З нагоды прафесійнага свята — Дня работнікаў бытавога абслугоўвання насельніцтва — журналіст гутарыць з дырэктарам Карэліцкага ўнітарнага камунальнага прадпрыемства бытавога абслугоўвання насельніцтва Алай Пятроўнай Маковік.
— Ала Пятроўна, што ўяўляе сабой служба быту?
— Служба быту сёння праводзіць шматпрофільную работу: гэта аказанне бытавых паслуг насельніцтву і выкананне заказаў прадпрыемстваў і арганізацый па шыцці спецвопраткі, рознічны і аптовы гандаль, а таксама вытворчая дзейнасць. У планах на бягучы год — нарошчванне аб’ёмаў дзейнасці. А каб задуманае заўсёды ператваралася ў жыццё, неабходны надзейныя, працавітыя і адказныя людзі. Сёння з упэўненасцю магу сказаць, што ўсе працуюць добрасумленна, адказна адносяцца да даручанай справы. Многія работнікі ўжо не адзін дзясятак гадоў адданыя сваёй прафесіі, маюць вялікі вопыт работы.
— Як папрацавалі ў мінулым годзе?
— Работнікам службы быту Карэліччыны ўдалося дасягнуць значных вынікаў у працы: з года ў год займаем перадавыя пазіцыі ў Гродзенскай вобласці сярод прадпрыемстваў бытавога абслугоўвання. 2025 год стаў яшчэ адным годам стабільнай работы калектыву. Выкананы ўсе даведзеныя ключавыя паказчыкі дзейнасці.
У 2025 годзе выручка ад рэалізацыі прадукцыі, тавараў, работ і паслуг склала 2,8 млн рублёў, што вышэй узроўню папярэдняга года. Аказана бытавых паслуг насельніцтву на суму 410 тыс. рублёў, у тым ліку ў сельскай мясцовасці на суму 80 тыс. рублёў. Выпушчана прамысловай прадукцыі на суму 1,2 млн рублёў, у тым ліку 19 тыс. адзінак пасцельнай бялізны, 9 тыс. адзінак спецадзення, 6 тыс. адзінак кухоннай і сталовай бялізны.
Прадпрыемства працуе прыбыткова. Атрымана чыстага прыбытку 19 тыс. рублёў. Рэнтабельнасць продажу склала 0,6 працэнта.
— Як справы з матэрыяльна-тэхнічнай базай?
— Прадпрыемства пастаянна накіроўвае значныя фінансавыя сродкі на абнаўленне матэрыяльна-тэхнічнай базы, на паляпшэнне ўмоў працы работнікаў. Ажыццёўлены бягучы рамонт фасада будынка Дома быту ў г.п. Карэлічы, рамонт уваходнай зоны ў Дом быту, выкананы бягучыя рамонты ўнутраных памяшканняў комплексных прыёмных пунктаў у г.п. Мір і аграгарадку Райца. Паколькі ўся работа прадпрыемства звязана са швейнай вытворчасцю, пастаянна яе абнаўляем. Набыццё ў 2024 годзе новых швейных машын для працаўнікоў швейнага цэха дазволіла не толькі палепшыць якасць выпускаемых вырабаў, але значна аблегчыць працу і павысіць прадукцыйнасць працы швачак.
На інвестыцыйныя мэты ў 2025 годзе накіравана 21 тысяча асабістых сродкаў прадпрыемства: набыта касавае абсталяванне для ўкаранення сістэмы прасочвання рэалізацыі тавараў, маркіраваных уніфіцыраванымі знакамі ці сродкамі індэнтыфікацыі.
— Што ўяўляе сабой швейная вытворчасць?
— Асаблівая адказнасць прадпрыемства — работа швейнай галіны. У швейнай вытворчасці занята 16 чалавек (10 швачак, 3 раскройшчыкі і 3 краўцы). Узначальвае і арганізуе іх працу майстар швейнага цэха Т. Г. Уласевіч. За 2025 год швейнай галіной прадпрыемства выраблена гатовай прадукцыі на суму 1214 тыс. рублёў: пасцельнай, сталовай і кухоннай бялізны 25 тыс. адзінак, спецадзення — 9 тыс.; 4 тыс. штук коўдраў, падушак, пледаў і пакрывалаў; 5 тыс. рабочых рукавіц. Акрамя таго, выканана рамонтаў швейных вырабаў на суму 17 тыс. рублёў.
— Як працуюць цырульнікі вашага прадпрыемства?
