З дакладам аб рабоце Карэліцкай раённай ветэранскай арганізацыі і задачах на перспектыву выступіла яе старшыня Валянціна Кошур.
Ветэранская арганізацыя раёна аб’ядноўвае 12 пярвічных ветэранскіх арганізацый: 9 у сельскагаспадарчых прадпрыемствах, г.п. Карэлічы, Мірскім сельвыканкаме, УКП БАН. У раёне жыве 5135 ветэранаў, два ветэраны Вялікай Айчыннай вайны, чатыры малалетнія вязні фашызму.
Раённы ветэранскі лідар адзначыла добрую працу старшыняў пярвічных арганізацый: Веры Сцяцко, Вольгі Кісцень, Лізаветы Благадаравай, Тамары Навіцкай, Ганны Мамончык, Мікалая Васілеўскага і актывістаў ветэранскага руху, якія прымаюць удзел у жыцці раёна.
Многія ветэраны працы маюць званне «Ганаровы ветэран»: Міхаіл Парфёнка, Галіна Ульянка, Валянціна Марцюшава, Вера Сашко, Вольга Кісцень, Лізавета Благадарава, Вера Сцяцко, Алена Толмач, Васілій Чартко.
У структурных падраздзяленнях Карэліцкага раённага Цэнтра культуры і народнай творчасці працуюць 16 клубных фарміраванняў для людзей пажылога ўзросту і тры клубы па інтарэсах пры раённай бібліятэчнай сістэме: «Сустрэча» (Карэліцкая бібліятэка), «Залатыя гады» (Мірская) і «Надзея» (Цырынская). Грамадзяне пажылога ўзросту наведваюць клуб па інтарэсах «Пасядзім па-харошаму», арганізаваны пры Карэліцкім РЦКіНТ, чытаюць вершы і спяваюць песні.
Цеплынёй, клопатам і ўвагай акружаны ветэраны вайны Надзея Кужалевіч і Вольга Хіневіч, Герой Сацыялістычнай Працы Таццяна Арда, Лаўрэаты Дзяржаўнай Прэміі СССР Ванда Напорка і Ларыса Яроцкая — іх віншуюць са святамі і дораць падарункі.
Валянціна Кошур паведаміла аб тым, што члены ветэранскай арганізацыі праявілі актыўнасць у правядзенні выбараў дэпутатаў усіх узроўняў у адзіны дзень галасавання, які адбыўся 25 лютага 2024 года, і выбараў Прэзідэнта Рэспублікі Беларусь — 26 студзеня 2025 года. Многія з іх былі назіральнікамі на выбарах Прэзідэнта, вылучаны ў састаў участковых выбарчых камісій.
У справаздачным перыядзе штогод адзначаліся святы: вызваленне Беларусі ад нямецка-фашысцкіх захопнікаў, Дзень Перамогі, Дзень Незалежнасці Рэспублікі Беларусь. Ветэраны вайны і працы запрашаліся на святкаванне гэтых важнейшых дат і сустракаліся з кіраўніцтвам раёна. Раённы савет ветэранаў сумесна з установамі культуры прымае ўдзел у акцыях: «Кветка Перамогі ў маім акне», «Ваша Перамога — наша свабода», «Міласэрнасць», «Ветэран жыве побач», аўтапрабегах.
Ветэранская арганізацыя заўсёды далучаецца да абласных і рэспубліканскіх акцый: «Збяром дзяцей у школу», «Нам мір завешчана берагчы», конкурсу дзіцячага малюнка.
Пры падтрымцы райвыканкама і сельскагаспадарчых прадпрыемстваў раёна праяўляецца клопат аб забеспячэнні ветэранаў вайны, малалетніх вязняў і асобных грамадзян на зіму бульбай.
Кожны год да Дня пажылых людзей праходзіць дэкада «Залаты ўзрост». Праводзіліся ўрачыстасці, ветэраны працы ўшаноўваліся ў пярвічках.
Валанцёры з ліку школьнікаў, наведвальнікаў аддзялення дзённага знаходжання людзей пажылога ўзросту ЦСАН аказвалі дапамогу ветэранам вайны, адзінокім грамадзянам пажылога ўзросту ва ўборцы ўраджаю на прысядзібных участках, прывядзенні ў належны выгляд прыдамавых тэрыторый і кветнікаў.
