30 гадоў таму ў Беларусі, у Століне Брэсцкай вобласці, упершыню адсвяткавалі фестываль-кірмаш працаўнікоў вёскі «Дажынкі». У 2011 годзе абласное свята «Дажынкі» прымалі Карэлічы. Мы зазірнулі ў № 92 ад 23 лістапада 2011 года нашай раённай газеты і зараз дзелімся з вамі, як гэта было. Напярэдадні свайго прафесійнага свята — Дня работнікаў сельскай гаспадаркі і перапрацоўчай прамысловасці — у Карэлічы з’ехаліся перадавікі аграпрамысловага комплексу вобласці. У гэты дзень падводзіліся вынікі зробленага, ушаноўваліся лепшыя працаўнікі, ставіліся задачы на перспектыву. Вось асноўныя звесткі з сустрэчы.
За высокімі лічбамі — справы аграрыяў
— Завяршаючы сельскагаспадарчы год, мы з задавальненнем канстатуем, што галіна сельскай гаспадаркі вобласці працавала лепш, чым у мінулым годзе, — гаварыў старшыня Гродзенскага аблвыканкама Сямён Шапіра. — Зерневых і зернебабовых без кукурузы сабралі 1 мільён 400 тысяч тон пры сярэдняй ураджайнасці 41,2 цэнтнера з гектара, што традыцыйна з’яўляецца лепшым паказчыкам у краіне. З дзесяці сельскагаспадарчых арганізацый, якія атрымалі найвышэйшую ўраджайнасць у рэспубліцы, шэсць — з Гродзеншчыны. Сярод іх — СВК «Свіслач» Гродзенскага раёна, «Прагрэс-Верцялішкі», імя Веранецкага Бераставіцкага раёна, імя В. І. Крэмко Гродзенскага раёна, імя Адама Міцкевіча Мастоўскага раёна, «Абухава» Гродзенскага раёна. Гэтыя сельгаскааператывы з’яўляюцца эталонамі высокаінтэнсіўнага гаспадарання на зямлі і не ўступаюць аграрыям развітых краін Еўропы і свету.
Старшыня Гродзенскага аблвыканкама
С.Б. Шапіра ўручае Ганаровую грамату аблвыканкама
галоўнаму бухгалтару СВК імя Чарняхоўскага
А.П. Варэнік
Парадавалі сёлета буракаводы вобласці. Валавы збор караняплодаў склаў больш за 1 мільён 750 тысяч тон — гэта амаль 40 працэнтаў ад агульнарэспубліканскай вытворчасці. Атрымалі ўраджайнасць 510 цэнтнераў з гектара. Такім паказчыкам могуць ганарыцца многія краіны свету. Забяспечваюць салодкім коранем не толькі свой цукровы завод, але яшчэ тры аналагічныя прадпрыемствы рэспублікі.
Створаны добрыя перадумовы для далейшага нарошчвання вытворчасці прадукцыі жывёлагадоўлі. Для поўнага забеспячэння жывёлы зернефуражом намалочана 1 млн 400 тысяч зерневых і 327 тысяч тон зерня кукурузы. На адну ўмоўную галаву жывёлы нарыхтавана па 32 ц кармавых адзінак.
Добрых слоў заслугоўваюць жывёлаводы. Вытворчасць прадукцыі гэтай галіны павялічана ў асноўным за кошт росту прадукцыйнасці. На Гродзеншчыне самыя высокія сярэднясутачныя прывагі буйной рагатай жывёлы — 673 грамы, свіней — 583 грамы, сярэдні надой ад каровы складае больш як 4 тысячы кілаграмаў малака.
Дзякуючы працаўнікам вёскі за дзесяць месяцаў бягучага года прадпрыемствы-перапрацоўшчыкі адправілі на экспарт прадукцыі на суму 300 мільёнаў долараў, тым самым забяспечылі прыток валюты, так неабходнай рэспубліцы.
Нашу прадукцыю ведаюць і любяць за мяжою, дзе яна не раз была ўдастоена ўзнагарод. Малочную, мясную і прадукцыю тэхнічнага прызначэння экспартуем у 20 краін свету.