— Як вядома, добрая прычоска — добры настрой. А яшчэ падстава адчуць сябе прыгожай, а значыць і ўпэўненай у сабе. Уменне ствараць такі ўнутраны настрой дарагога каштуе. І нашы цырульнікі ведаюць гэта як ніхто іншы. У кожнага з іх пастаянныя кліенты, ёсць і свае маленькія сакрэты таго, як дагадзіць кожнаму чалавеку. Аднак галоўным у гэтай справе было і з’яўляецца высокае прафесійнае майстэрства. На прадпрыемстве працуе 6 цырульнікаў, з іх 4 — у Доме быту райцэнтра, 2 — у комплексным прыёмным пункце ў г.п. Мір — гэта і маладыя спецыялісты, і масцітыя прафесіяналы. Насельніцтву раёна аказана цырульных паслуг у памеры 258 тыс. рублёў, што на 15 працэнтаў больш, чым у папярэднім годзе. У сярэднім за месяц кожны цырульнік аказвае паслуг больш чым на 3,5 тыс. рублёў, калі перавесці гэта на стрыжкі, то кожны з іх абслугоўвае за месяц 200 і больш чалавек.
— Хацелася пачуць пра функцыянаванне комплексных прыёмных пунктаў у раёне.
— Комплекс першай дапамогі. Менавіта так смела можна назваць сёння комплексныя прыёмныя пункты, якія з’яўляюцца свайго роду маленькімі філіяламі прадпрыемства ў аграгарадках і цэнтральных сядзібах гаспадарак. Сёння пасля праведзеных мерапрыемстваў па аптымізацыі сеткі сельскіх КПП і ў мэтах скарачэння страт у структуры прадпрыемства працуюць 4 сельскія КПП. Яны знаходзяцца ў аграгарадках Райца, Ярэмічы, Лукі, Жухавічы. У іх працуюць прыёмшчыкамі заказаў Наталля Малышчык (Жухавічы), Ірына Грэмяка (Лукі), Ірына Цярэшка (Райца), Таіса Бянецкая (Ярэмічы). Яны шчыра перажываюць за справу і заўсёды гатовы ісці насустрач любым просьбам вяскоўцаў. Гэта не толькі прыёмшчыкі заказаў, а сапраўдныя гаспадыні, гасцінныя, прыветлівыя, добразычлівыя, якія ўмеюць выслухаць і прапанаваць кліенту патрэбныя тавар ці паслугу. Нашымі сельскімі КПП за 2025 год аказана бытавых паслуг насельніцтву на суму 78 тыс. рублёў.
— Кадры вырашаюць усё — лозунг з савецкіх часоў. Што можаце сказаць аб працуючых на прадпрыемстве?
— На прадпрыемстве працуе 50 чалавек. Больш 90 працэнтаў калектыву — жанчыны. На нашых мужчын ускладзена адказная функцыя — дастаўка тавараў, прадукцыі і паслуг спажыўцу, таму што больш за 50 працэнтаў выручкі прадпрыемства атрымана ад рэалізацыі прадукцыі за межамі раёна. Акрамя таго, вадзіцелі аўтамабіляў сумесна з прыёмшчыкамі заказаў ажыццяўляюць выязное абслугоўванне сельскага насельніцтва раёна згодна з зацверджаным графікам.
Каб ісці ў нагу з часам, неабходна пастаянна развівацца. Крыху спыніўся — ужо не дагнаць, не паспець. Мы імкнёмся пашырыць свае рынкі збыту. Як і ў любой галіне, тут кадры вырашаюць усё. Стаўка робіцца менавіта на людзей, якія адданы справе, ініцыятыўных, неабыякавых, якія адносяцца да працы з агеньчыкам, хварэюць душой за гульную справу. Большасць працуе тут дзесяцігоддзямі, перажывае з прадпрыемствам і ўзлёты, і не самы лепшы час. Усе работнікі вельмі адказна адносяцца да даручанай справы. Шчыра віншую са святам і зычу здароўя, шчасця, дабрабыту. Словы ўдзячнасці адрасую ветэранам вытворчасці, і няхай добрая атмасфера напаўняе іх дамы. Усім міру на зямлі і ў душы!
З УЗНАГАРОДАЙ!
Дырэктар Карэліцкага ўнітарнага камунальнага прадпрыемства бытавога абслугоўвання насельніцтва Ала Пятроўна МАКОВІК узнагароджана Падзякай Міністра антыманапольнага рэгулявання і гандлю.
Галіна СМАЛЯНКА
Фота Кацярыны ЖАМОЙДЫ
