Урачыстыя лінейкі, прысвечаныя Дню ведаў, прайшлі сёння па ўсёй краіне. Тысячы хлопчыкаў і дзяўчынак упершыню пераступілі школьны парог у новай для сябе ролі вучняў. Першы званок прагучаў у гэты дзень і для пяці першакласнікаў Турэцкай СШ.
На лінейцы, прысвечанай першаму навучальнаму дню, прысутнічалі ганаровыя госці: старшыня Карэліцкага раённага Савета дэпутатаў Аляксей Гаўрош, старшыня Турэцкага сельвыканкама Мікалай Шуляк, намеснік старшыні па ідэалагічнай рабоце КУСП “Чарняхоўскі-Агра” Алена Макар і настаяцель храма Пакрова Прасвятой Багародзіцы іерэй Андрэй Абрамовіч.
— Паважаныя першакласнікі, сёння для вас адкрыла свае дзверы наша ўтульная школа, дзе вы кожны дзень будзеце даведвацца нешта новае і цікавае, — сказала ў сваім віншаванні дырэктар Турэцкай СШ Галіна Хаменка. — Вы адпраўляецеся ў цікавае плаванне па краіне ведаў, і я жадаю, каб ваш караблік не ведаў рыфаў і бур, каб вы знайшлі ў гэтым падарожжы надзейных сяброў, а ў будучым знайшлі сябе і працавалі на карысць нашай з вамі Радзімы.
— Дзяржава робіць усё магчымае, каб вы, паважаныя вучні, раслі разумнымі, спрытнымі, кемлівымі, — адзначыў старшыня Карэліцкага раённага Савета дэпутатаў Аляксей Гаўрош. — Але і перад вамі стаіць важная і адказная задача: добра вучыцца, упітваць веды, расці сапраўднымі патрыётамі Беларусі і пасля, калі вы знойдзеце сваю прафесію, працаваць на карысць нашай краіны. Я жадаю вам, паважаныя першакласнікі, раўняцца на лепшых вучняў вашай школы, прыкладаць намаганні і дабівацца поспехаў. У добры шлях!
Аляксей Іванавіч уручыў першакласнікам падарунак Прэзідэнта Рэспублікі Беларусь Аляксандра Лукашэнкі — кнігу “Беларусь — наша Радзіма”, а таксама падарунак ад раённага Савета дэпутатаў для школы — грашовы сертыфікат.
На лінейцы былі і тыя, для каго сённяшні першы званок стане апошнім у школьным жыцці — адзінаццацікласнікі. Яны далі наказ сваім маленькім пераемнікам: шанаваць настаўнікаў, любіць вучобу, берагчы школу.
Павіншавалі першакласнікаў старшыня Турэцкага сельвыканкама Мікалай Шуляк і намеснік старшыні па ідэалагічнай рабоце КУСП “Чарняхоўскі-Агра” Алена Макар, якая ўручыла рабятам падарункі ад прадпрыемства. Благаславіў рабят на добрую вучобу іерэй Андрэй Абрамовіч.
Адразу пасля лінейкі вучні адправіліся на першы ў гэтым навучальным годзе ўрок, прысвечаны тэме “Нам ёсць чым ганарыцца, нам ёсць што берагчы!”.
Сяргей СТОЛЯР
Фота аўтара
