Жанчына — слова, у якім скрыты глыбокі сэнс, сімвал жыцця, любові і мудрасці. Гэта не проста назва, гэта ўвасабленне ўсяго самага светлага і цудоўнага, што прысутнічае ў гэтым свеце. За ёй стаяць стойкая сіла і далікатнасць, пакора і воля, цярпенне і радасць.
Сціплая, усмешлівая Таццяна Бязмен працуе швачкай на Карэліцкім унітарным камунальным прадпрыемстве бытавога абслугоўвання насельніцтва. І вось ужо 40 гадоў служыць на карысць жыхароў раёна.
— Нарадзілася я ў Карэлічах. Тут вырасла, знайшла сваё прызванне, стварыла сям’ю. У школьныя гады мне вельмі падабалася музыка, таму я наведвала Карэліцкую музычную школу па класе фартэпіяна. Будучай прафесіяй таксама абрала мастацтва. Паступіла ў Гродзенскі дзяржаўны каледж культуры і мастацтваў і атрымала спецыяльнасць харавік-дырыжор.
Воляй лёсу Таццяне Мікалаеўне не давялося папрацаваць па спецыяльнасці. Пасля заканчэння ўстановы яна адразу пайшла працаваць у Дом быту.
— Мой выбар быў абумоўлены стварэннем сям’і. Пасля вучобы я выйшла замуж. Работа ў майго мужа была напружаная, ён працаваў следчым. Таму я вырашыла не ісці ў сферу культуры, а знайсці работу, якая падпарадкоўваецца больш стабільнаму графіку. Як вядома, праца ў культуры патрабуе шмат часу. Гэта і рэпетыцыі, і мерапрыемствы, дома амаль не прыпыняешся. А для сямейнага дабрабыту, калі муж і жонка аддаюць большасць часу працы, а не сям’і, гэта не вельмі добра.
Пакуль муж Таццяны стаяў на варце закона, сама яна стаяла на варце сямейнага ачага і прысвячала сябе дзецям. Таццяна шчаслівая маці двух сыноў.
— Быць маці — вялікі дар. Я поўнасцю аддаю сябе дзецям. Раблю ўсё дзеля іх здароўя, дабрабыту, шчасця. Адзін сын скончыў Універсітэт права і сацыяльна-інфармацыйных тэхналогій, а другі — Навагрудскі дзяржаўны каледж. Я задаволена сваімі дзецьмі і рада, што яны ў мяне ёсць.
Таццяна Безмен лічыць, што сучаснай жанчынай быць не проста. На яе плячах ляжыць шмат абавязкаў: праца, сям’я, дзеці, асабістыя інтарэсы. Пры гэтым трэба заставацца прыгожай, моцнай, трывалай і любячай.
— Дзякуй богу, з некаторымі паўсядзённымі абавязкамі мне дапамагаюць муж і дзеці. Падтрымка, дапамога і ўвага — аб чым яшчэ можа марыць сучасная жанчына?
Таццяна Бязмен не толькі добрая гаспадыня, маці і жонка, але і добры спецыяліст.
— Нягледзячы на тое, што мая праца зусім не звязана з музыкай, яна таксама творчая. Мне прыемна, калі людзі задаволены нашай работай. Бо ад нашага прафесіяналізму, якасці паслуг залежаць і настрой, і ўмовы іх жыцця. Я займаюся шыццём. І калі чалавек задаволены маёй працай, то, вядома, ён будзе прыходзіць да нас неаднаразова.
Паміж работай і хатнімі справамі ў Таццяны ёсць і занятак для адпачынку. Жанчына вельмі любіць працаваць у агародзе і назіраць за плёнам сваёй працы. Натхненне на ўсе свае справы Таццяна атрымлівае ад падтрымкі сваіх родных і блізкіх.
— Калі мае родныя са мною побач — гэта і ёсць для мяне сапраўднае жаночае шчасце. Мне здаецца, для кожнай жанчыны важна, каб яе блізкія былі здаровыя, каб у іх было ўсё добра. Прыемна, калі ёсць такія святы, як 8 Сакавіка. Мне здаецца, што гэтае свята мае глыбокі сэнс і сімвалізуе надыход вясны. Усё квітнее і абуджаецца ад сну. Так і жанчына, калі яна нясе сваю ўнутраную прыгажосць, дорыць сваю ўсмешку, тады усё навокал іграе іншымі фарбамі.
Год беларускай жанчыны для Таццяны Бязмен таксама немалаважны факт. Па яе меркаванні, жанчына мае патрэбу ва ўвазе не толькі 8 Сакавіка ці на Дзень маці, але і кожны дзень, бо жанчына — гэта цэлы Сусвет, сімвал гармоніі і натхнення, сапраўдная цудадзейка.
— Напярэдадні Міжнароднага жаночага дня хочацца пажадаць мілым жанчынам быць заўсёды прыгожымі, шчаслівымі, здаровымі. Жадаю ім часцей усміхацца, каб родныя і блізкія заўсёды былі побач. Няхай кожны дзень будзе напоўнены добрымі і цудоўнымі момантамі. Са святам!
Кацярына ЖАМОЙДА
Фота аўтара
