Карэліччанін Міхаіл Кузьміч пасля заканчэння СШ № 2 райцэнтра вырашыў звязаць жыццё з медыцынай і атрымаў спецыяльнасць «фельчар-акушэр. Памочнік урача па амбулаторна-паліклінічнай дапамозе». Працаваць накіраваўся ў Навагрудскую ЦРБ, дзе быў фельчарам выязной брыгады хуткай дапамогі. Калі прыйшоў час аддаць абавязак Радзіме, у кастрычніку 2023 года пайшоў служыць у Лідскі пагранатрад.
— Першы месяц было няпроста, — успамінае Міхаіл. — Неабходна было прывыкнуць да армейскага распарадку. Раннія пад’ёмы, воіская дысцыпліна, фізічная падрыхтоўка. Аднак да гэтага хутка прызвычаіўся. Да таго ж з’явілася цікавасць да службы.
Пасля курса маладога байца юнака размеркавалі ў манеўраную групу — пагранічны спецназ, які ў любы момант гатовы да абароны межаў Радзімы. Воінская спецыяльнасць Міхаіла — інспектар 1-й катэгорыі-медык.
— Служба даволі цікавая і, што самае галоўнае, карысная: выпрацоўваецца дысцыпліна, загартоўваюцца асабістыя якасці, мацнее характар. У арміі я назапашваю вопыт у прафесійным напрамку, атрымліваю веды і ўменні, якія спатрэбяцца мне ў далейшым жыцці. Падчас службы мне прапанавалі прайсці курсы па тактычнай медыцыне, дзе я атрымаў новыя ваенна-медыцынскія навыкі.
Сяргей СТОЛЯР
Фота Дзяніса ПЯТРОЎСКАГА, афіцыйнага прадстаўніка Лідскага пагранічнага атрада
