
Падрыхтоўку да асенне-зімовага перыяду абмеркавалі на штотыднёвай рабочай нарадзе ў старшыні райвыканкама Генадзія Шатуева.
Паводле слоў намесніка старшыні райвыканкама Аляксандра Быліча, у раёне 21% цепласпажыўцоў атрымалі пашпарты гатоўнасці да ацяпляльнага перыяду (сярэднеабласны паказчык роўны 14%) і 12,7% цеплакрыніц (сярэднеабласны — 15,1%). Нарыхтоўкай паліва планамерна займаецца РУП ЖКГ: ужо назапашана 3,2 тысячы т шчапы (85,2% ад неабходнага да пачатку ацяпляльнага сезона) і 2,4 тысячы т дроў (119% ад патрэбнага). Згодна з графікам праводзяцца работы па рэканструкцыі кацельні па вуліцы Гагарына ў г.п. Карэлічы. У кастрычніку работы будуць завершаны, і спажыўцы цяпла змогуць карыстацца паслугамі новай кацельні.
Кіраўнік раёна выказаў заўвагі ў адрас ДРБУ-158:
— Бачу шмат недапрацовак па вашаму ведамству: прыпыначныя пункты завалены смеццем, зараслі пустазеллем, дарожныя знакі дэфармаваныя.
Па словах галоўнага інжынера ДРБУ-158 Юрыя Бабанскага, уборка смецця з прыпынкаў праводзіцца адзін раз на тыдзень, аднак нядобрасумленныя грамадзяне нясуць яго туды штодня. Такім чынам яны спрабуюць зэканоміць мізэрную суму, не заключаючы дагавор з РУП ЖКГ на вываз цвёрдых камунальных адходаў. З пачатку сезона прафіліравана 245 км мясцовых гравійных і грунтовых дарог. Для работы ў зімовы перыяд нарыхтавана 230 т пясчана-салянай сумесі, гэта 6,5% ад неабходнага.
Абмеркавалі на нарадзе і стан спраў на палях раёна. Па словах першага намесніка старшыні райвыканкама — начальніка ўпраўлення сельскай гаспадаркі і харчавання Яўгена Бусько, з-за засухі колас сёлета лягчэй прыкладна на 15%, таму дасягнуць рэкорднага леташняга збору збожжа ў 14 тысяч т не атрымаецца, аднак планку ў 100 тысяч т раён утрымае.
— Трэба надаць асаблівую ўвагу ўборцы рапсу, зрабіць усё па тэхналогіі, — звярнуў асаблівую ўвагу старшыня райвыканкама. — Убралі культуры — і адразу араць глебу пад азімыя, каб не губляць каштоўную вільгаць. Пара рыхтаваць траншэі пад кукурузны сілас, каралева палёў і сёлета цешыць вока. Хутка гаспадаркі раёна прыступяць да трэцяга ўкосу траў, так што будзем з кармамі, а значыць з прадукцыяй.
Іна ЛЕЙКА






