Дзіцячыя садкі Карэліч цяжка назваць скупым словам “установы”. Бо гэта шчаслівыя планеты дзяцінства, дзе хлопчыкі і дзяўчынкі робяць першыя самастойныя крокі без мам і тат у будучае дарослае жыццё. І вялікая радасць, што дарога нашых карэліцкіх дзетак пачынаецца на адных з лепшых пляцовак у сістэме дашкольнай адукацыі Гродзенскай вобласці.
Як толькі мінаеш браму ясляў-сада № 1 у Карэлічах, чуеш звонкі дзіцячы смех, бачыш ласкавыя твары выхавальнікаў, то разумееш, чаму сёлета менавіта гэтае месца ўзнагароджана дыпломам І ступені ў абласным конкурсе на лепшую арганізацыю прадметна-прасторавага асяродку ва ўстановах дашкольнай адукацыі. Адказ просты: усё тут зроблена з любоўю да дзяцей. Ніхто з хлопчыкаў і дзяўчынак не застаецца без увагі, для кожнага выхавальнікі знаходзяць захапляльны занятак. Нездарма, і намінацыя, дзе яслі-сад перамаглі, гучыць як “Лепшы групавы пакой”.
Сапраўды, дзеткі шмат часу праводзяць разам. Улетку вельмі любяць забаўляцца на двары ў тэматычных альтанках, асабліва – беларускай. А яшчэ больш ім падабаецца той самы, ужо знакаміты на ўсю вобласць, набліжаны да хатняй абстаноўкі групавы пакой для гульняў. Там разам з выхавальнікамі Галінай Уладзіміраўнай Матчак і Вольгай Васільеўнай Шэўка хлопчыкі і дзяўчынкі, усяго 15 чалавек ва ўзросце ад 4 да 5 гадоў, нават могуць паспрабаваць сябе ў розных прафесіях.
Дзіцячыя наборы “Бальніца”, “Урач”, “Аптэка”, “Маракі – рыбакі”, “Выратавальнікі”, “Будаўнікі”, “Магазін” і іншыя дазваляюць маленькім выхаванцам у падгрупах лепш зразумець навакольны свет і іншых людзей. Апроч таго, у пакоі ёсць наступныя куткі: фізкультурны, дзяжурны, бяспекі жыцця, тэатральны, кніжны, краязнаўчы (этнаграфічны), экалагічны (з гародчыкамі на падваконніках), пазнавальнай практычнай дзейнасці (інтэлектуальны).
Таксама ў групе назбірана шмат займальнага нагляднага матэрыялу і развіваючых гульняў па такіх адукацыйных абласцях, як “Дзіця і прырода”, “Дзіця і грамадства”, “Элементарныя матэматычныя ўяўленні”, “Развіццё маўлення і культура маўленчых зносін”.
Варта зазначыць, што прадметна-прасторавы асяродак так ладна арганізаваны ў яслях-садзе № 1 таму, што таты і мамы, ды яшчэ бабулі і дзядулі дзяцей прымаюць ва ўсіх мерапрыемствах і праектах актыўны ўдзел. Толькі ва ўдалым тандэме “дзеці-выхавальнікі-бацькі” адукацыйны працэс можа быць максімальна эфектыўным.
Такой думкі прытрымліваецца і другі карэліцкі пераможца абласнога конкурсу ў намінацыі “Лепшая аўтарская гульня (цацка)”, уладальнік дыплома ІІ ступені – дашкольны цэнтр развіцця дзіцяці. Разам з бацькамі, часам толькі на адным аптымізме і энтузіязме, прадстаўнікі ўстановы зрабілі неверагоднае – адмысловую і крэатыўную дзіцячую прастору. А яскравым жыццём гэтае месца, безумоўна, напоўнілі эксклюзіўныя гульні і цацкі.
Сярод іх – пераможная серыя дыдактычных гульняў “Мая Беларусь” у аўтарстве намесніка загадчыка ўстановы па асноўнай дзейнасці Галіны Паўлаўны Жук. У гэтым праекце ўвасобіліся 30 год вопыту ў сферы дашкольнай адукацыі і шчырая любоў да мовы і роднага краю цудоўнага педагога.
Серыя складаецца з 14 гульняў, падзеленых на 4 блокі: “Сімвалы Беларусі”, “Прырода роднага краю”, “Дэкаратыўна-ўжытковае мастацтва і культура Беларусі”, “Беларускія народныя казкі”. Матэрыял падыходзіць, у першую чаргу, для індывідуальнай і падгрупавай працы з дзеткамі старэйшага дашкольнага ўзросту ў мэтах замацавання іх ведаў, набытых падчас асноўнага курса навучання.
Асабліва цікава наглядаць за адным з такіх заняткаў, калі хлопчыкі і дзяўчынкі ў нацыянальным убранні ў беларускім музейным кутку дашкольнага цэнтра слухаюць нашы казкі. Суцэльнае замілаванне і хараство імгнення! Да таго ж, ва ўстанове кожная пятніца – беларускамоўная. І гэта таксама нагода для радасці і гонару.
Мы віншуем нашы дашкольныя ўстановы з высокімі ўзнагародамі і ўпэўнены ў тым, што наперадзе іх чакае яшчэ больш плённая, удзячная і цікавая праца!
Марына КАЗЛОВІЧ
Фота аўтара
ЯСЛІ-САД № 1
ДАШКОЛЬНЫ ЦЭНТР РАЗВІЦЦЯ ДЗІЦЯЦІ
