На Карэліччыне штогод зацвярджаюцца і рэалізуюцца мерапрыемствы па навядзенні парадку на зямлі і добраўпарадкаванні: прыводзяцца ў парадак тэрыторыі населеных пунктаў, сельскагаспадарчых аб’ектаў, палос адводу аўтамабільных дарог, ляснога фонду, уладкоўваюцца зоны адпачынку на водных аб’ектах, крыніцы. За каментарыем аб навядзенні парадку на зямлі і добраўпарадкаванні тэрыторый населеных пунктаў раёна звярнуліся да начальніка ўпраўлення жыллёва-камунальнай гаспадаркі, архітэктуры і будаўніцтва Карэліцкага райвыканкама Ірыны Малышавай:
– Пытанне навядзення парадку на зямлі і добраўпарадкавання тэрыторый комплекснае, яно ўключае ў сябе дзейнасць па добраўпарадкаванні, азеляненні і падтрыманні ў належным стане тэрыторый раёна. Каардынуе гэтую дзейнасць Карэліцкая раённая інспекцыя прыродных рэсурсаў і аховы навакольнага асяроддзя, якая працуе ў цесным узаемадзеянні з мясцовымі органамі ўлады, землеўпарадкавальнымі службамі, органамі, якія ажыццяўляюць дзяржаўны санітарны нагляд, арганізацыямі жыллёва-камунальнай гаспадаркі і іншымі ведамствамі.
Сёлета ў пачатку лютага быў зацверджаны раённы план мерапрыемстваў па добраўпарадкаванні. Ім прадугледжаны ўсе мерапрыемствы, якія з гэтай нагоды будуць праводзіцца на тэрыторыі раёна. Ён закранае пытанні капітальнага рамонту будынкаў і дамоў, добраўпарадкавання і азелянення гарадскіх дваровых тэрыторый, прывядзення ў парадак тэрыторый агульнага карыстання, рамонту вулічна-дарожнай сеткі і многія іншыя.
Да выканання кожнага мерапрыемства неабходна падыходзіць комплексна і ў дакладна ўстаноўленыя тэрміны. На двары вясна. Шэраг запланаванага можна пачынаць выконваць ужо сёння. На зямлі павінен быць парадак, у тым ліку і на ўчастках, якія знаходзяцца ў прыватнай форме ўласнасці.
Таму ўсім жыхарам раёна неабходна актыўна ўключыцца ў навядзенне парадку на прыдамавых тэрыторыях, утрымліваць у парадку жылыя дамы, гаспадарча-бытавыя пабудовы і вулічныя агароджы, падтрымліваць чысціню і парадак на прыдамавой і прылеглай да яе тэрыторыі, своечасова падкошваць, забяспечыць выкарыстанне зямельных участкаў, прадастаўленых для вядзення асабістай падсобнай гаспадаркі, агародніцтва, у адпаведнасці з іх мэтавым прызначэннем, не дапускаць зарастання іх пустазеллем.
У выпадку невыканання патрабаванняў па навядзенні чысціні згодна з артыкулам 22.9 Кодэкса Рэспублікі Беларусь аб адміністратыўных правапарушэннях прадугледжаны штраф ад дзвюх да пятнаццаці базавых велічынь.
Неабходна нагадаць і той факт, што ў ходзе мерапрыемстваў па навядзенні парадку на зямлі будзе ажыццяўляцца маніторынг выканання заканадаўства ў галіне абыходжання з адходамі. Асаблівая ўвага пры правядзенні такіх абследаванняў будзе надавацца наяўнасці несанкцыянаваных звалак адходаў на тэрыторыях прадпрыемстваў і арганізацый, прыдарожных палосах, месцах адпачынку, а таксама пытанням абуладкавання месцаў збору адходаў з тэрыторыі могілак, прывядзенню ў належны стан мемарыяльных комплексаў, абыходжання з другаснымі матэрыяльнымі рэсурсамі. Таму неабходна не толькі прыбіраць смецце, а правільна праводзіць яго ўтылізацыю. І такая сумесная праца будзе працягвацца, бо якасць жыцця нашых жыхароў – гэта галоўная задача не толькі органаў мясцовай улады, але і ўсіх, хто пражывае ў нашым выдатным краі.
