Тэматычныя пляцоўкі на плошчы 17 Верасня райцэнтра разнастайныя і прыцягваюць увагу ўдзельнікаў свята. Пачынаем знаёмства з выставы з фондаў Карэліцкага раённага краязнаўчага музея «Непакораны край: летапіс народнага подзвігу!». На ёй прадстаўлены экспанаты: патэфон, свяцільнік, міска, лыжка, фляжка, фурашка — усё тое, што вяртае ў далёкія ваенныя гады. «Гэта самае галоўнае свята на зямлі. Я ганаруся тым, што маю да яго дачыненне і магу сёння раздзяліць радасць з іншымі людзьмі», — гаворыць старшы навуковы супрацоўнік музея Аляксей Караян.
Інструктар-валеёлаг Карэліцкага раённагаЦГЭ Людміла Валасевіч расказала аб функцыяванні пляцоўкі «Пасёлак здаровых людзей»: «Мы прадаставілі малыя носьбіты інфармацыі па прынцыпах здаровага ладу жыцця і імунапрафілактыцы насельніцтва. Прапаноўваем гульню для дзяцей «Шкодныя і карысныя прадукты» і загадкі аб здаровым ладзе жыцця (адгадай загадку і атрымай цукерку). У сувязі са спякотай — рэкамендацыі па пітным рэжыме і як зберагчы здароўе».
На экапляцоўцы аграсядзіб Карэліцкага раёна давялося пазнаёміцца з яе гаспадарамі. Павел Жук з сялянскай гаспадаркі «Белыя Лугі» прывёз на свята інфармацыйныя буклеты і экспанаты з музея: пралку, маслабойку, плецены кошык, чыгунок і іншае. «Хочам прыцягнуць увагу турыстаў да нашага цудоўнага куточка — вёскі Цінявічы, дзе можна добра адпачыць на прыродзе і пазнаёміцца з бытам беларусаў мінулых часоў», — сказаў ён.
Сваімі ўражаннямі падзяліўся і гаспадар сядзібы «Мірскі пасад» Віктар Сакель: «Мы прывезлі экспанаты з музея, візіткі, буклеты. На свяце прыемна быць і бачыць шчаслівыя твары, разам радавацца гэтаму добраму сонечнаму дню».
Сядзіба «Sunny HOUSE», у перакладзе — «Сонечны дом», існуе чатыры гады. Яе гаспадар Сяргей Каласоўскі імкнецца прапанаваць жадаючым адпачынак і знаёмствы з архітэктурай і культурай г. п. Мір. «Прыязджайце, будзем рады!» — заклікае гаспадар сядзібы.
У сваю чаргу дырэктар Карэліцкага раённага турыстычнага інфармацыйнага цэнтра Караліна Анісенка адзначае: «Мы хочам прыцягнуць больш увагі да гісторыка-культурных каштоўнасцей Карэліччыны. І гэтае свята дае такую магчымасць».
Прыцягнула ўвагу пляцоўка для дзяцей і падлеткаў «ДзіцячыГульняСвет»: атракцыёны, інтэрактыўныя і пазнавальныя праграмы для дзяцей. ДУК «Карэліцкая раённая бібліятэка» прадстаўлена пляцоўкай з гушкалкамі, басейнам з мячыкамі і казачнымі героямі, настольнымі гульнямі, шахматамі, кніжным лато, пазламі, бяспройгрышнай латарэяй, аквагрымам. Для дзіцячага сярэдняга ўзросту — стэнд «Давай размалюем». Працуе фотазона з кніжнай выставай да 80-годдзя вызвалення Беларусі пад назвай «Мы — беларусы».
Прымае ўдзел у свяце і Цэнтр сацыяльнага абслугоўвання насельніцтва Карэліцкага раёна. Кіраўнік гуртка па рабоце з інвалідамі Лілія Кудзіна апавядае аб вырабах ручной работы людзей з абмежаванымі магчымасцямі. І сапраўды, іх майстэрства захапляе: робяць букеты з мыльных ружаў, сумачкі са шпагату, прыгожыя сурвэткі, упрыгажэнні для валасоў і іншае.
