16 чэрвеня пляцоўка каля Карэліцкага раённага цэнтра творчасці дзяцей і моладзі стала месцам правядзення раённага этапа сельскагаспадарчага рэспубліканскага конкурсу «Уладар сяла-2026». Дажджлівае надвор’е не стала перашкодай і не сапсавала настрой удзельнікам — яны як след паказалі сваё майстрства і актыўна ўдзельнічалі ў конкурсах.
Да ўдзельнікаў конкурсу звярнулася першы сакратар Карэліцкага РК ГА «Беларускі рэспубліканскі саюз моладзі» Вольга Аляшкевіч:
— Беларусь заўсёды славілася сваёй зямлёй, але галоўнае яе багацце — гэта людзі. Людзі, якія шчыра любяць свой край, умеюць сумленна працаваць і беражліва захоўваюць традыцыі продкаў. І сёння на гэтай пляцоўцы сабраліся лепшыя з лепшых — маладыя, актыўныя, дружныя і таленавітыя сем’і нашага раёна.
Гледзячы на вас, разумееш: беларуская вёска жыве, развіваецца і маладзее. Вы — яркі прыклад таго, што жыць і працаваць на зямлі — гэта ганарова, прэстыжна і сучасна. Вы паспяваеце ўсё: выхоўваць цудоўных дзяцей, трымаць гаспадарку, працаваць дзеля дабрабыту сваёй малой радзімы, пры гэтым заставацца творчымі і ініцыятыўнымі.
Праект «Уладар сяла» — гэта не проста конкурс. Гэта гімн сямейнаму шчасцю, вернасці, узаемавыручцы. Сёння вам неабходна прайсці нямала іспытаў і паказаць сваё майстэрства. Жадаю лёгкага старту, каманднага духу і выдатнага настрою. Няхай сёння пераможа мацнейшы, але галоўнае — гэты дзень падорыць нам усім незабыўныя эмоцыі і цяпло чалавечых зносін.
Для правядзення конкурсу «Уладар сяла-2026» было падабрана кампетэнтнае журы: першы сакратар РК ГА «Беларускі рэспубліканскі саюз моладзі» Вольга Аляшкевіч, галоўны бухгалтар Карэліцкай раённай прафсаюзнай арганізацыі Беларускага прафесійнага саюза работнікаў аграпрамысловага комплексу Алена Валчэцкая, галоўны спецыяліст аддзела ідэалагічнай работы і па справах моладзі Карэліцкага раённага выканаўчага камітэта Юрый Юрчык, намеснік дырэктара Карэліцкага раённага цэнтра дзяцей і моладзі Таісія Валошына.
«Уладар сяла-2026» складаўся з чатырох конкурсаў. Першы — візітная картка «Сардэчна запрашаем да нас!», у якім кожная сям’я расказала пра сябе, сваю сям’ю, сямейныя традыцыі, сяброў, захапленні. У другім конкурсе пад назвай «Купальскі вянок» гаспадыня пляла вянок з кветак. А вось трэці конкурс «Дранікі на калодзе» гаворыць сам за сябе — на драўлянай калодзе трэба было прыгатаваць любімую страву беларусаў — дранікі. «Сямейныя гульні» — чацвёрты конкурс, у якім удзельнікі паказалі спрыт і хуткасць.
А зараз пра ўдзельнікаў конкурсу «Уладар сяла-2026». Адразу зазначу, што гэта тры сям’і Карэліцкага раёна, розныя па ўзросце, занятках, захапленнях, але іх аб’ядноўвае тое, што яны ўжо напачатку былі пераможцамі ў нейкай ступені, бо добра паказалі сябе ў конкурсе. Пра кожную сям’ю можна расказваць бясконца.
Сям’я Алены і Дзмітрыя Коцік жыве ў вёсцы Баранавічы. У іх ёсць свой дом і вялікая гаспадарка: свінні, куры, трусы і агарод. Пятнаццаць гадоў як разам. Старэйшы сын Аляксандр служыць у арміі, на радасць бацькам падрастаюць 9-гадовы Рома і 6-гадовая Даша. Алена працуе майстрам Карэліцкага сырцэха, Дзмітрый — памочнікам загадчыка фермы «Машэвічы».
