3 снежня сусветная супольнасць адзначае Міжнародны дзень інвалідаў. Гэты дзень быў аб’яўлены Арганізацыяй Аб’яднаных Нацый у 1992 годзе. Мэты, дзеля якіх гэты дзень быў аб’яўлены, — поўнае і роўнае захаванне правоў чалавека і ўдзел інвалідаў у жыцці грамадства.
Сёння пра дзейнасць Карэліцкай аб’яднанай арганізацыі Грамадскага аб’яднання «Беларускае таварыства інвалідаў» расказвае яе старшыня Рэгіна Аляксандраўна ЗАБРОДСКАЯ.
— Рэгіна Аляксандраўна, што ўяўляе сабой Карэліцкая аб’яднаная арганізацыя Грамадскага аб’яднання «Беларускае таварыства інвалідаў»?
— На ўліку ў нашай арганізацыі стаяць 369 інвалідаў. У асноўным людзі пажылога ўзросту, якія маюць вялікую сілу духу. Яны ў пераважнай большасці нераўнадушныя, мэтанакіраваныя, улюблёныя ў жыццё і ўсё прыгожае на зямлі.
— Чым займаюцца члены таварыства?
— Многія члены таварыства вядуць актыўны лад жыцця: удзельнічаюць ва ўсіх праводзімых мерапрыемствах па месцы жыхарства, прымаюць актыўны ўдзел у мерапрыемствах, якія праводзяцца ў раённым цэнтры для членаў таварыства. Штогод ладзяцца тэматычныя вечары, прысвечаныя Міжнароднаму дню інвалідаў, спартыўныя мерапрыемствы па дартсе, стральбе з пнеўматычнай вінтоўкі, гарадках, шахматна-шашачныя турніры.
Нашы мерапрыемствы праходзяць весела і цікава. З азартам у нас адбываюцца спартыўныя спаборніцтвы на стадыёне па гульні ў гарадкі, дартсе і стральбе з пнеўматычнай вінтоўкі. Удзельнікі, якія занялі прызавыя месцы, адзначаюцца падарункамі.
— Хто аказвае дапамогу ў правядзенні мерапрыемстваў?
— Значную дапамогу аказваюць работнікі Карэліцкага раённага Цэнтра культуры і народнай творчасці і сектара спорту і турызму Карэліцкага раённага выканаўчага камітэта.
— Хто найчасцей прыходзіць на сустрэчы ў таварыства, каб расказаць інвалідам аб зменах, якія адбываюцца ў краіне?
— Пастаянна выступае перад інвалідамі і апавядае аб становішчы спраў у рэспубліцы, знаёміць з навейшымі дакументамі, якія датычаць жыццядзейнасці інвалідаў, начальнік упраўлення па працы, занятасці і сацыяльнай абароне Карэліцкага раённага выканаўчага камітэта Іна Аляксандраўна Богуш.
— Што яшчэ арганізоўваецца для інвалідаў?
— Усё-такі вялікая справа — зносіны, а асабістыя сустрэчы за кубкам гарбаты ў нязмушанай абстаноўцы саграваюць душу, натхняюць і стымулююць на добрыя справы. Штогод да Дня інвалідаў актыўныя члены арганізацыі атрымліваюць памятныя падарункі.
— Якая ўвага ўдзяляецца з боку мясцовай улады і кіраўнікоў сельгаспрадпрыемстваў Карэліччыны?
— Раённае кіраўніцтва, старшыні сельскіх Саветаў і старшыні сельскагаспадарчых прадпрыемстваў пастаянна ўдзяляюць увагу і праяўляюць клопат аб інвалідах. Практычна ва ўсіх сельскагаспадарчых арганізацыях кіраўнікі гаспадарак аказваюць дапамогу інвалідам у гаспадарчых работах і іншых сацыяльных пытаннях, аказваюць спонсарскую дапамогу ў аплаце членскіх узносаў. Хочацца выказаць словы ўдзячнасці ўсім ім за разуменне і чулыя адносіны да праблем інвалідаў.
— Існуе меркаванне: «Дабрыня выратуе свет». Што Вы можаце сказаць на гэты конт?
— Калі размова ідзе пра інвалідаў, тут дабрыня будзе дарэчы. З дня ў дзень трэба праяўляць добрыя і паважлівыя адносіны да інвалідаў і ўвесь час працягваць ім руку дапамогі, падтрымліваць у складаных і цяжкіх жыццёвых сітуацыях.
Мне хочацца ўспомніць словы паэта:
Рабі дабро! Хоць нават
коштам
Апошніх сіл, апошніх мук.
І не пытай: каму? завошта?
Рабі — без просьбаў
і прынук!
— Рэгіна Аляксандраўна, што хочацца сказаць з нагоды Міжнароднага дня інвалідаў?
— Міжнародны дзень інвалідаў святам не назавеш, але ў гэты дзень хочацца, каб кожны адчуў увагу і клопат. Ад усёй душы жадаю ўсім інвалідам і членам Беларускага таварыства інвалідаў, іх сем’ям добрага здароўя, дабрабыту, сілы духу. Няхай вашы сэрцы не ведаюць старасці і бокам абыходзяць смутак і нягоды, а мудрасць і вопыт дапамагаюць. І няхай у вашых дамах заўсёды будуць шчасце і цеплыня.
Галіна СМАЛЯНКА
Фота Кацярыны ЖАМОЙДЫ
