Прэзідэнт Рэспублікі Беларусь Аляксандр Лукашэнка аб’явіў 2026-ы Годам беларускай жанчыны. Указам нумар адзін Кіраўніка дзяржавы выказана вялікая ўвага да прыгожай паловы чалавецтва. Жанчыны на рабочых месцах, у сваіх сем’ях, на грамадскіх пасадах праяўляюць вялікую актыўнасць і адказнасць. Творчыя, ініцыятыўныя, працавітыя, яны любяць сваю краіну і ўсё робяць для таго, каб яна з кожным годам квітнела.
Сёння наш субяседнік — начальнік сектара культуры Карэліцкага раённага выканаўчага камітэта, старшыня раённай арганізацыі грамадскага аб’яднання «Беларускі саюз жанчын» Наталля Леанідаўна Шпакоўская.
— Наталля Леанідаўна, як Вы ўспрынялі гэтую навіну?
— Да глыбіні душы ўсхваляваў Указ Прэзідэнта аб аб’яўленні 2026-га Годам беларускай жанчыны. Аб гэтым Кіраўнік паведаміў у навагоднюю ноч, і навіна ўспрынялася па-асабліваму. Беларуская жанчына заслугоўвае ўвагі і павагі. Разам з тым на нас ускладаецца і вялікая адказнасць. У далейшым мы павінны прадаўжаць знаходзіцца на пярэднім краі, а давер падмацоўваць канкрэтнымі справамі на працы, у сям’і і жыцці. Гэта нашым жанчынам па плячы, што яны даказваюць неаднойчы. Трэба ісці наперад і заяўляць пра сябе.
— Існуе меркаванне, што без мінулага няма будучага. Давайце ўспомнім пра славутых жанчын Карэліччыны, якія ўнеслі вялікі ўклад у яе развіццё.
— Гэта наш гонар. Сярод іх Героі Сацыялістычнай Працы: Таццяна Рыгораўна Арда, Вольга Лукінічна Калоша, Ева Раманаўна Карачан, Надзея Сцяпанаўна Трускоўская, Яўгенія Іосіфаўна Юшко, Тамара Уладзіміраўна Чубрык; лаўрэаты Дзяржаўнай прэміі СССР: Зінаіда Паўлаўна Грыбок, Ларыса Васільеўна Яроцкая, Ванда Пятроўна Напорка; занесеныя ў Кнігу Славы Карэліцкага раёна: Ніна Сцяпанаўна Свірыд, Галіна Паўлаўна Калтунова, Лідзія Іосіфаўна Нагорная, Ганна Канстанцінаўна Шклярж, Кацярына Ціханаўна Ушкевіч, Ганна Аляксандраўна Жарская і многія іншыя.
— Якая ўвага праяўляецца з боку кіраўніцтва раёна да жанчын Карэліцкага краю?
— Стала добрай традыцыяй праводзіць урачыстыя прыёмы ў старшыні Карэліцкага райвыканкама да 8 Сакавіка і Дня маці. На сустрэчы запрашаюцца працаўніцы калектываў раёна з розных галін народнай гаспадаркі і ім адрасуюцца словы прызнання і ўдзячнасці, уручаюцца падарункі. Жанчыны задаюць кіраўніцтву раёна цікавячыя і хвалюючыя пытанні.
— Колькі пярвічных арганізацый налічваецца ў БСЖ і колькі ў ёй чалавек?
— Сёння раённая арганізацыя Беларускага саюза жанчын — гэта 26 пярвічак. У нашах радах налічваецца 667 чалавек.
— У чым галоўная каштоўнасць БСЖ для сучаснай жанчыны?
— Гэта павышэнне статусу, абарона правоў жанчыны, умацаванне сям’і, прасоўванне традыцыйных каштоўнасцей, патрыятычнае выхаванне, раскрыццё жанчыны як асобы.
— У якіх мерапрыемствах удзельнічаюць члены РА ГА «Беларускі саюз жанчын»?
— Па-першае, ва ўсіх грамадска-палітычных працэсах і выбарчых кампаніях. Па-другое, у добраўпарадкаванні воінскіх могілак і памятных месцаў. Наведваюць былых вязняў у Міжнародны дзень вызвалення вязняў фашысцкіх канцлагераў, да 80-годдзя вызвалення Беларусі ад нямецка-фашысцкіх захопнікаў арганізавалі выставу «Жаночы твар Перамогі». Па-трэцяе, да новага навучальнага года ў дабрачыннай акцыі «Збяром заплечнік» для шматдзетных сем’яў. Па-чацвёртае, у рэспубліканскіх дабрачынных акцыях «Нашы дзеці» і «Ад усёй душы».
— У цэнтры ўвагі БСЖ на працягу ўсёй дзейнасці была і застаецца сям’я і яе інтарэсы. Якія мерапрыемствы праводзяцца на Карэліччыне?
— Кола мерапрыемстваў разнастайнае. Да прыкладу, хочацца ўспомніць пра маштабны Тыдзень бацькоўскай любові, прымеркаваны да Дня маці і Дня бацькі. У ім прыняла ўдзел вялікая колькасць сем’яў, а ўдзельнікамі сталі прадстаўнікі розных арганізацый і ўстаноў раёна. Былі ўшанаваны шматдзетныя сем’і, жадаючыя атрымалі бясплатныя прававыя кансультацыі спецыялістаў, праведзены дыялогавыя пляцоўкі, літаратурныя гасцёўні, адбыліся спартландыі, паказаны канцэрты і іншыя мерапрыемствы.
— Хто з’яўляецца памочнікамі РА ГА «Беларускі саюз жанчын»?
— Надзейнымі памочнікамі заўсёды застаюцца мой намеснік, дырэктар Карэліцкай раённай бібліятэкі Лілія Арцюх і лідар маладзёжнага крыла БСЖ, галоўны бухгалтар КУСП «Чарняхоўскі-Агра» Юлія Трот. Хочацца адзначыць, што члены БСЖ таксама падтрымліваюць у карысных справах. Да таго ж, мы не адзіныя ў сваіх памкненнях. Як гаворыцца, працуем у адной звязцы з прадстаўнікамі раённых грамадскіх арганізацый: Белая Русь, Беларускі дзіцячы фонд, Беларускі фонд міру, Чырвоны Крыж, прафсаюзамі, партыяй «Белая Русь».
— Вашы пажаданні жанчынам Карэліччыны.
— Каб здароўе было моцным, поспех спадарожнічаў у працы, утульна і светла было ў дамах, мары і задумкі збываліся.
Галіна СМАЛЯНКА
Фота Андрэя ДЗЯНІСКА
