Галоўным эпізодам свята “Дажынак-2016” з’яўляецца адкрыццё сацыяльна значнага аб’екта — воранаўскага гарадскога парку. Сімвалічную стужку перарэзалі старшыня Гродзенскага аблвыканкама Уладзімір Васільевіч Краўцоў і гаспадар свята — старшыня Воранаўскага райвыканкама Мікалай Аркадзьевіч Розум. Сярод ганаровых гасцей прысутнічалі старшыня абласнога Савета дэпутатаў Ігар Георгіевіч Жук і намеснік старшыні аблвыканкама Віктар Андрэевіч Лісковіч.
Рэканструкцыя парку пачалася яшчэ ў жніўні. Брыгада з больш чым 50 чалавек штодзённа працавала, каб дзецям і дарослым тут утульна і прыемна адпачывалася.
I ў выніку — шырокія прагулачныя дарожкі, новае вулічнае асвятленне, больш за 30 зручных лавак, сучасна абсталяваная летняя эстрада, альпінарый, а ў сектарах па акружнасці альпінарыя — гульнёвыя і спартыўныя пляцоўкі для дзяцей і дарослых.
Агляд парку пачаўся з імправізаванай ручніковай алеі, сімвалізуючай дабрабыт у хаце кожнага, хто па ёй крочыць. Паступова госці “апынуліся” у 19 ст. — экскурсію па аб’екту правялі Станіслаў Путкамер і яго жонка — Марыля Верашчака.
Летняя эстрада
На летняй эстрадзе перамянілася літаральна ўсё: пачынаючы з агароджы і крэслаў, заканчваючы сцэнай, новым гукавым абсталяваннем і сафітамі. Дарэчы, танцавальная пляцоўка выбрукавана рознакаляровай пліткай, на якой вымалёўваецца элемент беларускага арнаменту — для надання нацыянальнага каларыту.
Упершыню на свяце “Дажынак” арганізавана пляцоўка традыцыйнага беларускага фальклору, на якой у творчым абліччы адлюстроўваецца гаспадарчы працэс ад моманту пасеву да выпякання каравая з мукі першага ўраджаю. Яна так і называецца «Ад зерня да каравая». Тут прадстаўлены разнастайныя традыцыйныя прылады працы, малыя архітэктурныя формы з сельгасматэрыялаў. Гонарам праграмы з’яўляюцца выступленні аўтэнтычных фальклорных калектываў.
Алея скульптур
Кожны раён нашай вобласці зрабіў свой падарунак Воранава: непаўторную аб’ёмную выяву — драўляную скульптуру, якая будзе нагадваць наведвальнікам парку не толькі аб такой значнай для Воранаўшчыны падзеі, як “Дажынкі”, але і аб рэгіёне, адкуль гэтая скульптура сюды прыехала. Тут прадстаўлены выявы дзяцей, класічнага жніўнага пейзажу, прыгажунь-жнеяў, мядзведзя з абаранкамі, рыцараў, зубраня, млына, дамавіка і іншых. Завяршаецца алея памятным знакам.
Антывандальныя вулічныя трэнажоры, думаю, заахвоцяць моладзь да заняткаў спортам. Гэты падарунак Воранаўшчыне ад г. Гродна — спонсарам выступіла гродзенская “Бакалея”.
Самы папулярны атракцыён на Воранаўшчыне — «Жырмунская рыбалка»: гэта месца, дзе ў спецыяльным вадасховішчы Воранаўскага раёна разводзіцца рыба. Хоць надвор’е і не дазваляе ў поўнай меры атрымаць асалоду ад гэтага “атракцыёна”, аднак вынікамі — у якасці ўлову і вухі — можна было скарыстацца цалкам.
Гаспадары і Гаспадыні гасцінна сустракалі гасцей багатымі сталамі на сваіх падвор’ях.