— Мы — дружная сям’я, падтрымліваем цёплыя адносіны з усімі сваякамі. Дзверы нашага дома заўсёды адкрыты добрым людзям. А вясёлая таму, што любім адзначаць усе святы разам, — гавораць Алена і Дзмітрый.
На пытанне «Адкуль бяруцца сілы і цярпенне?» жанчына адказвае: «Я маці траіх дзяцей, такіх мне любых і мілых, для дачкі — сяброўка, для сыноў — настаўнік і апора. Сям’я — мір, дабрыня і любоў.»
У сям’і Таццяны і Мікалая Шэўчык з вёскі Горная Рута свае сакрэты сямейнага шчасця. У ёй падрастаюць сыны Макар і Міраслаў. Па словах жонкі, галоўны ў сям’і муж, бо ён мужчына, працуе выратавальнікам у раённым аддзеле па надзвычайных сітуацыях. Таццяна — намеснік дырэктара па ідэалагічнай рабоце КСУП «Птушкафабрыка «Чырвонаармейская».
Вось што сказаў пра сваю спадарожніцу жыцця Мікалай: «Мая Таццяна — і гаспадыня, і прыгажуня. Яе пяшчоты хапае на ўсіх нас, яе працавітасць — прыклад для многіх». Сын Міраслаў дабавіў: «Люблю ўдзельнічаць у конкурсах, тут уся сям’я разам. Мае бацькі самыя лепшыя. Мама гатуе смачныя стравы, тата займаецца з намі. З братам Макарам любім спорт».
Самая маладыя ўдзельнікі конкурсу — сям’я Наталлі і Яўгена Салаўёвых з г.п. Мір. Яны прысвяцілі сябе медыцыне: ён — фельчар хуткай медыцынскай дапамогі, яна — медсястра тэрапеўтычнага аддзялення. У старажытным пасёлку маюць свой дом, у сям’і падрастае сын Максім. На святочным стале — свае прадукты: сала, яйкі, цыбуля, а таксама дамашнія хлеб і квас. Вочы радаваў прыгожы букет з васількоў і рамонкаў з уласнага кветніка. На пытанне «У чым сакрэт сямейнага шчасця?» адказалі: «Уступаем адзін аднаму і ідзём на кампраміс». Галава сям’і паведаў аб тым, што на конкурс прыехалі, каб праверыць сябе ў творчых іспытах. Сям’я Салаўёвых мае і свае захапленні: любяць хадзіць у паходы, іграць у шахматы, чытаць кнігі. На дзень нараджэння ў якасці падарунка адзін аднаму дораць класіку. Наведваюць выставы і тэатры.
Па выніках конкурсу «Уладар сяла» першае месца заняла сям’я Коцік з вёскі Баранавічы, другое — сям’я Шэўчык з вёскі Горна Рута, трэцяе — сям’я Салаўёвых з г.п. Мір.
СЛОВА — ПЕРАМОЖЦАМ КОНКУРСУ
Алена і Дзмітрый Коцік адзначаюць:
— У конкурсе «Уладар сяла» ўдзельнічаем у другі раз. Рыхтаваліся сур’ёзна. Пяклі тарты, пірагі, піражкі, гатавалі стравы. Хваляваліся — хацелася перамагчы. Дзеці Рома і Даша таксама з намі — мы ж адна сям’я. Больш за ўсё спадабаўся конкурс «Дранікі на калодзе». Іх гатавалі з маладой бульбы, якую вырасцілі на сваім прысядзібным участку.
Хочацца выказаць словы падзякі кіраўніцтву КСУП Малюшычы» і асаблівае прызнанне намесніку старшыні па ідэалагічнай рабоце Святлане Казак, якая нас натхніла на ўдзел у гэтым конкурсе і падтрымлівала на працягу яго правядзення.
Конкурс даў магчымасць пазнаёміцца з сем’ямі нашага раёна, на ім панавала сяброўская атмасфера. Удзячны і арганізатарам конкурсу за такую ўнікальную магчымаць праверыць свае здольнасці. На абласным конкурсе выступім дастойна, каб абараніць гонар Карэліцкага раёна і працаўнікоў сяла.
Галіна СМАЛЯНКА
Фота Кацярыны ЖАМОЙДЫ