Разам з працаўнікамі палёў і ферм вялікі ўклад у агульную справу ўносяць шматлікія калектывы абслугоўваючых арганізацый АПК. Гэта аблсельгастэхніка, будаўнічыя арганізацыі, вучоныя, навучальныя ўстановы аграрнага профілю і многія іншыя.
У 2012 годзе — па два комплексы
Некалі па надоях Гродзеншчыну абганяла Міншчына. Сёлета з гонарам можна канстатаваць, што і па гэтым напрамку мы першыя. Гэтага ўдалося дасягнуць дзякуючы мэтанакіраванай рабоце па ўдасканаленні тэхналагічнай асновы вытворчасці, рэканструкцыі і будаўніцтве новых малочнатаварных фермаў. Да канца года плануецца завяршыць будаўніцтва яшчэ 23 жывёлагадоўчых фермаў і комплексаў, на якіх, з улікам жывёлагадоўчых аб’ектаў, будзе ўтрымлівацца 50 працэнтаў дойнага статку. Гэта дазволіць стварыць нармальныя ўмовы для работы жывёлаводаў. У 2012 годзе плануецца пабудаваць у кожным раёне яшчэ па два комплексы.
Сярод узнагароджаных — 18 карэліччан
На ўрачыстым сходзе больш як трыста працаўнікоў аграпрамысловага комплесу Гродзеншчыны атрымалі заслужаныя ўзнагароды, грашовыя прэміі і каштоўныя падарункі аблвыканкама, абласнога Савета дэпутатаў, абкама ГА «БРСМ», галіновага прафсаюза і дырэкцый перапрацоўчых прадпрыемстваў.
Сярод узнагароджаных — васямнаццаць прадстаўнікоў нашага раёна. Гэта намеснік старшыні СВК імя Чарняхоўскага, галоўны бухгалтар А. П. Варэнік, галоўны інжынер «Лукі-Агра» Г. А. Жыгала, трактарыст-машыніст СВК імя Царука М. А. Мароз, старшыня прафкама, старшы майстар ААТ «Карэлічы-Лён» А. Л. Ляліна, вадзіцель СВК «Свіцязянка-2003» М. І. Найба, трактарыст-машыніст СВК «Лукі-Агра» А. М. Штэйн, трактарыст-машыніст СВК «Жухавічы» У. М. Драткоўскі, трактарыст-машыніст СВК «Свіцязянка-2003» Ю. М. Пліско, аператар СЗК-10 СВК «Маяк-Заполле» К. П. Чубрык, аператар па адкорме маладняку БРЖ СВК «Свіцязянка-2003» А. І. Жылін, тэхнік па штучным асемяненні жывёлы СВК «Маяк-Заполле» М. А. Трусевіч, аператар машыннага даення кароў СВК «Лукі-Агра» А. М. Пасталоўская, старшыня СВК «Свіцязянка-2003» У. А. Галавач, старшы камбайнер СВК «Маяк-Заполле» Ю. А. Напорка, камбайнер СВК «Маяк-Заполле» Л. А. Напорка, слесар-наладчык ААТ «Карэлічы-Лён» У. А. Галушка, аператар ДП «Птушкафабрыка «Чырвонаармейская» Л. М. Грамыка, былы намеснік начальніка райсельгасхарчу В. Д. Мітлашкоў.
Першы сакратар Гродзенскага абласнога камітэта БРСМ Ю.М. Аляксей уручае ўзнагароду старшаму
камбайнеру СВК «Маяк-Заполле» Ю.А. Напорку
Узнагароду прымае старшыня СВК «Свіцязянка-2003» У.А. Галавач
Старшыня рэспубліканскага камітэта прафсаюза
работнікаў АПК У.Ф. Наумчык уручае Ганаровую грамату
Беларускага Рэспубліканскага камітэта прафсаюзаў АПК
старшыні прафкама ААТ «Карэлічы-Лён» А.Л. Лялінай
— Мы кормім людзей. А каб у кожнага ў Беларусі быў багаты стол — на гэта накіравана палітыка нашай суверэннай дзяржавы, і ў гэтым вялікая заслуга Прэзідэнта — чалавека ад зямлі, — адзначалася на ўрачыстасці.
Падрыхтавала Галіна СМАЛЯНКА