Валянціна Іванаўна нагадала пра цеснае супрацоўніцтва з кіраўніцтвам раёна, установамі адукацыі, грамадскімі аб’яднаннямі, БРСМ і Белая Русь, раённай арганізацыяй таварыства інвалідаў, райкамам прафсаюза работнікаў аграпрамысловага комплексу, раённай арганізацыяй «Беларускі саюз ветэранаў вайны ў Афганістане», аддзелам культуры. Штогод праходзяць сустрэчы з воінамі-інтэрнацыяналістамі.
Старшыня раённай ветэранскай арганізацыі падкрэсліла: неабходна актывізаваць дзейнасць пярвічных ветэранскіх арганізацый, камісій і іх актыў, каб дайсці да кожнага ветэрана-пенсіянера. Яна выказала словы ўдзячнасці за дапамогу і падтрымку ў паўсядзённай дзейнасці намесніку старшыні райвыканкама Яўгену Чычкану, начальніку ўпраўлення па працы, занятасці і сацыяльнай абароне райвыканкама Іне Богуш, аддзелу ідэалагічнай работы работы і па справах моладзі райвыканкама, ЦСАН Карэліцкага раёна, Гродзенскаму абласному савету ветэранаў, а ветэранам арганізацыі — за вядзенне актыўнага ладу жыцця.
Са справаздачай аб рабоце рэвізійнай камісіі выступіла яе старшыня Вера Сашко.
Старшыня пярвічнай ветэранскай арганізацыі СВК «Жухавічы» Ганна Мамончык у сваёй прамове назвала галоўны накірунак у рабоце пярвічкі — духоўнасць і патрыятызм, каб прывіваць любоў да Бога і Радзімы на мясцовым матэрыяле. Яна заклікала ветэранаў працы рабіць дабро і жыць добрасумленна, а галоўнае — не спазніцца, а самому Богу пакланіцца.
Старшыня камісіі па культурна-масавай рабоце і сувязях са СМІ Лідзія Алясюк адзначыла актыўнасць членаў арганізацыі ў праводзімых мерапрыемствах і вядзенне актыўнага ладу жыцця, дала добрую адзнаку рабоце лідара раённай ветэранскай арганізацыі Валянціны Кошур, здольнай згуртаваць ветэранаў на карысныя справы.
У сваім выступленні начальнік упраўлення па працы, занятасці і сацыяльнай абароне райвынкама Іна Богуш звярнула ўвагу на такія пытанні, як супрацоўніцтва з ЦСАН Карэліцкага раёна і грамадскімі арганізацыямі, спонсарскую дапамогу, валанцёрскі рух, праграму «Актыўнае даўгалецце 65+» і выказала перакананне ў тым, што ветэранская арганізацыя патрэбна, каб згуртоўваць ветэранаў і весці актыўны лад жыцця.
Станоўчую адзнаку рабоце Карэліцкай раённай ветэранскай арганізацыі даў і намеснік старшыні райвыканкама Яўген Чычкан: «Я заўсёды прыводжу вас у прыклад маладым. Вы не сядзіце дома — актыўна ўдзельнічаеце ў культурных і спартыўных мерапрымствах. Прадаўжайце весці актыўны лад жыцця. Ваш лідар заўжды на пазітыве і на сваім месцы. Трэба прадаўжаць свае карысныя справы».
У рабоце канферэнцыі прыняў удзел старшыня камісіі па рабоце з моладдзю Гродзенскай абласной арганізацыі Беларускага грамадскага аб’яднання ветэранаў Аляксандр Сягоднік. Ганаровы госць адзначыў вялікую ролю ветэранскай арганізацыі, актыўнасць яе старшыні і членаў, выказаў словы падзякі за грамадзянскую пазіцыю і праводзімую работу.
Ганаровай граматай Карэліцкай раённай ветэранскай арганізацыі ўзнагароджаны старшыня ветэранскай арганізацыі СВК «Свіцязянка-2003» Мікалай Васілеўскі і член ветэранскай арганізацыі Мірскага сельвыканкама Тамара Нарбутовіч.
На першым арганізацыйным пленуме выбраны кіруючыя органы Карэліцкай раённай ветэранскай арганізацыі: старшыня, адказны сакратар, прэзідыум, савет, рэвізійная камісія і дэлегаты на Х Гродзенскую абласную справаздачна-выбарную канферэнцыю. Ветэранскім лідарам зноў абрана Валянціна Кошур. Яна падзякавала членам арганізацыі за аказаны давер і выказала ўпэўненасць, што ветэраны будуць прадаўжаць карысныя справы і весці актыўны лад жыцця.
Галіна СМАЛЯНКА
Фота Кацярыны ЖАМОЙДЫ
