Транспартныя артэрыі – візітная картка любога рэгіёна. Зрабіць іх якаснымі, прывабнымі і надзейнымі – галоўная задача дарожных службаў. Мясцовая сетка не выключэнне. У Год добраўпарадкавання ў Карэліцкім раёне гэтаму пытанню – належная ўвага. Прыкметны ўклад тут уносяць дарожнікі – работнікі ДРБУ-158. Сёлета, як толькі дазволілі ўмовы надвор’я, яны без прамаруджвання прыступілі да працы – рамонту асфальтабетоннага пакрыцця дарог у горадзе і на вёсцы.
Карэспандэнт газеты “Полымя” сустрэлася з намеснікам старшыні Карэліцкага райвыканкама Дзмітрыем Манілам, каб даведацца, як ідуць справы з карэліцкімі артэрыямі і якія далейшыя перспектывы.
– На працягу дзясяткаў гадоў запар у раёне актыўна ўвасабляюцца ў жыццё розныя праграмы. Наша галоўная задача – гэта стварэнне камфортных умоў для пражывання грамадзян, павышэнне якасці жыцця на вёсцы, узроўню дабрабыту насельніцтва. Адна з такіх праграм – праграма па добраўпарадкаванні вуліц і дарог. Складаючы перспектыўны план рамонту дарожных сетак, заўсёды ўлічваюцца звароты грамадзян да кіраўніцтва раёна, а таксама ў службу “адно акно”. Усе яны адпрацоўваюцца і вывучаюцца спецыялістамі з выездам на месцы.
У 2025 годзе Карэліцкім ДРБУ-158 будзе адрамантавана прарадку 29 км дарог.
Да бягучага рамонту дарог сёлета дарожнікі прыступілі ў сакавіку. Зараз работы ў разгары, і яны вядуцца па ўсіх напрамках у рамках выдзяляемага фінансавання. Дарэчы, ужо выкананы запланаваныя работы на ўчастках дарог Міратычы-Дуброва-Райца (1,9 км), адрамантаваны і падсыпаны пад’езд да вёскі Моладава Малюшыцкага сельсаваета, праведзены рамонт участкаў Райца-Цырын-Навасёлкі (4,2 км), Беразавец-Лукі-Далматаўшчына (6,95 км), зараз работы вядуцца на дарозе Трашчычы-Вялікія Жухавічы-Цырын (3,78 км).
Акрамя суцэльнага асфальтавання, праводзіцца ямачны рамонт асфальтаваных аўтадарог, грэйдзіраванне дарог са жвіровым пакрыццём, абнаўляецца дарожная разметка.
Зараз на тэрыторыі нашага раёна працуе брыгада работнікаў ДЭУ-56. Іх сіламі ўздоўж дарогі Навагрудак-Парачаны-Нясвіж ў г.п. Карэлічы праведзены дэмантаж амаль 200 метраў агароджы. Неўзабаве на яе месцы будзе ўстаноўлена сучасная, ацынкаваная. Іх сіламі абноўлены прыпыначны пункт у агр. Турэц. Вядуцца работы па абнаўленні ўчастка дарогі з 81 па 87 км.
Карэспандэнт раённай газеты накіравалася па маршруце адрамантаваных дарог. Абноўленае асфальтавае пакрыццё, новая дарога замест жвіровай, вядома ж, – гэта вялікая радасць для сельскіх жыхароў. Яны так і гавораць: “Ну вось, прыйшло свята і на нашу вуліцу!” Сапраўды, як ні радавацца, калі разухабістая дарога мяняецца на асфальтаваную. Гэта сапраўднае шчасце і для вадзіцеляў, і для пешаходаў, і для веласіпедыстаў.
Вось рэдакцыйная машына тэсціруе абноўленае асфальтавае пакрыццё на дарозе Беразавец-Лукі-Далматаўшчына. Дарога гэта сапраўды вельмі запатрабаваная. У агр. Лукі, уздоўж абноўленага ўчастка, акрамя жылых дамоў, размяшчаецца Лукская амбулаторыя ўрача агульнай практыкі і бальніца сястрынскага догляду УАЗ “Карэліцкая ЦРБ”, а яшчэ яна частка злучальнага звяна паміж агр. Жухавічы і Цырын.
Тое, што асфальт кладуць якасна і ехаць цяпер адно задавальненне, пацвердзілі і аўтааматары, якія праязджаюць міма. Так, жыхарка агр. Жухавічы Антаніна Жухаўцава адзначыла, што ёй вельмі часта даводзіцца ездзіць, у тым ліку і па гэтай дарозе.
– Дарога – проста клас! – адзначыла жанчына і выказала словы падзякі ўсім датычным да справы.
Увогуле, жыхары Карэліччыны ўпэўнены, што дзякуючы новым дарогам цікавасць нават да маленькіх вёсачак узрастае. А калі гаварыць пра аграгарадкі, то яны не толькі забяспечаны ўсёй інфраструктурай, але і газіфікаваны, і электрыфікаваны і знаходзяцца ўсяго ў 120 км ад Мінска. Чаму ж не зацікавіцца аматарам прыроды, якія мараць купіць домік у вёсцы?
У агр. Жухавічы месца дыслакацыі “рэстаўратараў” дарог пазначана інфармацыйнымі і папераджальнымі знакамі. А вось і самі “дарожныя лекары”. Шчыруе брыгада пад пільным кантролем майстра ДРБУ-158 Аляксандра Кадлубая.
– Праца выконваецца строга ў адпаведнасці з тэхналогіяй і тэрмінамі, – запэўніў майстар.
– А адкуль асфальтабетон?
– Ужо не адзін дзясятак гадоў у нас на прадпрыемстве працуе асфальтабетонны завод, на якім з ранняй вясны і да снежня вырабляецца прадукцыя для пакрыцця дарог. Устаноўленае на заводзе абсталяванне дазваляе выпускаць асфальтабетон палепшанай якасці, які можна ўкладваць нават пры замаразках. Вырабляемы штодня асфальтабетон адразу ж ідзе ў справу.
Удзячныя раённай уладзе, дарожнай службе за ўвагу да іх праблем і жыхары вёскі Асташын Лукскага сельсавета. Валянціна Судзібор, да прыкладу, распавяла, што пытанне рамонту дарогі Райца-Цырын-Навасёлкі аднавяскоўцы не аднойчы агучвалі падчас сходаў грамадзян.
– Мы вельмі рады таму, што пытанні і праблемы сельскіх жыхароў не застаюцца па-за ўвагай і планамерна вырашаюцца. Цяпер у нас добрая дарога, ездзіць па ёй – адно задавальненне. Хочацца хутчэй прычакаць асфальтавання дарогі і на ўчастку каля вёскі Сэрвач. Тады да райцэнтра можна будзе дабірацца і хутчэй, і танней, а галоўнае з камфортам.
Кацярына КУКАНАВА
Фота аўтара