Непадалёку размешчаны столік з рознымі травамі, якія прываблівалі неверагоднымі пахамі. Тут было шмат травяной гарбаты: з чабору, душыцы, мяты, мілісы, барбарысу, тархуну, ліпы, ісопу, жасміну, календулы, якія вырошчваюцца на экалагічна чыстай тэрыторыі. Вырошчвае іх Вольга Старжынская, траўніца ў трэцім пакаленні, майстар Карэліцкага Дома рамёстваў, якой хочацца выказаць словы прызнання і падзякі.
На фолк-пляцоўцы «Жывуць традыцыі — квітнее зямля» прадстаўлены гадавы цыкл найважнейшых святочных традыцый, якія бытавалі на Карэліччыне ў даўнія часы. Яна падрыхтавана работнікамі культуры раёна: «Каляды» (Мір, Аюцавічы), «Улассе» (Лукі, Турэц), «Юр’е» (Варонча, Цырын), «Троіца» (Жухавічы), «Купалле» (Краснае), «Багач» (Райца, Малюшычы, Баранавічы).
Далей накіроўваемся на выставу спецтэхнікі прадпрыемстваў, арганізацый раёна, сельскагаспадарчай спецтэхнікі. Вочы разбягаюцца ад яе магутнасці і навізны. Уражвае цікавасць гасцей свята, асабліва дзяцей, якія жадаюць пасядзець у кабінах. Знаёмлюся з адным з іх гаспадароў: механізатар КУСП «Чарняхоўскі-Агра» Юрый Тананка. Трактару МТЗ-1523 6 ліпеня споўніцца толькі год. Раней механізатар працаваў на МТЗ-1221, 952, 82, на збожжаўборачных камбайнах: Дон-500, Ліда-1600, Палессе-1218.
Галіна СМАЛЯНКА
Фота Яраславы МАНКЕВІЧ і Ларысы ШУГЛІ
СЛОВА — УДЗЕЛЬНІКАМ СВЯТА
Марына ВЯРБІЦКАЯ,
удзельнік хору ветэранаў працы г. п. Карэлічы,
жыхарка вёскі Паланая Красненскага сельсавета:
— Мой родны дзядзька Барыс Людвігавіч Штэнік быў на вайне і ўдзельнічаў у вызваленні блакаднага Ленінграда, там і загінуў. Яго заўсёды ўспамінаем у Дзень Незалежнасці Рэспублікі Беларусь і Дзень Перамогі. Ганарымся тым, што ён здабыў для нас шчаслівае будучае.
Я люблю гэтае свята і ў песнях стараюся выказаць свае адносіны душою і сэрцам. Мне хочацца спадзявацца, што такія пачуцці не толькі ў мяне, але і ва ўсіх тых, хто сёння прыйшоў на ўрачыстасць з нагоды Дня Незалежнасці Рэспублікі Беларусь.
Марыя АЛЯШКЕВІЧ,
маці дваіх дзяцей,
жыхарка г. п. Карэлічы:
— На свята мы прыйшлі ўсёй сям’ёй і прымаем у ім самы непасрэдны ўдзел. Муж Дзмітрый Анатольевіч ахоўвае парадак, як работнік міліцыі. Я спявала ў народным ансамблі «Забава» і прымала ўдзел у шэсці калоны разам з работнікамі сектара культуры райвыканкама. Са мной і шасцігадовы сын Яўгеній.
Пра вайну ведаю па расказах дзядулі і бабулі, якія нарадзіліся і ўсё жыццё пражылі ў вёсцы Новае Сяло, якая была двойчы спалена карнікамі. Мы, маладыя, павінны памятаць пра подзвіг нашага народа ў гады вайны і не дапусціць, каб гэта паўтарылася. Няхай на зямлі заўсёды будуць мір і спакой.
Галіна СМАЛЯНКА
Фота Ларысы ШУГЛІ
