«Славянскі базар» заўсёды быў больш, чым культурная падзея. Ён — як люстэрка нашай гісторыі. Гісторыі не толькі суверэннай Беларусі, але гісторыі ўсяго свету. І не толькі культурнага свету».
Прэзідэнт Беларусі Аляксандр ЛУКАШЭНКА,
падчас адкрыцця ХХХV Міжнароднага фестывалю мастацтваў «Славянскі базар у Віцебску», 16 ліпеня 2026 г.
16 ліпеня гасцінна расчыніў свае дзверы ХХХV Міжнародны фестываль мастацтваў «Славянскі базар у Віцебску». У ім прыняў удзел народны фальклорны танцавальны калектыў «Спадчына» Карэліцкага раённага Цэнтра культуры і народнай творчасці». Мы гутарым з яго мастацкім кіраўніком Юліяй Шахрай.
— Юлія Раманаўна, «Славянскі базар» — гэта не проста музычны форум. Што ён сімвалізуе?
— Гэта месца, дзе людзі розных нацыянальнасцей, прыхільнікі розных песенных традыцый адчуваюць сябе, як дома. Напрыклад, у мінулым годзе у Віцебск прыехалі прадстаўнікі 44 дзяржаў. У гэтым годзе пабіты рэкорд — у нас гасцявалі творцы з 52 краін. Вось так, праз мастацтва і творчасць, Беларусь аб’ядноўвае краіны, дэманструючы сваю міралюбнасць і гасціннасць.
— Якія ўражанні засталіся пасля наведвання «Славянскага базару» ў Віцебску?
— «Славянскі базар» у Віцебску ўразіў сваімі маштабамі. Тут сабраліся лепшыя калектывы з усіх куткоў краіны і з-за мяжы. Яны паказалі сваё майстэрства ў розных накірунках дзейнасці. Гэта песні, танцы, выставы, кірмашы. Вочы разбягаліся ад разнастайных вырабаў з розных матэрыялаў і прываблівала гасціннасць удзельнікаў. Мяне па-добраму здзівіла вялікая колькасць моладзі на фестывалі, якая была задзейнічана ў розных накірунках дзейнасці. Яна спявала і танцавала на пляцоўках, і гэтым узнімала настрой у гасцей.
— Дзе давялося паўдзельнічаць на фестывалі?
— Танцавальныя пары нашага калектыву прынялі ўдзел у 13-м турніры нацыянальных танцаў «Танчым разам» у межах ХХХV Міжнароднага фестывалю мастацтваў «Славянскі базар у Віцебску». У ім прымалі ўдзел амаль 100 пар. Мы танцавалі фальклорныя танцы розных краін: «Во саду ли», «Заяц», «Какетка», «Матлёт», «Грачанікі», «Венгерка» — усіх дваццаць танцаў.
— Ваш візіт на сцэну «Славянскага базару» не першы?
—У 2025 годзе таксама прымалі ўдзел. Сёлета наша паездка ўспрымалася па-новаму: новыя ўражанні, новыя хваляванні, новыя знаёмствы і новы творчы вопыт. «Славянскі базар» — вялікае свята, якое надоўга застанецца ў памяці.
— «Славянскі базар» заўсёды быў асновай моцнага сяброўства. Вы сустрэлі сяброў у Віцебску?
— Так. Мы сустрэлі сяброў са Смаргоні і Слуцка. Яны былі таксама ўдзельнікамі турніру і выконвалі фальклорныя танцы.
— На фестывалі не абыйшлося без узнагарод. Ваша выступленне таксама адзначана?
— Нашы танцавальныя пары былі адзначаны Дыпломамі за зберажэнне і захаванне беларускай танцавальнай спадчыны. У фестывалі прынялі ўдзел Алена Лісоўская і Максім Кудзін, Мілана Сальвончык і Прохар Аляксееў, Руслана Палуян і Сямён Шах. Дарэчы, дзве апошнія пары выступілі ў конкурсах упершыню.
— Быць удзельнікам такога роду фестывалю — вялікі гонар і вялікая адказнасць. Як кіраўнік народнага фальклорнага танцавальнага калектыву ў чым бачыце яго карысць?
— Па-першае, гэта выдатная магчымасць вывучыць новыя танцы; па-другое, новыя знаёмствы; па-трэцяе, паказаць сябе, каб цябе заўважылі і запрасілі паўдзельнічаць у іншых фестывалях.
Мы толькі што прыехалі з фестывалю ў Віцебску, а ўжо рыхтуемся да ўдзелу ў міжнародным свяце «Вішнёвы фестываль» у г. Глыбокае Віцебскай вобласці.
Галіна СМАЛЯНКА
Фота прадастаўлена Карэліцкім РЦКіНТ
