Іна Аляксандраўна ўспомніла пра свайго родзіча-ўрача, які прымаў удзел у ліквідацыі аварыі на Чарнобыльскай АЭС.
Сваімі ўспамінамі на сустрэчы падзялілася і жыхарка райцэнтра Алена Раскалоценка, для якой Карэлічы сталі другой радзімай. Яна з сям’ёй пераехала з Брагінскага раёна, яе падтрымала сястра Тамара. «Дзякуй Богу, што жывём, ёсць дзе жыць, і радуюць дзеці і ўнукі», — адзначыла Алена Мікалаеўна.
— Трэба жыць, дыхаць, не падаць духам, любіць жыццё, — сказала напрыканцы сустрэчы Вольга Жук.
Карэліцкая раённая бібліятэка арганізавала выставу «Чарнобыль. Каб памятаць і берагчы».
Галіна СМАЛЯНКА
Фота Кацярыны ЖАМОЙДЫ
