Павелічэнне колькасці пажылых людзей — тэндэнцыя сусветная, ад якой Беларусь не стаіць у баку. Напрыклад, у Карэліцкім раёне кожны трэці жыхар — пенсіянер. Таму асаблівая ўвага дзяржавы надаецца менавіта пажылым, асабліва адзінокім.
Наша рэйдавая група, у склад якой увайшлі супрацоўнікі Цэнтра сацыяльнага абслугоўвання насельніцтва Карэліцкага раёна, раённага аддзела па надзвычайных сітуацыях і рэдакцыі раённай газеты «Полымя», наведалі адзінокіх пажылых грамадзян і на свае вочы ўбачылі, у якіх умовах яны жывуць і як сябе адчуваюць.
Першая сустрэча
Яўгенія Васільеўна Лейка жыве ў доме пад нумарам 95 па вуліцы Кастрычніцкай у райцэнтры. Дом вялікі і дагледжаны, у ім чатыры пакоі і кухня, праведзена газавае ацяпленне. Устаноўлена святло-гукавое ўстройства, а некалькі гадоў таму за кошт сродкаў дзяржаўнай праграмы замянілі электраправодку.
Жанчына з ліку адзінокіх. Хаця сябе такой не лічыць: Яўгенію Васільеўну наведвае сацыяльны работнік Вольга Віктараўна Лагута. Прыбірае ў хаце, дастаўляе прадукты, суправаджае ў райпаліклініку, купляе лекі. «Вольга, быццам родная, такога чалавека трэба пашукаць», — прызнаецца 87-гадовая жанчына.
У Яўгеніі Васільеўны ёсць агарод. Цвітуць тут і кветкі з ранняй вясны і да позняй восені, ад пралесак да хрызантэм.
— Жыццё на пенсіі мае сэнс, калі рухаешся і чымсьці займаешся. Кансервую агуркі і памідоры, раблю салаты, — прызнаецца субяседніца, а сацыяльны работнік дадае: «У Яўгеніі Васільеўны дом адкрытых дзвярэй. Смачна гатуе і стараецца пачаставаць і кавай, і гарбатай. Яна вялікай душы чалавек».
Другая сустрэча
Дом Зінаіды Іванаўны Лежань у вёсцы Аканавічы Цырынскага сельсавета знаходзім адразу. У пакоях вельмі цёпла.
— Печку прапалілі? — цікавімся ў гаспадыні.
— Так, грэюся, — прызнаецца жанчына сталых гадоў.
Прадстаўнік раённага аддзела па надзвычайных сітуацыях просіць дазволу абследаваць гарышча. Хутка вяртаецца і паведамляе, што там парадак.
Зінаіда Іванаўна жыве ў доме з пляменнікам Сяргеем, інвалідам 2-й групы. Да іх наведваецца сацыяльны работнік Таццяна Іванаўна Манько.
— Цудоўны работнік, — прадаўжае Зінаіда Іванаўна. — Па характары добрая, усё дапаможа, аб чым папрашу.
Зінаіда Іванаўна Лежань усё свядомае жыццё правяла ў працы — шчыравала ў сельскай гаспадарцы паляводам, свінаркай, даяркай. Працоўны стаж складае сорак два гады. Вельмі рада ўвазе мясцовай улады, удзячна за клопат старшыні Цырынскага сельвыканкама Аксане Віктараўне Гомза.
Трэцяя сустрэча
У вёсцы Аканавічы Цырынскага сельсавета жыве і Ганна Мікалаеўна Гомза. Жанчына задаволена, калі да яе хтосьці наведваецца, асабліва — сацыяльнаму работніку Таццяне Іванаўне Манько. Яна дапамагае ў няхітрых справах: прыбярэ ў пакоях, памые адзенне, прынясе лекі.
Ганна Мікалаеўна за прадуктамі да аўтамагазіна ходзіць сама, бо ён прыпыняецца недалёка ад дома. Ды і з вяскоўцамі пагутарыць, пачуе навіны аб тым, што адбываецца ў свеце.
Жанчына шмат гадоў працавала майстрам на торфапрадпрыемстве «Міранка». Ладзіла з рабочымі. Цяпер таксама жыве па такім жа прынцыпе. Калі суседзі прыходзяць, каб пацікавіцца здароўем, для яе гэта важна.
Напрыканцы сустрэчы Ганна Мікалаеўна прызналася, што любіць пісаць вершы. Некаторыя з іх прачытала, і на душы стала неяк па-добраму цёпла. Як і ў хаце гаспадыні, якая імкнецца на пенсіі проста жыць і рабіць гэта прыгожа, як калісьці ў маладосці. Жыццё прадаўжаецца, і старасць ёй у радасць.
Слова — удзельнікам рэйду
Алена ЧАРТКО,
спецыяліст па сацыяльнай рабоце аддзялення пярвічнага прыёму, аналізу, інфармавання і падтрымкі ў крызіснай сітуацыі ДУ «Цэнтр сацыяльнага абслугоўвання насельніцтва Карэліцкага раёна»:
— Двойчы ў год праводзім абследаванне жыллёва-бытавых умоў і выяўляем, у чым адзінокія пажылыя жыхары раёна маюць патрэбу. Шмат увагі ўдзяляем пытанням супрацьпажарнага стану, рамонту печак, электраправодак, рабоце аўтаномных пажарных апавяшчальнікаў, цікавімся патрэбнасцю паслуг цырульніка і пакосу травы на прысядзібных участках, прадастаўлення паслуг сацыяльнага работніка і сядзелкі, наяўнасці паліва і г. д.
Павел КУПРАС,
старшы інспектар сектара нагляду і прафілактыкі Карэліцкага раённага аддзела па надзвычайных сітуацыях:
— Кожны тыдзень у складзе назіральных камісій прадстаўнікі раённага аддзела па надзвычайных сітуацыях правяраюць домаўладанні грамадзян пенсійнага ўзросту. Падчас праверак з кожным з іх праводзіцца прафілактычная гутарка. У выпадку выяўлення недахопаў выдаюцца рэкамендацыі на іх ліквідацыю. Пасля гэтага праводзіцца паўторнае абследаванне дамоў.
КАМПЕТЭНТНА
Дырэктар ДУ «Цэнтр сацыяльнага абслугоўвання насельніцтва Карэліцкага раёна»
Інэса СЯМІБРАТАВА:
— Па стане на 1 кастрычніка 2023 года, на ўліку ў ДУ «ЦСАН Карэліцкага раёна» налічвалася 360 адзінокіх пажылых, 2994 адзінока пражываючых грамадзян. Праведзена абследаванне ўсіх домаўладанняў.
За кошт сродкаў дзяржаўнай праграмы «Сацыяльная абарона на 2021-2025 г.г.» 9 чалавекам з гэтай катэгорыі выкананы рамонт пячнога ацяплення, двум — рамонт электраправодкі, устаноўлена і заменена 42 аўтаномных пажарных апавяшчальніка.
У 2023 годзе за кошт рэзервовага фонду МНС 33 адзінокім, адзінока пражываючым і інвалідам устаноўлены святло-гукавыя ўстройствы.
Галіна СМАЛЯНКА
Фота Сяргея СТОЛЯРА
