Супрацоўнікі Карэліцкага райааддзела па надзвычайных сітуацыях вядуць актыўную работу па папярэджанні пажараў і гібелі людзей ад іх, асабліва сярод найбольш уразлівых катэгорый насельніцтва. З мэтай зніжэння колькасці пажараў выратавальнікі актыўна праводзяць прафілактычныя мерапрыемствы ў жылым сектары гарпасёлкаў, аграгарадках і вёсках раёна.
Разам з інспектарам сектара прапаганды і ўзаемадзеяння з грамадскасцю Карэліцкага раённага аддзела МНС Кацярынай Зуза карэспандэнт газеты “Полымя” адправілася на вуліцу 8 Сакавіка г.п. Карэлічы і разам наведалі 16 кватэр.
– Традыцыйна наведваем тыя домаўладанні, дзе пражываюць людзі, якім па тых ці іншых прычынах патрэбна асаблівая ўвага, – тлумачыць інспектар. – Гэтыя адрасы мы ведаем амаль на памяць, пастаянны кантроль, рэгулярныя візіты ўплываюць на эфектыўнасць і вынік прафілактычнай работы. Сёння ў маршрутным лісце – наведванне 16 кватэр адзінокіх і адзінокапражываючых пажылых грамадзян. Нам важна матываваць кожнага зрабіць сваё пражыванне не толькі камфортным, але і бяспечным, дапамагчы тым, хто ў сілу жыццёвых абставінаў мае патрэбу ў апецы. Бо бяспека жыве там, дзе пра яе клапоцяцца.
Падчас рэйду спецыяліст МНС агледзела кватэры пенсіянераў, звярнула іх увагу на спраўнасць разетак і электраправодкі, расказала, чым небяспечна перагрузка электрасеткі і выкарыстанне няспраўных электрапрыбораў. Таксама інспектар звярнула ўвагу пажылых людзей на правілы абыходжання з газавым абсталяваннем, на небяспеку адкрытага агню – перш за ўсё газавай пліты: бо хуткасць рэакцыі і каардынацыя руху ў пажылых людзей зніжана. Таму, калі, да прыкладу, загарыцца кухонны ручнік у руках або адзенне, наступствы могуць быць трагічнымі.
Пенсіянеры вельмі ўважліва слухалі інспектара. Адна з жыхарак абследаванай вуліцы запэўніла, што заўсёды вельмі ўважліва ставіцца да захавання правілаў пажарнай бяспекі. Па тэлебачанні, у раённай газеце вельмі часта трапляецца матэрыял пра пажары, а гэта вельмі добры прафілактычны ўрок для грамадзян усіх узростаў.
Супрацоўнік МНС нагадала людзям сталага ўзросту, як правільна дзейнічаць у выпадку пажару, а таксама выклікаць пажарную ахову.
У кожным доме гасцям былі вельмі рады, бо для пенсіянераў гэта, перш за ўсё, дадатковая магчымасць зносін, а праводзілі са словамі падзякі за тое, што не пакідаюць старэйшае пакаленне без увагі і клопату, і запрашалі прыходзіць яшчэ, але толькі па добрых падставах.
У завяршэнні кожнай сустрэчы Кацярына Зуза ўручала карысную наглядную прадукцыю: памяткі і буклеты з інфармацыяй аб правілах пажарнай бяспекі.
Падобныя прафілактычныя мерапрыемствы з насельніцтвам вельмі важныя, яны служаць напамінам, што пажар можна прадухіліць, загадзя паклапаціўшыся аб выкананні простых патрабаванняў. Памятайце, выкананне правілаў пажарнай бяспекі – гэта залог захавання жыцця і маёмасці!
Кацярына КУКАНАВА
Фота аўтара
