Карэліцкі раён заняў трэцяе месца ў абласным спаборніцтве сярод раёнаў па ўборцы зерневых і зернебабовых культур. Атрымана больш за 107 тысяч тон зерня, што на 8 тысяч тон больш, чым у 2016 годзе. На абласных «Дажынках» у Свіслачы старшыня Гродзенскага аблвыканкама Уладзімір Краўцоў уручыў Дыплом пераможцы старшыні Карэліцкага райвыканкама Віктару Шайбаку.
Сельскагаспадарчы вытворчы кааператыў «Свіцязянка-2003» прызнаны пераможцам спаборніцтва за дасягненне найлепшых паказчыкаў у сферы сацыяльна-эканамічнага развіцця за 2016 год сярод арганізацый сельскай і рыбнай гаспадаркі і занесены на Рэспубліканскую Дошку пашаны. Калектыў гэтай гаспадаркі ўдастоены такога высокага грамадскага прызнання за сваю працу ў трэці раз.
Комплекс па адкорме свіней СВК «Маяк-Заполле» з’яўляецца лідарам у краіне па сярэднясутачных прывагах па выніках работы за першае паўгоддзе 2017 года. У сярэднім за суткі пятачкі прыбаўляюць у вазе на 974 грамы, а валавыя прывагі склалі 497 тон.
На пятым абласным сырным фестывалі ў Гродна сыр «Адыгейскі класічны», выраблены Карэліцкім маслацэхам, трэці год запар стаў пераможцам у намінацыі «Народная дэгустацыя».
Пабудаваны мост праз раку Нёман непадалёк ад вёскі Сіняўская Слабада. Дзевяць месяцаў спатрэбілася будаўнікам, каб узвесці складаную надводную канструкцыю коштам 3,2 млн рублёў.
Па выніках штогадовага абласнога спаборніцтва за дасягненне высокіх паказчыкаў у эканамічным і сацыяльна-культурным развіцці ў 2016 г. у намінацыі «За дасягнутыя высокія паказчыкі ў развіцці прамысловасці» сярод горада Гродна і раёнаў Карэліцкі раён заняў першае месца ў трэцяй групе.
Прамыя нашчадкі сусветна вядомага вучонага, ураджэнца Карэліччыны Ігнація Дамейкі ў год яго 215-годдзя наведалі Карэліччыну. Каб пабыць на Радзіме свайго знакамітага прашчура, праўнучка вучонага і іншыя родзічы ехалі з Аўстрыі, Чылі і ЗША.
Майстар-метадыст Карэліцкага Дома рамёстваў Алена Дзежыц стала пераможцай III Міжнароднага фестывалю-конкурсу «Новые вершины-2017». Калекцыя жаночай вопраткі пад назвай «Слуцкія паясы» пакарыла журы міжнароднага конкурсу.
Анастасія Мурашка і Ганна Кузьміч сталі пераможцамі міжнароднага культурнага праекта «BYFEST-2017»
У г.п. Мір адбыўся першы міжнародны ваенна-гістарычны фестываль «Мір-2017». Рэканструкцыя кавалерыйскага бою паміж Рускай імператарскай арміяй і арміяй Напалеона 1812 года разгарнулася паблізу Мірскага замка.
У Мірскім замку пачала дзейнічаць міжнародная выстава «Беларусь у паўночных войнах сярэдзіны ХVII-пачатку ХVIII стагоддзяў». Яе арганізацыяй два гады займаліся музей «Замкавы комплекс «Мір», Нацыянальны гістарычны музей Беларусі, літоўскі рэгіянальны музей Біржайскага краю «Села» і шведскі Музей арміі.
На абласным этапе рэспубліканскай алімпіяды па вучэбных прадметах адразу пяць вучняў Карэліччыны былі адзначаны ўзнагародамі. Дыплома другой ступені ўдастоена Вераніка Шумчык (біялогія, 9 «А» клас), дыпломаў трэцяй ступені — Яўгеній Кухарчык (біялогія, 11 «Б» клас) і Уладзімір Санчук (геаграфія, 11 «А» клас).
У абласным аглядзе-конкурсе «Лепшы ФАП Гродзенскай вобласці-2016» Ярэміцкі фельчарска-акушэрскі пункт заняў трэцяе месца. Гэта не першая перамога мясцовых медыкаў, у 2009 годзе ФАП ужо ўваходзіў у лік лепшых у вобласці. Загадчык медустановы Марына Мельнікава.
Галоўны аграном СВК «Свіцязянка-2003» Аляксандр Мяцеліца ўдастоены медаля «За працоўныя заслугі» за шматгадовую добрасумленную працу, узорнае выкананне службовых абавязкаў і высокі прафесіяналізм. З 2002 года спецыяліст на агранамічнай службе свіцязянскай зямлі.
Упраўляючы ўчастка № 1 СВК «Маяк-Заполле» Іван Гавака ўзнагароджаны Ордэнам Пашаны. Амаль 40 гадоў Іван Пятровіч вырасціў больш за 200 тысяч тон хлеба.
Навучэнка Карэліцкай дзіцячай школы мастацтваў Алёна Логіш стала пераможцай Усерасійскага конкурсу малюнкаў «Лістапад». Яе работа «Страказа і хоста» стала лепшай сярод дзясяткаў канкурэнтных работ.
200-гадовы юбілей адзначыў храм святой вялікапакутніцы Варвары ў аграгарадку Райца. У пачатку 19 стагоддзя гэтая царква была ўзведзена на сродкі мясцовага памешчыка Франца Раецкага як радавы храм-усыпальніца. Пасля многіх гадоў заняпаду храм адноўлены, там праходзяць багаслужэнні.
На Карэліччыне адзначылі 100-годдзе з дня нараджэння народнага пісьменніка, нашага земляка Янкі Брыля.
Аддзелу ЗАГС Карэліцкага райвыканкама споўнілася 100 гадоў. У архіве аддзела ЗАГС Карэліцкага райвыканкама ў адной з 485 кніг можна знайсці любую запіс актаў грамадзянскага стану за перыяд з 1944 года па цяперашні час. Таксама тут знаходзяцца ўсе царкоўныя запісы, якія тычацца жыхароў Карэліцкага раёна, пачынаючы з 1914 года па 1944 год.
У г.п. Карэлічы адбыліся святочныя мерапрыемствы, прысвечаныя 100-годдзю беларускай міліцыі. Служба ўчастковых інспектараў міліцыі Карэліцкага раённага аддзела ўнутраных спраў па выніках працы за 2016 год заняла другое месца сярод усіх аддзелаў аховы правапарадку і прафілактыкі Гродзенскай вобласці. Інспектару ДПС АДАІ Д. А. Брынкевічу прысвоена званне лепшага інспектара ДПС у вобласці па выніках працы за год. У сакавіку 2017 года на ўзбраенне АДАІ паступіў новы аўтамабіль «Geely».
