Карэліччына далучаецца да святкавання Міжнароднага дня лясоў і дае старт акцыі па аднаўленні ветравальна-бураломных участкаў «Дай лесу новае жыццё!».
Акцыя, накіраваная на лесааднаўленне пасля разгулу леташняй ліпеньскай стыхіі, пройдзе ў краіне з 21 сакавіка па 12 красавіка. Восенню мінулага года старт ініцыятыве Мінлясгаса даў асабіста Прэзідэнт Беларусі Аляксандр Лукашэнка, пасля чаго яе падхапілі ўсе вышэйшыя службовыя асобы, кіраўнікі міністэрстваў, камітэтаў, канцэрнаў і ведамстваў. Нагадаем той факт, што ў Навагрудскім лясгасе, да якога належаць і лясы Карэліцкага раёна, пасля разгулу летняй стыхіі 2024 года пацярпелі 118,9 га. У Карэліцкім лясніцтве – парадку 85 га. Увосень агульнымі намаганнямі было пасаджана 40 га маладога лесу. Таму сёлета падчас акцыі асноўны фронт работ трэба будзе выканаць у лясах Карэліцкага лясніцтва на 35 га, дзе цяпер актыўна вядзецца падрыхтоўка глебы пад будучыя лесапасадкі. Сімвалічна, што ў гэты раз акцыя пройдзе пад эгідай Года добраўпарадкавання і 80-годдзя Перамогі ў Вялікай Айчыннай вайне.
Чакаецца, што акцыю, як і ў папярэднія гады, падтрымаюць працоўныя калектывы, навучэнцы і проста нераўнадушныя карэліччане. Каб прыняць у ёй удзел, добраахвотнікам неабходна звязацца з пэўным лясніцтвам і заявіць пра сваё жаданне. Неабходна нагадаць, што на Карэліччыне працуюць чатыры лясніцтвы: Карэліцкае, Мірскае, Ярэміцкае і Свіцязянскае. Лесагаспадарчыя ўстановы галіны забяспечаць валанцёраў інвентаром і пасадачным матэрыялам.
Лесапасадкі будуць арганізаваны ва ўсіх лясніцтвах раёна, але работнікі лясной гаспадаркі заклікаюць усіх нераўнадухных грамадзян аказаць дапамогу Карэліцкаму лясніцтву, якое найбольш пацярпела ад разгулу стыхіі. Тут кожная пара рук і ўклад добраахвотнікаў у аднаўленне лясоў будзе ўдвая каштоўны.
Далей дзейнічаючая ініцыятыва працягнецца акцыяй «Лес! Дабрыня! Парадак!», якая стартуе з 12 красавіка. Фінішуе мерапрыемства 1 мая ў Свята працы. Такім чынам, у Год добраўпарадкавання лясгас правядзе сапраўдны марафон з добраахвотных акцый.
