Светлае Хрыстова Уваскрэсенне — асноўнае свята царкоўнага календара. Яго яшчэ называюць Вялікдзень, Пасха, Паска. Гэта любімае сямейнае свята.
«Дзе нарадзіўся…»
Наталія і Аляксандр родам з Міра. Тут нарадзіліся і вучыліся, адсюль адправіліся ў вялікую дарогу. Для паступлення выбралі адзін каледж — Мінскі індустрыяльна-педагагічны: дзяўчына — спецыяльнасць настаўніка чарчэння і тэхнічнай працы, а юнак — факультэт прамысловага і грамадзянскага будаўніцтва. Пасля заканчэння ўстановы вярнуліся на малую радзіму.
— Я пайшла працаваць у дзіцячы сад г.п. Мір выхавальнікам. Ён жа ў хуткім часе ўладкаваўся аператарам аўтазаправачнай станцыі, — апавядае Наталія Аляксандраўна. — У дашкольнай установе адпрацавала дваццаць гадоў і вырашыла змяніць прафесію. Перайшла аператарам на АЗС і працую амаль чатыры гады. Муж зараз загадчык склада гаруча-змазачных матэрыялаў КСВУП «Птушкафабрыка «Чырвонаармейская».
Дом сям’я Русецкіх пабудавала з дапамогай ільготнага крэдыту. Сямнаццаць гадоў таму з’явілася гэтая задумка. Пачыналі будоўлю, калі ў сям’і было толькі адно дзіця, а справілі наваселле, калі іх было ўжо трое.
Бацькі з задавальненнем расказвалі пра дзяцей. Школьнікі стараюцца вучыцца добра. Маша захапляецца спевамі і маляваннем, Ваня — музыкай і спортам. Старэйшая Анастасія скончыла Баранавіцкі дзяржаўны прафесійна-тэхнічны каледж сферы абслугоўвання па спецыяльнасці страхавы агент і кравец-закройшчык.
Развівае духоўна
Наталія, колькі сябе памятае, на вялікія святы хадзіла ў царкву з мамай. Перад Днём ведаў яна вадзіла дачку да споведзі. Матуля старалася наведваць святыню кожную нядзелю, была з веруючай сям’і.
— Я ў сярэдніх класах хадзіла ў нядзельную школу пры царкве Жываначальнай Святой Троіцы г.п. Мір. Выкладаў Закон Божы айцец Вячаслаў Івашкевіч, — паведала жанчына і дадала, што ўсе трое дзяцей таксама наведвалі нядзельную школу. Іван з’яўляецца панамаром у царкве. Дачка Маша разам з удзельнікамі гуртка «Духоўнасць», які створаны ў СШ г.п. Мір імя Г.І. Сташэўскай, і кіруе ім Ала Аркадзьеўна Крапіўніцкая, рыхтуюць невялікія выступленні на святы.
Летась Маша заняла першае месца ў праваслаўнай раённай алімпіядзе, а ў вобласці — другое.
Па словах бацькоў, гэта духоўна развівае дзяцей, згуртоўвае сям’ю. Дзеці растуць сумленнымі, паслухмянымі, міласэрнымі, яны ўмеюць спачуваць іншым, паважаюць старэйшых, не крыўдзяць меншых.
Наталія Аляксандраўна і Аляксандр Мікалаевіч таксама не застаюцца ў баку ад духоўнага жыцця. Яны спяваюць на клірасе ў царкве Святой Жываначальнай Троіцы г.п. Мір.
Да таго ж Наталія — старшая сястра Сястрыцтва блажэннай Ксеніі Пецярбургскай, а муж чытае малітвы на Літургіі.
— Вера — сэнс усяго зямнога жыцця, — у сваю чаргу адзначае Аляксандр. — Яна дапамагае ва ўсім: на рабоце, у сямейных адносінах, у цяжкіх жыццёвых абставінах. Трэба таксама не забываць дзякаваць Бога за радасць і гора.
Рыхтуюцца да Вялікадня
У сям’і Русецкіх з трапяткімі пачуццямі ў сэрцы рыхтуюцца да Светлага Хрыстова Уваскрэсення. Асабліва клапатлівымі бываюць дні ў апошні тыдзень перад Вялікаднем. Сямейнікі стараюцца наведваць усе службы ў царкве, дапамагаюць упрыгожыць святыню, каб убранства дабаўляла прыхаджанам у сэрцы больш радасці.
Дом з’яўляецца для сям’і райскім куточкам, дзе таксама павінны заўсёды быць чысціня і парадак. Старэйшыя і меншыя стараюцца прыкласці рукі — у пакоях становіцца яшчэ больш светла, чыста, утульна.
Шмат увагі гаспадыня надае і прыгатаванню страў да велікоднага стала: пячэ кулічы, фарбуе яйкі, смажыць мяса, гатуе іншыя стравы. Усе чакаюць Вялікага дня, каб разам сесці за святочны стол, павіншаць блізкіх са святам, выказаць найлепшыя пажаданні.
Наталія Аляксандраўна і сёння памятае матуліны булкі, духмяныя і з рознымі начынкамі: тварагом, макам, карыцай, павідлам. Іх вельмі чакала і любіла з малаком. «Гэта былі самыя смачныя булкі ў свеце», — адзначае субяседніца і прызнаецца, што зараз кулінарнымі вырабамі займаецца сама.
Галіна СМАЛЯНКА
Фота Сяргея СТОЛЯРА
